اقمولا وبلىسى پروكۋراتۋراسىنىڭ قىزمەتكەرى ا.اكىموۆ ماس كۇيىندە قالالىق مەشىتتىڭ اۋلاسىندا دارەت سىندىرعانى ءۇشىن قىزمەتتىك تەكسەرىس قورىتىندىسىنان كەيىن جۇمىسىنان قۋىلدى. بۇل تۋرالى BNews.kz تىلشىسىنە وبلىستىق پروكۋراتۋرانىڭ ءباسپاسوز قىزمەتى حابارلادى.
«پروكۋراتۋرا قىزمەتكەرى ا.اكىموۆتىڭ قىزمەتتىك ەتيكانى بۇزۋ وقيعاسى بويىنشا اقمولا وبلىسىنىڭ پروكۋراتۋراسى قىزمەتتىك تەكسەرۋ جۇمىستارىن جۇرگىزگەن بولاتىن. وعان ا.اكىموۆتىڭ كوكشەتاۋ قالاسىندا 2013 جىلى 19 شىلدەدە ساعات 00:10 شاماسىندا ماس كۇيىندە د.مۇحامەتجانوۆتىڭ كولىگىن سوعۋى سەبەپ بولعان», - دەپ حابارلادى ءباسپاسوز قىزمەتىنەن.
ءتارتىپ كوميسسياسىنىڭ شەشىمىمەن قازاقستان پروكۋراتۋراسى ورگاندارى مەن مەكەمەلەرىنىڭ ار-نامىس كودەكسىن بۇزعانى ءۇشىن جانە پروكۋراتۋرا ورگاندارى قىزمەتكەرىنىڭ بەدەلىن تۇسىرگەنى ءۇشىن ا.اكىموۆتى قىزمەتىنەن بوساتۋ جانە تارتىپتىك جاۋاپكەرشىلىككە تارتۋ ۇسىنىلدى.
«وبلىس پروكۋرورىنىڭ بۇيرىعىمەن پروكۋراتۋرا ورگاندارىنىڭ اتىنا كىر كەلتىرەتىن ارەكەت جاساعانى ءۇشىن كىشى ادىلەت كەڭەسشىسى ا.اكىموۆ قىزمەتىنەن بوساتىلىپ, اقمولا وبلىسى پروكۋراتۋرا ورگانارىنان قۋىلدى», - دەپ ناقتىلادى پروكۋراتۋرادان.
ەستەرىڭىزگە سالا كەتەيىك, وبلىستىق پروكۋراتۋرا قىزمەتكەرى «تاراۋىق-ناماز» كەزىندە مەشىتكە ماس كۇيىندە كەلىپ, ءدال مەشىتتىڭ اۋلاسىندا دارەت سىندىرعان. سودان كەيىن كولىگىنە ءمىنىپ كەتپەك بولعان ول قاسىندا جولىن بوگەپ تۇرعان اۆتوكولىكتى سوعادى. بۇل شۋلى وقيعا مەشىتتىڭ سىرتىندا ورناتىلعان بەينەكامەراعا جازىلىپ قالعان ەكەن.
قۇرىش نۇرىمبەت.