كۋرسانتتار ارداگەر انالاردى قۇتتىقتادى

«ەل باسىنا كۇن تۋعان شاقتا ءپاتريوتيزمنىڭ ۇزدىك ۇلگىسىن كورسەتە بىلگەن اسىل جاندارعا العىسىمىزدى جەتكىزەمىز. بۇگىنگى بەيبىت كۇنىمىز سول كىسىلەردىڭ ارقاسى. ءوزىمىزدىڭ ىستىق ىقىلاسىمىزدى, العىسىمىزدى, قۇرمەتىمىزدى ءبىلدىرۋ ءۇشىن وتان سوعىسىندا ەرلىك كورسەتكەن ارداقتى اپالارىمىزدى قۇتتىقتاۋعا كەلدىك», دەيدى 4 كۋرس كۋرسانتى ابىلاي مۇستابەكوۆ.

اتالعان ورتالىقتا تۇراتىن ۇلى وتان سوعىسىنا قاتىسقان ۆالەنتينا سميرنوۆا مەن مارينا تسەلۋەۆا, بولاشاق وفيتسەرلەرگە سوعىس جىلدارىندا باستان كەشكەندەرىن اڭگىمەلەپ, كورسەتكەن ىقىلاستارى ءۇشىن  ريزاشىلىقتارىن ءبىلدىردى.

سوعىس باستالعان جىلى 18 جاستاعى ۆالەنتينا سميرنوۆا مەديتسينالىق ينستيتۋتتىڭ 2 كۋرس ستۋدەنتى ەدى. وزگە ستۋدەنتتەر سياقتى اسكەر قاتارىنا الىنىپ, سوعىسقا اتتانعان. قارشاداي قىز مايدان دالاسىندا بايلانىسشى بولعان. جەڭىستى تىنىق مۇحيتىندا, قيىرشىعىس مايدانىندا قارسى العان.

«سۇم سوعىستىڭ ىزعارىندا ءجۇرىپ ءبارىن  باستان كەشتىك: سۋىقتى دا, اشتىقتى دا, ءولىمدى دە كوردىك, سونىڭ بارلىعى مىنا ءتاتتى ءومىردىڭ ءبىر ءساتى ءۇشىن ەدى», - دەپ كوز جاسىنا ەرىك بەردى ارداگەر.

ۆالەنتينا سميرنوۆا تىنىق مۇحيتى فلوتىندا اسكەري قىزمەتىن وتكەرىپ جۇرگەن جەرىنەن 1946 جىلدىڭ اقپانىندا عانا ەلگە قايتارىلعان. تەڭىز فلوتىن وفيتسەر ماماندارمەن جاساقتاۋعا ۇلەس قوسقان جاۋجۇرەك سارباز جەڭىس جاريالانعاننان كەيىن دە 9 اي بويى اسكەري مىندەتىن جالعاستىرىپتى.

سوعىستان كەيىنگى جىلدارى ۆالەنتينا پەتروۆنا ماسكەۋ ينجەنەرلىك-قۇرىلىس ينستيتۋتىنا تۇسكەن. ال 1958 جىلى قازاقستانعا كوشىپ كەلىپ, قۇرىلىس سالاسىندا ەڭبەك ەتكەن. بۇگىندە جاسى 98-گە كەلگەنىنە قاراماستان قاريا ءوزىن جاقسى سەزىنەدى, ويى دا, ءسوزى دە انىق.

ال, ارداگەر ماريا تسەلۋەۆا سوعىس كەزىندە تىڭشىلىق قىزمەتتە بولعان. سۋ-10 جويعىش ۇشاعىن تىزگىندەگەن  ول ۋكراينانى ازات ەتۋگە قاتىسىپ, 100-دەن اسا مارتە پاراشيۋتپەن سەكىرىپ, وزگەلەردى دە بۇل ىسكە باۋلىعان.