مۇرات ايتەنوۆ شىمكەنتتە قۇرىلىسى قارقىن العان بىرقاتار نىساندى ارالادى

مەردىگەر كومپانيا وكىلدەرىمەن كەزدەسكەن قالا باسشىسى قولعا العان جۇمىستى جاۋاپكەرشىلىكپەن اتقارۋدى مىندەتتەدى. ەڭ اۋەلى مۇرات دۇيسەنبەك ۇلى ءنۇرسات شاعىناۋدانىندا 21,5 گا اۋماقتا سالىنىپ جاتقان ۇيلەردىڭ قۇرىلىسىن ارالاپ كوردى. مۇنداعى 8 ءۇيدىڭ ىرگەتاسىنان باستاپ تۇرعىزىلۋىنا جاۋاپتى مەردىگەر مەكەمە - «ارت قۇرىلىس» كومپانياسى. باسشىسى بەكجىگىت تولەنديەۆتىڭ ايتۋىنشا, قۇرىلىسى 2018 جىلى باستالعان نىسان بيىل ماۋسىم ايىندا پايدالانۋعا بەرىلمەك. ءاربىر ءۇيدىڭ ءىشى-سىرتىن مۇقيات كورگەن قالا اكىمى قۇرىلىستى ءوز مەرزىمىندە تاپسىرۋدى جانە ساپالى اتقارۋدى ەسكەرتتى.

ء«بىرىنشى كەزەكتە ساپاعا ءمان بەرىڭىزدەر. تۇرعىنداردان ساپاعا قاتىستى شاعىم كوپ. ەڭ باستى تالاپ – وسى. ءبىز تۇرعىن ءۇي سالۋشىلارعا ءاردايىم قولداۋ كورسەتەمىز. سىزدەر تاراپتان ساپالى جۇمىس ىستەلىنۋى كەرەك. ارينە, قۇرىلىس جۇمىستارىنىڭ قالا ەكونوميكاسىنا قوسار ۇلەسى مول. قالاعا كەلەتىن ينۆەستورلار دا الدىمەن قۇرىلىس بارىسىنا ءمان بەرەدى», - دەدى قالا اكىمى.

ونان سوڭ شاھار باسشىسى تۇران شاعىناۋدانىندا «Shymkent» اكك» تاپسىرىسىمەن سالىنىپ جاتقان 8 ءۇيدىڭ قۇرىلىسىن دا ارالاپ كوردى. مۇندا مەردىگەر «بەك ستروي سەرۆيس» جشس جوسپار بويىنشا جۇمىس جۇرگىزۋدە. قۇرىلىسى 2018 جىلى باستالعان ۇيلەر ءساۋىر جانە ماۋسىم ايىندا پايدالانۋعا بەرىلەدى.

سونداي-اق, مۇرات دۇيسەنبەك ۇلى تۇران شاعىناۋدانىندا قۇرىلىسى اياقتالعان مەكتەپتە بولدى. 1200 ورىندى ءبىلىم وشاعى ءتورتىنشى توقسانعا بالالاردى قابىلداۋعا دايىن. جالپى, شىمكەنت قالاسىندا بيىل 77 ءۇيدىڭ قۇرىلىسىن جۇرگىزۋ جوسپارلانعان. جۇمىستار كەستەگە ساي جۇرگىزىلۋى ءتيىس.

قالالىق قۇرىلىس باسقارماسىنىڭ باسشىسى ەربول احمەتوۆتىڭ ايتۋىنشا, قۇرىلىسى بيىلعا جوسپارلانعان 77 ءۇيدىڭ 24-ءى كرەديتتىك, 8-ءى ارەندالىق. ال تۇران شاعىناۋدانىندا 41 ءۇيدىڭ قۇرىلىسى جۇرگىزىلەدى. مەملەكەتتىك ساتىپ الۋ كونكۋرسى جاريالانعان.

شىمكەنت