قۇرلىقتىق حوككەي ليگاسىنىڭ پلەي-وفف كەزەڭى 10 ساۋىردە جالعاسادى. وسىعان وراي, ءتۋرنيردى ۇيىمداستىرۋشىلار «بارىستىڭ» ليگاعا قايتا ورالۋىنا مۇمكىندىك بارىن ايتقان بولاتىن. الايدا, كلۋب پرەزيدەنتى كوماندا ءۇشىن بيىلعى ماۋسىمنىڭ اياقتالعانىن ايتتى. بۇل تۋرالى Olympic.kz حابارلادى.
«بارىس» كلۋبىنىڭ پرەزيدەنتى بوريس يۆانيششەۆ «ريا نوۆوستي» اگەنتتىگىنە بەرگەن سۇحباتىندا كوماندانىڭ پلەي-وفف اينالىمىنا قاتىسپايتىنىن مالىمدەدى.
«سپورتشىلاردىڭ بارلىعى دا ۇيلەرىنە كەتتى. كوماندا بولىپ وسىنداي شەشىم قابىلداعان سوڭ, ارىپتەستەرىمنىڭ شەشىمىن تالقىلاي المايمىن. ءبىز ءۇشىن بيىلعى ماۋسىم اياقتالدى. ەندى كەلەسى ماۋسىمدى كۇتەمىز. قازىر بۇكىل الەم جابىلىپ جاتىر», - دەدى كلۋب پرەزيدەنتى.