الماتى وبلىسىنداعى اقساي شاتقالىندا جاپپاي كىسى ولتىرۋشىلىك ورىن العان وقيعادان كەيىن ارادا تۋرا ءبىر جىل ۋاقىت وتكەندە, ونداعى قۇربانداردىڭ سانى 13 بولعانى انىقتالدى. سول كەزدە حابار-وشارسىز كەتتى دەپ ەسەپتەلگەن يگور زاحاروپۋلو دا قازا تاپقان بولىپ شىقتى. بۇل تۋرالى كتك تەلەارناسى حابارلادى.
يگور – سول قىرعىندا ولتىرىلگەن ەگەر پانايوت زاحاروپۋلونىڭ بالاسى. اتالمىش ەگەردىڭ كەلەسى بالاسى الەكساندر وسى جايىندا تەلەارنا جۋرناليستەرىنە ايتىپ بەردى. ونىڭ ءوزى دە مۇنى جاقىندا بىلگەن سياقتى.
«بىزگە بۇل تۋرالى ەشكىم ايتقان جوق. سوت بولعاندا دا شاقىرىلعان جوقپىز. سوندا ول ءولى دەپ ەسەپتەلىپتى. مۇنى ءبىز ەندى ەستىپ وتىرمىز. بۇلارى ەشبىر ادامگەرشىلىككە جاتاپيدى», - دەدى ول.
شىن مانىندە يگور زاحاروپۋلونىڭ نە ولىدەي, نە تىرىدەي دەنەسىن تاپقان ءالى ەشكىم جوق.
ەسكە سالا كەتەيىك, اقساي شاتقالىنداعى وقيعا 2012 جىلعى 12 تامىز كۇنى ورىن الدى. قىلمىسكەرلەر 12 ادامدى, سونىڭ ىشىندە براكونەرلەرمەن اياۋسىز كۇرەسىپ جۇرگەن بەلگىلى ەگەر پانايوت زاحاروپۋلونى, ونىڭ ايەلى مەن دوستارىن مالشا باۋىزداپ ولتىرگەن. سول كەزدە ەگەردىڭ بالاسى يگور ءىز-ءتۇزسىز جوعالىپ كەتكەن. ونىڭ تاعدىرى قازىرگە دەيىن بەلگىسىز. وقيعا بولعان جەرگە جاقىن جەردە ونىڭ قيراپ قالعان كولىگى تابىلعان.
2013 جىلعى ماۋسىم ايىندا قىرعىزستاندا وسى وقيعاعا كۇدىكتىنىڭ ءبىرى – راديكالدى ءدىني اعىمنىڭ مۇشەسى سايان قايىروۆ ۇستالدى. كەيىنىرەك ول قازاقستان جاعىنا تاپسىرىلدى. كەلەسى كۇدىكتى زاۋربەك بوتاباەۆ قازىر ىزدەستىرىلۋ ۇستىندە.
سۇلتان بوزايعىر.