مەملەكەت باسشىسى جۇقپالى ىندەتتىڭ تارالۋىنا جول بەرمەۋ ماقساتىندا ستۋدەنتتەردى قاشىقتىقتان وقىتۋ تۋرالى مالىمدەمە جاساعانى بەلگىلى. وسى ورايدا مەرزىمنەن تىس كوكتەمگى دەمالىسقا شىعا سالىسىمەن ۇيلەرىنە اسىققان الماتىلىق ستۋدەنتتەر ءۇشىن جول ءجۇرۋ بيلەتتەرىنىڭ تاپشىلىعى تۋىنداپ وتىر.
دەمالىس كۇنى قالاداعى «سايران» اۆتوبەكەتىندەگى كاسسالاردا ستۋدەنتتەر ساعاتتاپ كەزەككە تۇردى. ءتىپتى, كەيبىرەۋى بيلەت تاپپاي كەرى قايتقان. ولاردىڭ ايتۋىنشا, بيلەت باعاسى ادەتتەگىدەن 2-3 مىڭ تەڭگەگە قىمباتتاپ ۇلگەرگەن. اۆتو بەكەت قىزمەتكەرلەرى بيلەت تاپشىلىعىن جويۋ ماقساتىندا بارلىق شارالاردى قولدانىپ جاتقاندىعىن ايتادى. نەگىزگى بازاداعى كولىكتەردەن بولەك, جولاۋشىلار تاسىمالداۋعا قوسىمشا جەكەمەنشىك اۆتوبۋستار تارتىلعان. مەكەمە بيلەت باعاسىنىڭ قىمبات بولۋ سەبەبىن وسى جاعدايمەن ءتۇسىندىرىپ وتىر. ويتكەنى, جەكەمەنشىك اۆتوبۋستاردىڭ سۇرايتىن اقىسى الدەقايدا جوعارى.
«ماسەلەن, قىزىلوردادان كەشە 12 اۆتوبۋس الدىرتتىق. ولار سول قالادان بوس كەلدى, سول ءۇشىن كەلۋ اقشاسىن دا سۇراپ وتىر. سول سەبەپتەن دە بيلەت قۇنى 1000 تەڭگەگە قىمبات بولىپ وتىر. قىزىلورداعا بيلەت 6 مىڭ بولدى, وعان مىڭ تەڭگە قوستىق, قوسىمشا جۇك باعاسى 720 تەڭگە», دەيدى «سايران» اۆتوبەكەتى تاسىمالداۋ ءبولىمىنىڭ باسشىسى ەرلان ابىلداەۆ.
بۇگىندە سايران اۆتوبەكەتىنىڭ بازاسىندا 70-كە جۋىق اۆتوبۋس بار. قازىرگى تاڭدا اسىرەسە قىزىلوردا, شىمكەنت, تۇركىستان قالالارىنا بيلەتكە سۇرانىس ارتقان.