تاراز قالاسىنداعى جامبىل وبلىستىق №6 بوكس مەكتەبىنىڭ بۇرىنعى جاتتىقتىرۋشىسى دانيار ۇكىباەۆ كىسى ولتىرگەنى ءۇشىن ايىپتالىپ, 6 جىلعا باس بوستاندىعىنان ايىرىلدى. بۇل تۋرالى «Nur rz» پورتالى حابارلادى.
تەرگەۋ امالدارىنىڭ قۇجاتتارى بويىنشا انىقتالعانداي, 2013 جىلدىڭ 12 تامىزىندا ءوز ءۇيىنىڭ ماڭىنداعى كوشەدەن 4 جانە 6 جاسار بالاسىن جەتەكتەپ ءوتىپ بارا جاتقان 32 جاستاعى ۆياچەسلاۆ سىچەۆ دەگەن ازاماتتى د.ۇكىباەۆ سوققىعا جىعىپ, اۋرۋحاناعا تۇسىرەدى. ۆ.سىچەۆ اۋرۋحانادا 10 كۇندەي ەسىن جيا الماي, كوز جۇمادى.
وقيعانىڭ شىعۋ سەبەبىنە توقتالساق, اۆتوكولىك مىنگەن ۇكىباەۆ وزىنە جول بەرە قويماعان جاياۋ جۇرگىنشى – سىچەۆكە ماشيناسىنان تۇسكەن بويدا بىرنەشە رەت جۇدىرىق جۇمسايدى. سونداي-اق, ۇكىباەۆتىڭ تۋىسى, كولىك ىشىندە بولعان قايرات شامشيەۆ تە وزگە جاياۋ جۇرگىنشىلەرگە كۇش كورسەتەدى. جانجالدان كەيىن ۇكىباەۆ پەن شامشيەۆ وقيعا ورنىنان ىزدەرىن سۋىتادى. بىراق پوليتسيا قىزمەتكەرلەرى ەكەۋىن دە سول كۇنى قولعا تۇسىرەدى.
سىچەۆتىڭ ءوزىن كىنالى ەتىپ كورسەتۋمەن بولعان ايىپتالۋشىلاردىڭ سوزىنە تەرگەۋشى دە, سوت تا كوبىرەك سەنىپ, قاتەلىككە بوي الدىرعان. سول سەبەپتى, اتالمىش وقيعا بويىنشا قىلمىستىق ءىس ءبىر جىلداي ۋاقىتقا سوزىلعان.
ايىپتالۋشىلاردىڭ ايتۋىنشا, سىچەۆ الكوگولدىك ىشىمدىك ءىشىپ الىپ, وزدەرىنە شابۋىلداعان, سودان كەيىن جول جيەگىندەگى بورديۋرگە باسىمەن قۇلاعان. الايدا, مەديتسينالىق تەكسەرۋ كىنالىلەردىڭ جالاسىن جوققا شىعاردى.
ناتيجەسىندە د.ۇكىباەۆ 6 جىلعا, ق.شامشيەۆ 2 جىلعا تۇرمەگە جابىلدى.
جولدىباي بازاروۆ.