تۇركىستان وبلىسى اكىمىنىڭ ورىنباسارى مەيىرجان مىرزاليەۆ گەرمانيا فەدەراتيۆتى رەسپۋبليكاسىنىڭ باس كونسۋلى كريستيانا ماركەرتپەن كەزدەستى. تاراپتار ەكى جاقتىڭ ساۋدا-ەكونوميكالىق, مادەني-گۋمانيتارلىق جانە ينۆەستيتسيالىق ىنتىماقتاستىعىن نىعايتۋ مۇمكىندىكتەرىن, بىرلەسكەن جوبالاردى جۇزەگە اسىرۋ جولدارىن تالقىلادى. سونداي-اق وبلىس باسشىلىعى قوناقتاردى ءوڭىردىڭ ەكونوميكالىق جانە تۋريستىك الەۋەتىمەن تانىستىردى.
«قازىر تۇركىستان ناعىز قۇرىلىس الاڭىنا اينالعان. كونە شاھاردا الەۋمەتتىك-مادەني نىساندارمەن قاتار حالىقارالىق اۋەجاي, « ۇلى جىبەك جولى» ۇلتتىق قول - ونەر ورتالىعى, كونگرەسس-حول, «كەرۋەن ساراي» تۋريستىك كەشەنى, «ريكسوس» جانە «حيلتون» سىندى الەمدىك ستاندارتقا ساي قوناق ۇيلەر مەن باسقا دا عيماراتتار بوي كوتەرۋدە. ءوڭىرىمىزدىڭ وسىناۋ الەۋەتىن جانە قازاقستان مەن ەۋرووداق اراسىنداعى تىعىز قارىم-قاتىناستاردى ەسكەرە وتىرىپ, ءبىز بارلىق سالا بويىنشا ىنتىماقتاستىقتى دامىتۋعا دايىنبىز»,-دەدى وبلىس اكىمىنىڭ ورىنباسارى.
كريستيانا ماركەرت ءوز كەزەگىندە ەكى ەل اراسىنداعى ساۋدا-ەكونوميكالىق جانە مادەني بايلانىستاردى ارتتىرۋعا بارىنشا قولداۋ كورسەتىپ, گەرمانيا ەلىنىڭ بەلدى كومپانيالارىنىڭ تۇركىستان ءوڭىرىن دامىتۋعا باعىتتالعان جوبالاعا قاتىسۋعا دايىن ەكەنىن ايتتى. تۇركىستان وبلىسىندا ەۋرووداق ەلدەرىنىڭ كومپانيالارى ات سالىسىپ جاتقان 8 جوبانىڭ جۇزەگە اسۋدا. ولاردىڭ اراسىندا Eni, Urbasolar سياقتى تانىمال كومپانيالار بار.
ايتا كەتۋ كەرەك, وتكەن جىلدىڭ قورىتىندىسى بويىنشا قازاقستاننىڭ گەرمانيامەن سىرتقى ساۋدا اينالىمى 1,4 ملرد دوللارىن قۇراعان. ەلىمىزدە نەمىس كومپانيالارىنىڭ قاتىسۋىمەن 900- دەن استام كاسىپورىن جۇمىس ىستەيدى. ولاردىڭ اراسىندا Linde AG, HeidelbergCement, BASF, Knauf, Siemens, Wilo, Metro Cash and Carry, CLAAS سياقتى ءىرى كومپانيالاردى اتاپ وتۋگە بولادى. سونىڭ ارقاسىندا سوڭعى 4 جىلدا ەكى ەلدىڭ كاسىپورىندارى اراسىندا 2 ملرد ەۋرودان استام قارجىنىڭ بىرلەسكەن جوبالارى جۇزەگە اسىرىلعان.