19 ناۋرىز ساعات 00.00-دەن باستاپ نۇر-سۇلتان قالاسى بويىنشا كارانتين ەنگىزىلۋىنە بايلانىستى ەلوردالىق قۇرىلىس باسقارماسى بارلىق قۇرىلىس-مونتاج جۇمىستارىنىڭ جالعاساتىندىعىن مالىمدەدى. بۇل تۋرالى قالا اكىمدىگىنىڭ ءباسپاسوز قىزمەتى حابارلادى.
- قالاداعى بارلىق قۇرىلىس-مونتاج جۇمىستارىنىڭ جالعاساتىندىعىن حابارلايمىز. سوندىقتان بارلىقتارىڭىزدى سانيتارلىق-گيگيەنالىق ساقتىق شارالارىن ساقتاپ, سابىر تانىتۋعا شاقىرامىز, - دەدى قالالىق قۇرىلىس باسقارماسى باسشىسىنىڭ ورىنباسارى نۇركەن تولەنديەۆ.
حابارلاماعا سايكەس قۇرىلىس نىساندارىندا كەلەسىدەي قاۋىپسىزدىك شارالارىن ساقتاعان ءجون:
ءاربىر قىزمەتكەرگە كارانتين جونىندە اقپارات بەرۋ. قۇرىلىس نىساندارىنداعى جەكە قۇرامدى گيگيەنالىق قۇرالدارمەن, اتاپ ايتقاندا مەديتسينالىق بەتپەردە, انتيسەپتيكالىق قۇرالدارمەن جانە باسقا دەزينفەكتسيالىق جابدىقتارمەن قامتاماسىز ەتۋ. قىزمەتكەرلەردىڭ دەنساۋلىعىن ۇنەمى تەكسەرىستەن وتكىزىپ, COVID -19 ۆيرۋستارىنا ءتان سيمپتومدار انىقتالعان جاعدايدا, ءتيىستى ورگاندارعا (103, 1406 نومىرلەرى ارقىلى) حابارلاۋ. ءبىر بولمەدە ادامداردىڭ شوعىرلانۋىنا شەكتەۋ قويۋ. قۇرىلىس اۋماعىن دەربەس ايماقتارعا ءبولۋ. قۇرىلىسشىلاردى تۇراقتى مەكەن جايىنان قۇرىلىس نىسانىنا جانە كەرى قايتۋ باعىتتارىن بەكىتىپ, تۇراقتى تاسىمالداۋ جۇيەسىن ۇيىمداستىرۋ. باسقا وڭىرلەردەن كەلگەن جانە كارانتينگە الىنعان ايماقتان تىس جەردە تۇراتىن قىزمەتكەرلەردى بارلىق سانيتارلىق-ەپيدەميولوگيالىق نورمالارعا سايكەس تۇرعىلىقتى جەرمەن قامتاماسىز ەتۋ. قۇرىلىس نىساندارىنا بوگدە ادامداردىڭ كىرۋىنە تيىم سالىپ, قاۋىپسىزدىك شارالارىن كۇشەيتۋ.قۇرىلىس باسقارماسى كارانتيندىك ءىس-شارالارعا بايلانىستى تالاپتار وزگەرتىلگەن جاعدايدا قوسىمشا حابارلايدى.