2020 جىلدىڭ 6 ناۋرىز كۇنى قاستەەۆ اتىنداعى مەملەكەتتىك ونەر مۋزەيىندە ايگىلى قازاقستاندىق سۋرەتشى ساكەن عۇماروۆتىڭ (1937-1995) شىعارماشىلىعىنا ارنالعان «قۇس جولى» جەكە كورمەسىنىڭ اشىلۋى وتەدى.
تانىمال قازاقستاندىق سۋرەتشى ساكەن عۇماروۆتىڭ (1937 - 1995) شىعارماشىلىعى حح عاسىردىڭ اياعىنداعى ۇلتتىق بەينەلەۋ ونەرىندەگى بىرەگەي قۇبىلىستى كورسەتەدى. كورەرمەننىڭ نازارىنا ۇسىنىلىپ وتىرعان كورمە سۋرەتشىنىڭ 1950-1990 جىلدار ارالىعىندا جازعان جەكە كوللەكتسياسىنداعى 30-عا جۋىق تۋىندىدان تۇرادى.
«سۋرەتشىنىڭ ءاربىر شىعارماسى – قيال مەن شىندىقتىڭ تاڭعاجايىپ قوسىندىسى, اۆتوردىڭ قورشاعان الەم تۋرالى ويلارىنىڭ جيناقتالعان كورىنىسى. ونىڭ شىعارمالارىنىڭ ستيليستيكالىق جانە ماعىنالىق نەگىزى سۋرەتشىنىڭ ءوزى ويلاپ تاپقان «اقىل-وي فورمالارى», ەرەكشە بايلانىستار مەن ماعىنالاردىڭ كەڭ قاتارىنان تۇراتىن تاڭقالارلىق بەلگى-بەينەلەر, ادام تارىزدەس جانە زوومورفتىق تىرشىلىك يەلەرى – توتەمدەر بولىپ تابىلادى. زامانداستارى ءۇشىن س. عۇماروۆ «رۋحاني جاسى فيزيكالىق ەسەپتەۋگە سايكەس كەلمەيتىن جۇمباق سۋرەتشى» بولدى. ول ءوزىن ء«وز ويىن ەركىن بىلدىرەتىن, ەركىن تاقىرىپتاعى, ءوز شىعارماشىلىعىن تولىقتاي ازات ەتۋگە ۇمتىلعان سۋرەتشى» دەپ اتادى. شەبەر ونەردىڭ ەڭ باستى ماقساتى «شەكسىز جەمىس پەن شەكسىز كەمەلىنە ۇڭىلۋدە» دەپ ءبىلدى», دەيدى ونەرتانۋشى امير دجادايباەۆ.
وتىز جىلدان استام ۋاقىت ىشىندە سۋرەتشى «بەستياري», «اقىل-وي فورمالارى», «انا مەن بالا», «كۇتۋ», «باستار مەن دەنەلەر», «شىعارمالار» سياقتى تۋىندىلاردىڭ ۇلكەن توپتاماسىن جاسادى. س. عۇماروۆ ءوزىنىڭ كۇللى شىعارماشىلىعىن «الەمدى جالعان ماتەرياليزمنەن قۇتقارۋعا», ونى «عارىشتىق ميستيكالىق ەنەرگيامەن» تولتىرۋعا», ادامدارعا, ءبىزدىڭ كۇندەلىكتى ومىرىمىزگە قاراما-قايشى كەلەتىن باسقا شىندىقتىڭ بايلىعىن كورسەتۋگە ارنادى.
ساكەن عۇماروۆ 1937 جىلى ورالدا (سولتۇستىك-باتىس قازاقستان) دۇنيەگە كەلگەن. ماسكەۋدەگى ا. لۋناچارسكي اتىنداعى مەملەكەتتىك تەاتر ونەرى ينستيتۋتىن, لەنينگراد تەاتر, مۋزىكا جانە كينەماتوگرافيا ينستيتۋتىن بىتىرگەن. رەجيسسەر جانە اكتەر بولىپ قىزمەت ەتكەن. كسرو جۋرناليستەر وداعىنىڭ مۇشەسى. س. عۇماروۆتىڭ تۋىندىلارى قازاقستاننىڭ, الىس-جاقىن شەتەلدەردىڭ جەكە جانە مەملەكەتتىك كوللەكتسيالارىندا ساقتاۋلى. 1995 جىلى ورالدا س. عۇماروۆتىڭ مەموريالدىق مۋزەيى اشىلعان بولاتىن.