قىزىلوردادا ازەربايجاننىڭ «ازەركورپۋ» كومپانياسىنىڭ جۇمىسشىلارى اسحانادا ءبىر بولكە ناندى بولىسە الماي, جەرگىلىكتى جۇمىسشىلارمەن توبەلەستى. بۇل كومپانيا اتالعان وڭىردە 2011 جىلدان بەرى «باتىس ەۋروپا-باتىس قىتاي» حالىقارالىق كولىك ءدالىزىنىڭ قۇرىلىسىن سالۋدا. بۇل تۋرالى «استانا» تەلەارناسى حابارلادى.
اسحاناداعى توبەلەس تۋرالى العاشقى اقپارات وبلىستىق ىشكى ىستەر دەپارتامەنتىنە 16 تامىز كۇنى تۇسكەن. كۋاگەرلەردىڭ ايتۋى بويىنشا, 2 جەرگىلىكتى جۇمىسشى ازەربايجاندىق 3 جۇمىسشىمەن سوزگە كەلىپ قالعان. ەرتەڭىنە شەتەلدىك جۇمىسشىلاردىڭ باسىم بولىگى جۇمىسقا شىعۋدان باس تارتادى. ال 18 تامىز كۇنى تاياق, تەمىر, تاسپەن قارۋلانعان 15 بەلگىسىز ازامات اتالعان كومپانيا اۆتوكولىگىنىڭ اينەكتەرىن سىندىرادى. «وسى وقيعا بويىنشا قىلمىستىق كودەكستىڭ 257-بابى 2-بولىگىمەن قىلمىستىق ءىس قوزعالىپ, تەرگەۋ امالدارى جۇرگىزىلۋدە. ءارى قاراي ءىس سوتقا جىبەرىلىپ, شەشىم قابىلداناتىن بولادى», - دەيدى قىزىلوردا قالالىق ىشكى ىستەر باسقارماسى ءباسپاسوز قىزمەتىنىڭ جەتەكشىسى قالدىبەك ابدۋللاەۆ.
دانيار تۇيمەباي.