الەمدى شارپىعان اتى جامان ىندەتتەن بارىنشا قورعانۋ – ءاربىر ادامنىڭ مىندەتى. دارىگەرلەردىڭ بەلگىلەپ بەرگەن ساقتانۋ جولدارى – قاۋىپتىڭ الدىن الۋدىڭ ءتيىمدى جولى. دەسە دە, جامبىل وبلىسىندا مەديتسينالىق ماسكالاردىڭ تاپشىلىعى تۋرالى تۇرعىندار تاراپىنان تالاي سىن ايتىلدى. ناتيجەسىندە, وڭىردە 70 مىڭ داناعا دەيىن مەديتسينالىق ماسكا شىعارىلاتىن بولدى. ال, جۋىردا تارازدىق «اسىل-اي» تىگىن فابريكاسى ءوز ەسەبىنەن 1000 مەديتسينالىق ماسكا تىگىپ, ونى كوپبالالى جانە از قامتىلعان وتباسىلارعا تەگىن تاراتقان بولاتىن.
قايىرىمدىلىق – قايتىمى بار ساۋاپتى ءىس. بۇل ورايدا, كوروناۆيرۋس ىندەتىنىڭ الدىن-الۋ ماقساتىندا تاراز قالالىق اكىمدىگىنىڭ باستاماسىمەن بىرنەشە رەت قولدانۋعا ارنالعان 4000-عا جۋىق مەديتسينالىق ماسكالار دايىندالۋدا. اكىمدىكتىڭ مالىمەتىنشە, وعان قاجەتتى ماتەريالداردى دەمەۋشىلەر الىپ بەرىپتى. بۇگىندە مەديتسينالىق ماسكالاردى تاراز قالاسىنداعى تىگىن شەبەرحانالارىنىڭ يەلەرى مەن تىگىنشى قىز-كەلىنشەكتەر اقىسىز تۇردە تىگۋدە. ەرىكتى ازاماتتاردىڭ كومەگىمەن تىگىلىپ جاتقان مەديتسينالىق ماسكالار كوپبالالى جانە جاعدايى تومەن وتباسىلاردىڭ مۇشەلەرىنە تەگىن تاراتىلاتىن بولادى.
جامبىل وبلىسى