شىمكەنتتە جۇرگىزۋشىگە جالا جاپقان جول پوليتسياسىنىڭ قىزمەتكەرى 4 جىلعا سوتتالدى. بۇل تۋرالى otyrar.kz حابارلادى.
ءىس ءال-فارابي اۋداندىق سوتىندا قارالدى. ءتارتىپ ساقشىسىنىڭ ابىرويىنا داق تۇسىرەتىن وسى كەلەڭسىزدىك ەلباسىنىڭ قۇقىق قورعاۋشىلارمەن بولعان كەزدەسۋىندە دە ايتىلعان. سول كەزدە پرەزيدەنت «پوليتسەيلەر قولدارىنا قىزىل كۋالىك تۇسكەننەن كەيىن ءوزىن پاتشا رەتىندە سەزىنەدى» دەپ سىناعان ەدى. ءتىپتى, شىمكەنتتىك پالەقور جول پوليتسەيىنىڭ وزىنە-ءوزى ۇيىمداستىرعان شابۋىلى دا ءسوز بولدى.
وقيعا جول پوليتسەيلەرىنىڭ كەزەكتى رەيدى كەزىندە ورىن العان. ءتارتىپ ساقشىسى مەن جۇرگىزۋشى اراسىندا داۋ تۋىندايدى. جول ساقشىسى كولىك جۇرگىزۋشىسىنىڭ تارتىپكە باعىنباعانىمەن قويماي, پوگونىمدى ج ۇلىپ الدى دەپ جارياعا جار سالعان بولاتىن.
بىراق بۇل ارزانقول قويىلىم بولىپ شىقتى. ايتىلعاننىڭ ءبارى پوليتسيا قىزمەتكەرىنىڭ قاراپايىم تۇرعىنعا جاپقان جالاسى ەكەنى دالەلىن تاپتى. شىن مانىندە وقيعانىڭ قالاي وربىگەنى سول ماڭداعى اقشا ايىرباستاۋ ورنىنداعى سىرتقى بەينە-باقىلاۋ كامەراسىنا جازىلىپ قالعان. وسىعان وراي ايىپتاۋشى تاراپ تا ءوز تالابىن ءبىلدىردى.
وسىلايشا جۇرگىزۋشى ەمەس, پوليتسەيدىڭ ۇستىنەن ءىس قوزعالدى. جۇرگىزۋشىنىڭ كىناسىزدىگىن پروكۋراتۋرا قىزمەتكەرى رەسمي تۇردە جاريالادى. وسى داۋ تۋىنداعان كەزدە پوليتسەيدىڭ قاسىندا تاعى ءبىر ارىپتەسى بولعان. ول ءالى كۇنگە دەيىن ىزدەستىرىلۋدە. ال مامەدوۆ قىلمىستىق كودەكستىڭ ءۇش بابى بويىنشا ايىپتى دەپ تانىلدى.
وسىلايشا, قاراپايىم حالىقتىڭ قورعاۋشىسى ەمەس, قورلاۋشىسىنداي بولعان مامەدوۆ تەمىر تورعا 4 جىلعا قامالاتىن بولدى. ۇكىم وقىلعان كۇننەن باستاپ 15 تاۋلىك وتكەننەن كەيىن زاڭدى كۇشىنە ەنەدى.
قۇرىش نۇرىمبەت.