قوستانايدا 13 پوليتسەيدەن قۇرالعان قىلمىستىق توپ سوت الدىنا كەلدى. ولاردىڭ اراسىندا ۇساق قىزمەتكەرلەر عانا ەمەس, سونىمەن قاتار وبلىستىق ىشكى ىستەر دەپارتامەنتىنىڭ قىزمەتكەرلەرى دە بار. بۇل تۋرالى «ەكسپرەسس-ك» گازەتى جازدى.
مۇنداي ماسقارانى ىشكى ىستەر مينيسترلىگى بۇرىن-سوڭدى باستان كەشكەن ەمەس. 13 ادامنان قۇرالعان بۇل ۇيىمداسقان قىلمىستىق توپ قوستاناي وبلىسىندا ەسىرتكى زاتتارىن تاراتۋمەن اينالىسىپ كەلگەن. پوگون تاققان «قۇبىجىقتاردى» ۇلتتىق قاۋىپسىزدىك قىزمەتكەرلەرى ۇستادى. الدىمەن تورعا
رەزيدا اسىلباەۆا, الەۆتينا پەترەنكو جانە نادەجدا كيسەلەۆا ەسىمدى ايەلدەر ءتۇستى. سودان سوڭ شەڭبەر شيراتىلىپ سالا بەردى. كەيىن انىقتالعانداي, ايماققا ەسىرتكى پوليتسەيلەردىڭ قاتىسۋىنسىز كەلمەيتىن بولىپ شىقتى. ولاردىڭ ءبىرى وسىعان قالقان بولسا, ەكىنشىسى كوزىن جۇما قاراعان, ال ءۇشىنشىسى ەسىرتكىنى اينالىمعا جىبەرۋمەن اينالىسقان.
تەرگەۋ قورىتىندىسىندا 34 قىلمىستىق ءىس قوزعالىپ, ول بويىنشا 37 ادام كۇدىكتى رەتىندە ءوتتى. بۇلاردىڭ 13-ءى پوليتسيا قىزمەتكەرلەرى ەكەن.
ءىس قازىر سوتقا وتكىزىلگەن. دۇربەلەڭى كۇشتى بۇل ءىستى وبلىستىق سوتتىڭ توراعاسى اسىلبەك جۇماعۇلوۆتىڭ ءوزى قارايتىن بولىپتى. جاقىن كۇندەردە ءبىرىنشى تىڭداۋ وتكىزىلەدى.
قۇرىش نۇرىمبەت.