كەشە تۇندە استانانىڭ «استانا-ارەنا» سپورت كەشەنىندە چەمپيوندار ليگاسىنىڭ ءتورتىنشى راۋندىنىڭ ءبىرىنشى ويىنىندا قاراعاندىنىڭ «شاحتەرى» مەن گلازگونىڭ «سەلتيك» كوماندالارى كەزدەسىپ, جەرلەستەرىمىز 2:0 ەسەبىمەن جەڭىسكە جەتتى.
«شاحتەر» (قاراعاندى, قازاقستان) – «سەلتيك» (گلازگو, شوتلانديا) 2:0 (1:0)
20 تامىز. استانا. «استانا-ارەنا» سپورت كەشەنى. 30 000 كورەرمەن.
تورەشىلەر: پاۆەل كرالوۆەتس, مارتين ۆيلچەك, انتونين كوردۋلا ء(بارى دە - چەحيا).
«شاحتەر»: الەكساندر موكين, الەكساندار سيمچەۆيچ, سەرگەي مالىي, نيكولا ۆاسيلەۆيچ, الدين دجيديچ, اندرەي پورىۆاەۆ, اندرەي فينونچەنكو (يگور زەنكوۆيچ, 82), روحەر كانياس, گەديمينتاس ۆيچيۋس, گەۆورگ كازاريان, سەرگەي حيجنيچەنكو.
«سەلتيك»: فرەيزەر فورستەر,ۆەردجيل ۆان ديك, ستيۆەن مۋيوكولو, چارلز مالگريۋ, ەميليو يساگيررە (اميدۋ بالدە, 82), ميكاەل لۋستيگ (ادام مەتيۋز, 67), سكوتت براۋن, كريس كاممونس, دجەيمس فوررەست, گيورگوس ساماراس, دجو لەدلي.
گولدار: اندرەي فينونچەنكو (12), سەرگەي حيجنيچەنكو (77).
ەسكەرتۋ: ستيۆەن مۋيكولو (45).
بۇل ناعىز «كورگەندە ارماندا, كورمەگەن دە ارماندا» دەيتىندەي تارتىستى دا قىزىقتى ويىن بولدى. ولاي بولاتىن دا ءجونى بار. «سەلتيك» - ەۋروپاداعى ەڭ بەلدى دە بەدەلدى كوماندالاردىڭ ءبىرى. ءوزىنىڭ باستاۋىن سوناۋ1887 جىلعى 6 قاراشادان الاتىن كلۋب وسى كەزگە دەيىن 43 مارتە ءوز ەلىنىڭ چەمپيونى, 34 رەت كۋبوك يەگەرى اتانعان. ول 1967 جىلى كۇللى بريتانيا كوماندالارى اراسىندا ءبىرىنشى بولىپ ەۋروپا چەمپيوندارى كۋبوگىنا (وسى كۇنگى چەمپيوندار ليگاسى) قول جەتكىزدى. سول جىلى كەڭەس وداعى اتىنان تۋرنيرگە قاتىسقان كيەۆتىڭ «ديناموسىن» دا جولاي ءسۇرىپ وتە شىققان ول فينالدا يتاليانىڭ «ميلانىن» 2:1 ەتىپ تىزە بۇكتىرگەن. ال 1970 جىلى وسى كۋبوكتىڭ اقتىق ايقاسىندا گوللانديانىڭ «فەيەنووردىنا» 1:2 ەسەبىمەن جول بەرىپ قويدى. بەرگى داۋىردە وسىنداي وراسان زور تابىستارى بولماعانىمەن, «سەلتيك» ءار جىلدارى وزىنە تيەسىلى جەڭىستەرىنە جەتىپ, جەمىستەرىن تەرىپ كەلدى. مىنە, قازاقستان كلۋبتارىنا بۇعان دەيىن ءدال وسى دەڭگەيدەگى ۇجىممەن ۇشىراسۋدىڭ ۇتىمدى ۇتىرى تۋا قويعان جوق ەدى. وسى جىلى العاش رەت چەمپيوندار ليگاسىنىڭ ەكى كەزەڭىن ءساتتى وتكىزگەن كەنشىلەر جاساعى ءۇشىن مۇنداي قارسىلاسپەن تەكەتىرەسىپ, كۇش سىناسۋ تاعدىردىڭ بەرگەن وزگەشە سىيى ىسپەتتەس-ءتىن. سوندىقتان قاراعاندىلىقتار وسى مۇمكىندىكتى ءتيىمدى پايدالانىپ, شايقاسقا بارىن سالۋعا ۇمتىلدى.
«سەلتيكتى» 2010 جىلعى 25 ناۋرىزدان بەرى وسى كلۋبتىڭ ءوز تۇلەگى, بۇرىنعى جارتىلاي قورعاۋشى نيل لەننون باپتاپ كەلەدى. 2012 جىلعى ماۋسىمنان بۇل كلۋبتىڭ عۇمىر بويعى باستى باسەكەلەسى – گلازگونىڭ «گلازگو رەيندجەرسى» قارجى تاپشىلىعىنا بايلانىستى پرەمەر-ليگادا ونەر كورسەتۋىن توقتاتىپ, ءۇشىنشى ليگاعا كەتتى. سودان بەرى «سەلتيك» ەل ىشىندەگى چەمپيوناتتا وزىنە پارا-پار كەلەتىن لايىقتى قارسىلاس تابا الماي وتىر. وسىدان قۋات العان كوماندا ەندى حالىقارالىق دەڭگەيدە دە باياعى تابىستارىن قايتالاۋعا قاتتى قۇلشىنىس بىلدىرۋدە. سوندىقتان نيل مىرزا ءتۋرنيردىڭ توپتىق باستى ايقاستارعا الىپ باراتىن باستاپقى كەزەڭىندە وزدەرىنە «شاحتەر» سيپاتىنداعى اسا كۇشتى ەمەس باسەكەلەستىڭ كەزىككەنىنە بىردەن قۋانىش ءبىلدىردى. ول سونىمەن قاتار ءيىنى قاشىق قازاقستانعا جەتۋدەن ءبىرشاما سەسكەنەتىنىن دە جاسىرا قويمادى. تەگىندە وسىنىڭ بارىندە شىندىقتىڭ شىمى بۇرقىراپ جاتسا كەرەك, قانشا جەردەن قارسىلاسىن قالپاقپەن ۇرىپ الاتىنداي سەس تانىتقاندارىمەن, «سەلتيك» شتابى بۇل ماتچقا ايرىقشا كوڭىل بولە قارادى. مۇنىڭ ءبىرىنشى تارماعى رەتىندە كوماندا استاناعا 18 تامىز كۇنى-اق ۇشىپ جەتتى. ال سونىڭ الدىندا عانا جاڭا باستالعان ەل بىرىنشىلىگىندە ول «ابەرديندى» 2:0 ەتىپ جەڭىپ شىعىپ ەدى.
سونىمەن, كۇتكەن ساعاتتا, كۇتكەن مينۋتتا كۇتكەن ويىن دا تابادا ەرىگەن مايداي دوڭگەلەپ الا جونەلدى. البەتتە, ماتچ باستالماي تۇرىپ-اق مامانداردىڭ كوپشىلىگى ونىڭ باستى ءفاۆوريتى كىم ەكەنىن بەلگىلەپ قويعان. شاماسى, بۇعان كەلىسپەگەندەر وسى كۇنى ستاديوندى اۋزى-مۇرىنان شىققانشا تولتىرعان ناعىز جانكۇيەرلەردىڭ قالىڭ لەگى عانا شىعار. تورەشى ىسقىرىعى ەستىلەردەن كوپ بۇرىن-اق كوماندانى قولداۋلارىن باستاپ كەتكەن فاناتتار بۇكىل كەزدەسۋ بويىنا سول ارىندارىنان قايتقان جوق. ولاردىڭ قولپاشتاۋلارى كەنشىلەردى ۇدايى العا سۇيرەپ وتىرعانىن ءبىز دە بايقادىق. ال كەزدەسۋ, ءبىزدىڭ كۇنى بۇرىن قاۋىپ ەتكەنىمىزدەي, «سەلتيكتىڭ» قاۋىرت شابۋى لىنان ءورىس الدى. العاشقى ساتتەردەن الاڭ يەلەرىن ەستەن تاندىرىپ تاستاۋعا ۇمتىلعان قوناقتار 3-مينۋتتا ەكى بىردەي وتە قاتەرلى بۇرىشتاما بەرىپ ۇلگەردى. ونى ءوز ايىپ الاڭىندا قارسىلاستار شابۋىلىنىڭ جولىن كەسكەن گەديمينتاس ءۆيچيۋستىڭ ساقتىق جاساپ, دوپتى قاقپا سىزىعىنىڭ ارعى جاعىنا قاراي تەۋىپ جىبەرۋى تۋىنداتتى. چارلز مالگريۋدىڭ وڭ قاناتتان الىس بۇرىشقا جەتكىزگەن دوبىنا ۇمتىلعان الەكساندر موكين ءمۇلت كەتىپ, اۋا قارماپ قالدى. سول كەزدە ەكى بىردەي كەلت ويىنشىسىنىڭ ونى بوس قاقپاعا تاستاي سالاتىن مۇمكىندىگى بولىپ ەدى, بىراق ولاردىڭ قارسى الدارىنان شىعا كەلگەن ءبىزدىڭ قورعاۋشى كوماندانى بۇل گولدان دەر كەزىندە قۇتقارىپ قالدى. مۇنىڭ سوڭى تاعى دا بۇرىشتاماعا الىپ باردى. ەندى دوپ سول قاناتتان جەتكىزىلدى. بۇل جولى كريس كوممونس تاستاعان دوپقا ايىپ الاڭى ىشىندە ۆەردجيل ۆان دەيك بۇرىن جەتتى. ونىڭ قاقپا باعانى استىنا قاراي باسپەن ۇرعان دوبىنا موكين ارەڭ يەلىك ەتتى.
وسىدان كەيىن عانا «شاحتەر» ءوز-وزىنە كەلىپ, باۋىرىن جازىپ, العا قاراي شاپقىنشىلىققا شىعا باستادى. ولاردىڭ ويىندارىندا بۇدان بۇرىنعى ليگا ماتچتارىندا بايقالعان تاباندىلىق پەن تىڭعىلىقتىلىق قايتا كورىنىس تاپتى. ەندى كەنشىلەر شابۋىلدارى قاۋىپتى بولا ءتۇستى. بۇلاردىڭ دەنى قاراعاندىلىقتار قۇرامىنداعى ەڭ تاجىريبەلى ويىنشى, كوماندا كاپيتانى اندرەي فينونچەنكو ءوربىدى. الدىن الا ايتىپ قويايىق, ونىڭ جەتكىزگەن وتكىر پاستارىن العى شەپتەگى سەرگەي حيجنيچەنكو بىردە ءوزى قابىلداي الماسا, بىردە ونىڭ الدىن قارسىلاستار قورعاۋشىلارى كەسىپ كەتىپ جاتتى. ويىنداعى العاشقى گول سوعىلاردىڭ الدىندا دا سولاي بولدى. الدىمەن «سەلتيكتىڭ» شابۋىلشىلارى وتە قاۋىپتى جورىققا كوتەرىلىپ, ءبىزدىڭ جىگىتتەر تاعى ءبىر سىندارلى ساتتەن ابىرويمەن شىعىپ كەتتى. سول كەزدە اياعىنا دوپ ىلىككەن فينونچەنكو ونى وڭ قاپتالمەن العا زىمىراتتى. بىراق دوپ حيجنيچەنكوعا جەتپەدى. ونى جولاي ەميليو يساگيررە قاعىپ جىبەرىپ, اۋتقا جونەلتتى. ال دوپتى ءبىزدىڭ سەرگەي مالىي قاقپا الاڭىنا قاراي اۋەلەتە ايدادى. اپىراقتاپ قالعان ءبىزدىڭ جىگىتتەر ونى ءتيىمدى پايدالانا المادى دا, قوناقتار سىرتقا شىعارىپ ۇلگەردى. ىلە-شالا قاراعاندىلىقتار سول قاپتالدان دا دوپ لاقتىرۋ مۇمكىندىگىن الدى. وعان تاعى دا مالىي جۇگىرە باسىپ جەتتى. وسى كەزدەن باستاپ بايقادىق, سەرگەيدىڭ وسىلاي الىستان اۋەلەتە لاقتىرعان دوپتارى كوماندا ويىنشىلارىنىڭ بۇرىشتامادان تاستاعاندارىنان دا قاۋىپتىرەك بولىپ شىعادى ەكەن. مىنە, ول تاعى دا قاقپا الاڭىنا دوپتى قالقىتىپ جەتكىزدى. ول بىرەر سوققىدان كەيىن فينونچەنكونىڭ الدىنا كەلە قالدى. مۇنداي مۇمكىندىكتى قالت جىبەرەتىن اندرەي مە, ول اسا قاتتى بولماسا دا, ايرىقشا ءبىر سەنىممەن دوپتى قوناقتار قاقپاشىسى جانىنان قاقپا تورىنا قاراي سىرعىتا سالدى. گول!
وسى گولدان كەيىن الاڭداعى كورىنىس كەلبەتى مۇلدەم وزگەرىپ سالا بەردى. ءوزىن ەندى ەركىن سەزىنگەن «شاحتەر» ارتقا قاراي جالتاقتاپ, ءوز قاقپاسى ماڭىنا شوعىرلانعاندى ءبىرجولا قويدى. سوعان قاراماستان, الاڭدا بەس قورعاۋشى ۇستاعان باس جاتتىقتىرۋشى ۆيكتور كۋمىكوۆ ءۇش جەلىلى قورعانىس تاكتيكاسىنان اينىعان جوق. ءسوز رەتى كەلگەندە ايتا كەتەيىك, قوناقتار دا بۇل ويىنعا بەس نەگىزگى قورعاۋشىنى قويدى. بىراق, بىزدەن ايىرماشىلىعى, الاڭداعى بەسىنشى قورعاۋشى – ميكاەل لۋستيگتى ولار بۇل جولى جارتىلاي قورعاۋشى رەتىندە پايدالاندى. مۇنىڭ ەسەسىنە, كەيىن, ەكىنشى تايمدا بۇل ويىنشىنى الماستىرعاندا, نيل لەننون ونىڭ ورنىنا تاعى ءبىر قورعاۋشى – ادام مەتيۋزدى شىعاردى. وسى ارقىلى ول ەسەپتىڭ وزدەرى ءۇشىن 0:1 بولىپ تۇرعان قالپىنا قاناعاتتاناتىنىن ءبىلدىردى. الايدا, ارادا 10 مينۋت وتكەننەن كەيىن ەسەپ 2:0-گە جەتكەندە, شوتلاند كوۋچى بۇل سحەمادان تاعى باس تارتىپ, ويىنعا تاعى ءبىر شابۋىلشى – اميدۋ بالدەنى قوسىپ, گيورگيوس ساماراس پەن دجو لەدلي ۇشتىگىن قۇردى. ءبىزدىڭ باعىمىزعا قاراي, بۇل ۇشەۋى وزدەرىنىڭ الدارىنا قويىلعان زور مىندەتتى اقىرى ورىنداي المادى.
دەگەنمەن, «شاحتەردىڭ» قاقپاسى الدىندا قاۋىپتى ساتتەردىڭ تۋى توقتالا قويمادى. ماسەلەن, سونداي جورىقتاردىڭ بىرىندە كريس كوممونس الىستان قاقپاعا دوپ باعىتتادى. سونشالىقتى كۇشتى سوققىمەن ۇشقان دوپ سول بويى ماڭدايشانى سولق ەتكىزىپ بارىپ, كەيىن سەرپىلدى. ەندى بولماعاندا, قاقپاعا كىرىپ كەتە جازداعان سول دوپتى الەكساندر موكين شاپ بەرىپ ۇستاي الدى. مۇنىڭ ارتىندا كەنشىلەر قاۋىرت شابۋىلعا كوشتى. ناتيجەسىندە الەكساندار سيمچەۆيچ ايىپ الاڭىنا جاپ-جاقسى ەتىپ دوپ جەتكىزدى. ونى سول جەردە سەرگەي مالىي قاعىپ الىپ, قاقپاعا باسپەن ۇردى. ونىسى ماڭدايشادان ءسال عانا جوعارى ۇشىپ ءوتتى. كەلتتەردىڭ قورعانىس جۇيەسى قارسىلاستارىنان تاپ مۇنداي شالت قيمىلداردى كۇتپەسە كەرەك, ولار ەداۋىر ابىرجىپ قالدى. تاعى ءبىر اتاپ وتەتىن جايت, ويىننىڭ ونە بويىندا ءبىزدىڭ قوس شابۋىلشىدان بولەك (فينونچەنكو, حيجنيچەنكو), جارتىل