قازاقستان رەسپۋبليكاسىنىڭ ۇلتتىق مۇراجايى مەن ءبىرىنشى «ەۋرازيا» ارناسى ارىپتەستىك تۋرالى مەموراندۋم قابىلدادى. بۇل قۇجاتقا قر ۇلتتىق مۇراجايىنىڭ ديرەكتورى دارحان مىڭباي مەن ءبىرىنشى «ەۋرازيا» ارناسى باس ديرەكتورىنىڭ ورىنباسارى مۇحتار ەرمان قول قويدى.
قازاقستان رەسپۋبليكاسىنىڭ ۇلتتىق مۇراجايى مەن ءبىرىنشى «ەۋرازيا» ارناسى ارىپتەستىك تۋرالى مەموراندۋم قابىلدادى. بۇل قۇجاتقا قر ۇلتتىق مۇراجايىنىڭ ديرەكتورى دارحان مىڭباي مەن ءبىرىنشى «ەۋرازيا» ارناسى باس ديرەكتورىنىڭ ورىنباسارى مۇحتار ەرمان قول قويدى.
استانادا ۇلتتىق مۇراجايدىڭ قۇرىلىسى ءالى ءجۇرىپ جاتىر. بۇل بىرەگەي جوبا استانا تاريحىنىڭ مۇراجايى, تاۋەلسىز قازاقستاننىڭ تاريحى, قازاقستان تاريحى, التىن جانە زاماناۋي ونەر تاريحى سەكتسيالارىنان تۇرادى. ەلباسىنىڭ باستاماسىمەن قولعا الىنعان بۇل عاجايىپ مۇراجاي ۇلتتىق-مادەني قۇندىلىقتاردى ساقتايتىن ورىن بولماق. تۇڭعىش پرەزيدەنت كۇنىنە وراي ونىڭ ءبىر بولشەگى «استانا تاريحىنىڭ مۇراجايىن» اشۋ جوسپارلانىپ وتىر. ونىڭ ءوزى, جالپى اۋماعى 14 مىڭ شارشى مەتردەن اساتىن, 14 زالى بار ۇلكەن عيمارات.
قازاقستان رەسپۋبليكاسىنىڭ ۇلتتىق مۇراجايى مەن ءبىرىنشى «ەۋرازيا» ارناسى ەلباسىنىڭ «قازاقستان-2050» ستراتەگياسى – قالىپتاسقان مەملەكەتتىڭ جاڭا ساياسي باعىتى» اتتى جولداۋىندا, «حالىق تاريح تولقىنىندا» باعدارلامالارىندا كورسەتىلگەن بازالىق قۇندىلىقتاردى جۇزەگە اسىرۋعا باعىتتالعان ارىپتەستىككە ۋاعدالاستى.
ءبىرىنشى «ەۋرازيا» ارناسى ەلىمىز اۋماعىنىڭ 90 پايىزىنا حابار تاراتادى. ول ءوزىنىڭ اقپاراتتىق ساياساتىندا ۇرپاق بويىنا وتانسۇيگىشتىكتى ءسىڭىرۋ, مادەني مۇرانى ساقتاۋ, سونداي-اق, ۇلتتىڭ تاريحي ساناسىن قالىپتاستىرۋ ماسەلەلەرىن باستى نازاردا ۇستايدى. ارنانى دامىتۋ ستراتەگياسىندا قازاق تىلىندەگى حابارلارعا باسىمدىق بەرۋ جاعى دا قاراستىرىلۋدا.
«ەگەمەن-اقپارات».