سولتۇستىك قازاقستان وبلىسى قىزىلجار اۋدانىنىڭ نوۆونيكولسك سەلوسىنداعى «زەنچەنكو ي ك» شارۋا قوجالىعىندا ەگىن وراعى الدىنداعى ءداستۇرلى سەمينار-كەڭەس بولىپ ءوتتى. القالى جيىنعا وبلىس اكىمى سامات ەسكەندىروۆ قاتىسىپ, اۋىل شارۋاشىلىعى تەحنيكاسىنىڭ كورمەسىن كورىپ, بۇدان ارى كارتوپ, جۇگەرى ەگىلگەن القاپتاردا بولدى. كەلەسى كەزەكتە زاماناۋي مال كەشەنىنىڭ جۇمىسىمەن تانىستى. بۇل تۋرالى سولتۇستاىك قازاقستان وبلىسى اكىمىنىڭ ءباسپاسوز قىزمەتى حابارلادى.
سەمينار-كەڭەستە بيىلعى ەگىن ورۋ ناۋقانىن ۇيىمداسقان تۇردە جۇرگىزۋ ماسەلەسى تالقىلاندى. جيىندى اشقان ءوڭىر باسشىسى «قازاقستان رەسپۋبليكاسىنىڭ پرەزيدەنتى ۇلت كوشباسشىسى ن. ءا. نازارباەۆ استىق ونىمدىلىگىن ارتتىرۋدى ەڭ الدىمەن جاڭا تەحنولوگيالاردى ەنگىزۋ ارقىلى قامتاماسىز ەتۋ مىندەتىن قويدى. ۇستىمىزدەگى جىلى قابىلدانعان «اگروبيزنەس — 2020» باعدارلاماسىندا 2020 جىلعا دەيىن مەملەكەتتىك قولداۋ شارالارىن 4,5 ەسە ارتتىرۋ كوزدەلگەن. جاڭا وزىق تەحنولوگيالاردى پايدالانۋ, جىلسايىنعى مەملەكەتتىك قولداۋ جانە اۋا رايىنىڭ جاعدايى اۋىل شارۋاشىلىعى داقىلدارىنىڭ بىتىك شىعۋىنا مۇمكىندىك تۋعىزدى. وبلىستىڭ شامامەن 5 ملن. توننا استىق وندىرۋگە شاماسى بار», — دەپ اتاپ ءوتتى.
ديقاندار مول ءونىم الۋ ءۇشىن جازعى ۋاقىتتا تىنباي ەڭبەك ەتتى, ال ەندى كۇزگى ۋاقىتتا بىتىك شىققان بيدايدى ىسىراپسىز جيناپ الۋ مىندەتى تۇر. كەڭەستە كۇزى وراقتى وتكىزۋ جايىندا نەگىزگى باياندامانى وبلىس اكىمىنىڭ ءبىرىنشى ورىنباسارى ايداربەك ساپاروۆ جاسادى. اگروقۇرىلىم باسشىلارى مەن اۋدان اكىمدەرى دە ءسوز سويلەدى.
كەڭەس سوڭىندا ماراپاتتاۋ ءراسىمى ءوتتى. وبلىس اكىمى سامات ەسكەندىروۆ اۋداندىق ۆەتەرينارلىق ستانتسيالاردىڭ جەتەكشىلەرىنە 14 اۆتوكولىكتىڭ كىلتىن تابىس ەتتى.
سەيىتجان ق ۇلىمباي.