ەلباسى قازاقستاننىڭ باي تابيعاتى, قايتالانباس تاريحي-مادەني ەسكەرتكىشتەرى ەلىمىزدە تۋريزم يندۋسترياسىن وركەندەتۋگە مول مۇمكىندىك بەرەتىندىگىن ايتىپ, ءوزىنىڭ جىل سايىنعى جولداۋلارىندا ءتۋريزمدى ەل ەكونوميكاسىنىڭ تۇراقتى دامۋىنىڭ باسىم باعىتتارىنىڭ ءبىرى رەتىندە كادەگە جاراتۋدى ۇدايى ۇسىنىپ كەلەدى. ونىڭ ۇستىنە عاسىر جوباسى اتانعان «باتىس ەۋروپا – باتىس قىتاي» حالىقارالىق كولىك ءدالىزىنىڭ باسىم بولىگىنىڭ وبلىس اۋماعىنان ءوتۋى ءتۋريزمدى دامىتۋعا سەرپىن بەرەتىن فاكتور رەتىندە قارالىپ وتىرعانى دا شىندىق. ولاي بولسا, بۇل باعىتتا قانداي ىزدەنىستەر بار, قانداي شارۋالار اتقارىلۋدا؟ اڭگىمەنىڭ القيسساسىن وسى باعىتتا ءوربىتۋ ماقساتىندا وبلىستىق تۋريزم, دەنەشىنىقتىرۋ جانە سپورت باسقارماسى باسشىسىنىڭ ورىنباسارى عالىمجان كەنجەباەۆقا جولىققانبىز.
ءتۋريزمنىڭ تابىستى سالا ەكەنىن تورتكۇل دۇنيە ءتۇسىنىپ بولدى. سوندىقتان دا ءتۋريزمدى تابىستىڭ قاينار كوزى رەتىندە ەلدىڭ يگىلىگىنە پايدالانۋعا باسىمدىق بەرىلىپ كەلەدى. الەمدىك قارجى داعدارىسى دا ەكونوميكانىڭ ءتيىمدى سالالارىن دامىتۋدى العا تارتۋدا. بۇعان بۇگىنگى تاڭدا تۋريزم يندۋسترياسىنان تۇسكەن تابىس مۇناي ءوندىرىسى مەن ماشينا جاساۋ ونەركاسىبىنەن كەيىنگى ورىندا تۇرعانى دا ناقتى دالەل بولا الادى. ساراپشىلاردىڭ پايىمداۋىنشا, 100 مىڭ تۋريست قالادا شامامەن ەكى ساعات بولعان كەزدە 350 مىڭ اقش دوللارىن جۇمسايدى ەكەن. تۋريزم الەمدەگى جالپى ۇلتتىق ءونىمنىڭ وننان ءبىر بولىگىن, حالىقارالىق ينۆەستيتسيانىڭ 11 پايىزدان استامىن, الەمدىك ءوندىرىستىڭ ءاربىر توعىزىنشى جۇمىس ورنىن قامتاماسىز ەتەتىنىن دە ەكونوميستەر الدەقاشان شوتقا قاعىپ, ەسەپتەپ قويعان. ءتىپتى حالقى بىرىڭعاي تۋريزمنەن تۇسكەن تابىسپەن كۇن كورىپ وتىرعان ەلدەر دە بار. ولاردان اۋماعى دا, تابيعي بايلىعى دا, ارحەولوگيالىق جانە تاريحي ەسكەرتكىشتەرى دە ارتىق بولماسا, كەم ەمەس اقتوبە وبلىسى ۇلى جىبەك جولى بويىندا ورنالاسقاندىعىمەن-اق ءتۋريزمدى دامىتۋعا سۇرانىپ تۇرعانداي. ارينە, «اتتىلىعا ەرەمىن دەپ, جاياۋدىڭ تاڭى اتپاس» دەگەندەي, عاسىرلار بويى ءتۋريزمدى تالعاجاۋ ەتىپ وتىرعان ەلدەرمەن باسەكەلەسپەسەك تە, ەل ەكونوميكاسىن تۋريزمنەن تۇسەتىن تابىسپەن تولىقتىرۋدىڭ مۇمكىندىگى بىزدە دە بار. ەلباسى قازاقستاننىڭ باي تابيعاتى, قايتالانباس تاريحي-مادەني ەسكەرتكىشتەرى ەلىمىزدە تۋريزم يندۋسترياسىن وركەندەتۋگە مول مۇمكىندىك بەرەتىندىگىن ايتىپ, ءوزىنىڭ جىل سايىنعى جولداۋلارىندا ءتۋريزمدى ەل ەكونوميكاسىنىڭ تۇراقتى دامۋىنىڭ باسىم باعىتتارىنىڭ ءبىرى رەتىندە كادەگە جاراتۋدى ۇدايى ۇسىنىپ كەلەدى. ونىڭ ۇستىنە عاسىر جوباسى اتانعان «باتىس ەۋروپا – باتىس قىتاي» حالىقارالىق كولىك ءدالىزىنىڭ باسىم بولىگىنىڭ وبلىس اۋماعىنان ءوتۋى ءتۋريزمدى دامىتۋعا سەرپىن بەرەتىن فاكتور رەتىندە قارالىپ وتىرعانى دا شىندىق. ولاي بولسا, بۇل باعىتتا قانداي ىزدەنىستەر بار, قانداي شارۋالار اتقارىلۋدا؟ اڭگىمەنىڭ القيسساسىن وسى باعىتتا ءوربىتۋ ماقساتىندا وبلىستىق تۋريزم, دەنەشىنىقتىرۋ جانە سپورت باسقارماسى باسشىسىنىڭ ورىنباسارى عالىمجان كەنجەباەۆقا جولىققانبىز.
تۋريزم سالىستىرمالى تۇردە ءبىزدىڭ ءوڭىر ءۇشىن تىڭ سالا بولىپ تابىلادى. وڭىردە بۇل سالانى دامىتۋدىڭ كەشەندى شارالارى الىنۋدا. بۇل ءبىر-ەكى جىلدا وڭىرىمىزگە تۋريستەر اعىلادى دەگەن ءسوز ەمەس. ارينە, قازىر اتقارىلىپ جاتقان جۇمىستار بولاشاققا باعىتتالعان قادامدار. وبلىستا بيىل «يتفا-2013. تۋريزم. ساياحات. سپورت» حالىقارالىق تۋريستىك كورمەسى ونىنشى رەت وتكىزىلدى. وبلىستىڭ ايتارلىقتاي تۋريستىك مۇمكىنشىلىگى, قولايلى جاعراپيالىق جاعدايى, ەلىمىزدە ەرەكشە قورعاۋعا الىنعان نىساندار تىزىمىنە كىرەتىن تابيعي-تاريحي ەسكەرتكىشتەر بار. بۇل وڭىردە ءتۋريزمنىڭ بىرنەشە ءتۇرىن دامىتۋعا مۇمكىندىك بەرەدى, الايدا, كاسىپكەرلەر ءوز ءيميدجىن جاساعانشا ءبىراز قارجى شىعارۋعا, ىزدەنىسپەن جۇمىس جاساۋعا قورقاقتايدى. بۇل تۇسىنىكتى, ارينە. دەگەنمەن, قول قۋىسىرىپ قاراپ وتىرعانىمىز جوق. ءتۋريزمنىڭ تۇعىرىن بەكىتەتىندەي بەلسەندى جۇمىستار جۇرگىزىلۋدە. ونىنشى رەت وتكىزىلىپ وتىرعان ءداستۇرلى تۋريستىك حالىقارالىق كورمەگە بيىل ەلىمىزدىڭ بەس وبلىسى قاتىستى. تۋريستىك فيرمالار, قوناق ءۇي جانە مەيرامحانالىق بيزنەس, كولىكتىك جانە ساقتاندىرۋ كومپانيالارى, دەمالىس بازالارى, تۋريستىك جانە سپورتتىق جابدىقتار وتكىزۋشى كاسىپورىندار, مۇراجايلار, تۋريزم ماماندارىن دايارلايتىن وقۋ ورىندارى كورمەگە ەكسپوناتتار بولدى. كورمە اياسىندا «شەبەرلەر اۋىلى» حالىق قولونەر شەبەرلەرىنىڭ رەسپۋبليكالىق فەستيۆالىن وتكىزۋ داستۇرگە اينالدى. وبلىستا كادەسىي, قولونەر بۇيىمدارىن شىعارۋدا دا ىزدەنىس كوپ, يگىلىگى دە كورىنۋدە. ولكەنىڭ تۋريستىك الەۋەتىن ارتتىرۋ, جاڭا تۋريستىك مارشرۋتتاردى اشۋ ماقساتىندا جىل سايىن ءباسپاسوز تۋرى ۇيىمداستىرىلۋدا. سونىڭ ناتيجەسىندە وبلىس حالقى ايماقتىڭ تاماشا تابيعاتىمەن, اسەم جەرلەرىمەن, تاريحي ەسكەرتكىشتەرىمەن, تۋريستىك مۇمكىندىكتەرمەن تەرەڭىرەك حاباردار بولا ءتۇستى. بۇل ءوز كەزەگىندە ىشكى ءتۋريزمدى دامىتۋعا العىشارت جاسايدى دەپ ويلايمىز. ال, سول جەرلەردەن تۇسىرىلگەن جارنامالىق ماتەريالداردى تۋريستىك كورمەلەردە ۇسىنۋ ارقىلى سىرتتان تۋريستەر تارتۋعا, ولاردىڭ ءبىزدىڭ وڭىرگە دەگەن قىزىعۋشىلىعىنا ىقپال ەتەدى. بىلتىر بۇل ماقساتقا 18 ميلليون تەڭگە قارجى بولىنسە, بيىل دا وسى شامادا قارجى قاراستىرىلدى. ياعني, بۇل باعىتتاعى جۇمىستار جالعاسىن تابادى, دەيدى ول.
راس, وبلىستا ىشكى ءتۋريزمدى دامىتۋدىڭ قادامدارى جاسالۋدا. سەگىز تۋريستىك مارشرۋت اشىلعان. قازىر كەلگەن تۋريستەرگە كونە كوكجار جارمەڭكەسىن, ابات بايتاق , قوبىلاندى باتىر كەسەنەلەرىن, حرومتاۋ اۋدانىنداعى ايدارلى اشا تابيعي ەسكەرتكىشىن, ىرعىز اۋدانىنداعى جامانشىڭ قازانشۇڭقىرىن, بايعانين اۋدانىنداعى بورلى تاۋلاردى, مارتوك اۋدانىنداعى رەليكتتى ورمانداردى قانداي تۋريستەرگە دە ۇيالماي كورسەتۋگە بولادى. شەتەلدىكتەردىڭ نازارىن اۋدارۋعا تۇرارلىق بۇدان باسقا دا تابيعي جانە تاريحي ولكەلىك ەسكەرتكىشتەر جەتەرلىك.
اۋماعىندا سەكسەنگە جۋىق وزەن-كولدەر بار ىرعىز ءوڭىرى دە, «ىرعىز-تورعاي مەملەكەتتىك تابيعي رەزەرۆاتى» دا ەكولوگيالىق تۋريزمگە سۇرانىپ تۇر دەسە بولادى. مۇنداي تۇمسا تابيعاتقا اسەرشىل شەتەلدىكتەردىڭ قىزىعاتىنى ءسوزسىز. قازىر وسى باعىتتا تۋريستىك مارشرۋت اشىلعان. بۇرىن جول ماسەلەسى قيىندىق كەلتىرەتىن, قازىر ول دا شەشىلگەن. ەندىگى ماسەلە قارجىلاندىرۋعا تىرەلىپ تۇرعان سىڭايلى.
وبلىستا قازىردىڭ وزىندە 40 تۋريستىك اگەنتتىكتەر مەن وپەراتورلار جۇمىس ىستەيدى. ولاردىڭ تەڭ جارتىسى ىشكى تۋريزممەن اينالىسادى. الايدا, تۋريستىك اگەنتتىكتەر مەن وپەراتورلار بارلىعى بۇرىننان قالىپتاسقان سىرتقى ءتۋريزمدى قولاي كورەدى. مۇنىڭ ءوزى ءبىزدىڭ ءالى دە ىشكى ءتۋريزمدى دامىتۋعا دەن قويماعانىمىزدى اڭعارتادى. بۇل سايىپ كەلگەندى تۋريزمنەن تۇسەتىن تابىستىڭ سىرتقا كەتىپ جاتقانىن كورسەتەدى. سوندىقتان قايتكەندە ىشكى ءتۋريزمنىڭ قۋاتىن ارتتىرۋ قاجەت. بۇل جايلى مۇددەلى ادامدار نە دەيدى, ەندى سولارعا ءسوز بەرەلىك.
– ءبىزدىڭ ءوڭىردىڭ تابيعي جاعدايى ەكوتۋريزمدى دامىتۋعا قولايلى. ەكوتۋريزم اسا ءبىر ەرەكشەلىكتى تالاپ ەتپەيدى ءارى تۇمسا تابيعاتقا قىزىعۋشىلىق تا باسىم. ءبىز قارجىلىق جاعدايىمىزدى سارالاي كەلە قالاعا جاقىن, تابيعاتى تاماشا قارعالى اۋدانىن تاڭدادىق. قارعالى وزەنىنىڭ بويىنان كەلۋشىلەرگە دەمالۋعا ىڭعايلى قوناق ۇيلەر سالۋدى دۇرىس دەپ تاپتىق. وزەن جاعاسىنان اعاشتان شاعىن قوناق ۇيلەر سالۋدى ويلاستىرۋدامىز. بۇل جەردە دەمالۋدىڭ ءوز ارتىقشىلىقتارى بار. تۇرعىندار مەن قالا قوناقتارى وتباسىلارىمەن نەمەسە دوستارىمەن كەلىپ قوناقجايلاردىڭ بىرىنە ورنالاسادى, ەركىن تىنىعادى. كورشىلەس وزبەكستاندا اگروتۋريزم جاقسى دامىعان. بۇل ەلدە اگروتۋريزم پايدا تابۋدىڭ قوسىمشا كوزى عانا ەمەس, سونىمەن بىرگە قوسىمشا جۇمىس ورنىن قالىپتاستىرۋدىڭ ءتيىمدى جولى بولىپ وتىر. ءبىز وسى ماقساتتا اۋىلدىق جەرلەرگە بارىپ, تۇرعىنداردى تۋريستەردى قابىلداۋعا تارتۋ جاعىن قاراستىرۋدامىز. تۇرعىندار ەشقانداي ءومىر قالپىن وزگەرتپەي تۋريستەردى ءوز ۇيلەرىندە قابىلداي الادى. ارينە, تەگىن ەمەس, اقىلى, دەيدى «زەرە تۋر» تۋريستىك اگەنتتىگىنىڭ ديرەكتورى بوتاگوز قرامباەۆا. ول سونداي-اق, جازدا كيىز ۇيلەر تىگىپ, ءىشىن ۇلتتىق جيھازدارمەن جابدىقتاۋدى قولعا الاتىنىن ايتتى. ونىڭ ايتۋىنشا, شەتەلدىكتەردى ەۋروديزاين قىزىقتىرمايدى, ونى ولار كۇندە كورىپ ءجۇر, ولار ۇلتتىق, ەتنوستيلدەگى قوناق ۇيلەردە دەمالۋعا قۇمار. ءبىز بارىنە ۇلتتىق سيپات بەرگىمىز كەلەدى, دەيدى بوتاگوز قرامباەۆا ءسوز اراسىندا.
وتكەن جىلى ەلىمىزدىڭ وزگە وڭىرلەرىنەن 600 ادام, شەتەلدەن 60 ادام وسىندا تىنىعىپ قايتىپتى. بۇل ۇلكەن ءىستىڭ باستاۋى دەسە دە بولعانداي.
بوتاگوز قرامباەۆانىڭ ويىنشا, وبلىستا ءتۋريزمدى دامىتۋدىڭ مۇمكىندىكتەرى مول. تەك سونى ءتيىمدى پايدالانا ءبىلۋ كەرەك. سونداي-اق, تۋريستىك ينفراقۇرىلىمدى دامىتۋ ءۇشىن, سەرۆيستىك قىزمەتتەردىڭ ساپالىلىعى مەن قولجەتىمدىلىگىن قامتاماسىز ەتۋ ءۇشىن ۇكىمەتتەن قارجىلاي قولداۋ دا قاجەت. وسى شارۋامەن اينالىسۋعا نيەتتەنگەندەرگە كەپىلسىز, ءوسىمسىز نەسيە بەرۋ ماسەلەسى شەشىلسە دەگەن تىلەگىن دە جەتكىزدى.
ال, «قوس شىنار» ءاليا-مانشۇك اتىنداعى اقتوبە قالالىق قايىرىمدىلىق قورى قوعامدىق بىرلەستىگىنىڭ توراعاسى عالىمجان بايدەربەسوۆ وتكەن جىلى «قوبدا – باتىرلار ولكەسى» مارشرۋتى بويىنشا جۇمىس جاساعانىن, 1 مىڭعا جۋىق وقۋشىلاردى ابات-بايتاق, قوبىلاندى باتىر كەسەنەلەرىمەن, ءاليا مولداعۇلوۆانىڭ تۋعان اۋىلىمەن تانىستىرۋدىڭ ءساتى تۇسكەنىن ايتا كەلىپ, جول بويىنداعى تاماقتاندىرۋ قىزمەتىنىڭ جولعا قويىلماعانىن سىنعا الدى. بۇل باعىتتا, شۇكىر, جول تۇزەلدى, ەندىگى ماسەلە تىنىعاتىن جانە تاماقتاناتىن ورىنداردىڭ تاپشىلىعى بولىپ وتىر, دەيدى ول.
وڭىردە ءتۋريزمدى دامىتۋعا ەلەۋلى ۇلەس قوسىپ كەلە جاتقان ساقتاعان بايىشەۆ اتىنداعى ۋنيۆەرسيتەت دەۋ ورىندى بولماق. ماسەلەن, وبلىستا ىشكى تۋريزم الەۋەتىن كوتەرۋ ءۇشىن اۋىل ءتۋريزمىن دامىتۋ ماقساتىندا ويىل اۋدانىندا تۋريستىك بازا اشۋعا كەلىسىمشارت جاسالعان. الداعى ۋاقىتتا وسىندا تۋرفيرما اشۋ ءۇشىن ارنايى باعدارلاما دا دايىندالىپ جاتقان كورىنەدى. بۇل ولكەمىزدەگى ىشكى تۋريزم يندۋسترياسىن جۇزەگە اسىرۋعا ۇلەس قوسۋدىڭ بىردەن-ءبىر ۇلگىسى بولىپ وتىر.
ۋنيۆەرسيتەتتە بۇدان بەس جىل بۇرىن تۋريزم ماماندارىن دايارلايتىن ءبولىم اشىلىپ, بىلتىر 50 تۇلەك ءبىتىرىپ شىقسا, بيىل دا 50 تۇلەك ديپلوم الدى. «ەكونوميكا جانە تۋريزم» كافەدراسىنىڭ مەڭگەرۋشىسى رايگۇل سەرعاليەۆانىڭ ايتۋىنشا, وسى ماماندىق بويىنشا بىتىرگەن اۋىل بالالارى جۇمىس تابا الماي جۇرگەن كورىنەدى. بىراق, ۋنيۆەرسيتەت ءىس-قيمىلسىز وتىرعان جوق. ستۋدەنتتەردىڭ جۇمىسسىز قالماۋىنا ىقپال ەتۋ ماقساتىندا وبلىس اكىمدىگىمەن جانە تۋرفيرمالارمەن كەلىسىمشارت جاساسۋدا.
ال, وبلىستىق دەنە تاربيەسى, تۋريزم جانە سپورت باسقارماسى باسشىسىنىڭ ورىنباسارى عالىمجان كەنجەباەۆتىڭ مالىمدەۋىنشە, جوعارى وقۋ ورىندارىن بىتىرگەن تۇلەكتەردىڭ 80 پايىزىن جۇمىسقا ورنالاستىرۋعا قولداۋ كورسەتىلگەن. بۇل ارادا باسقارما مەن جوعارى وقۋ ورىندارىنىڭ اراسىندا بايلانىس جوقتىعى, السىزدىگى اڭعارىلادى.
وبلىس اۋماعىنان ۇزىندىعى 621 شاقىرىم «باتىس ەۋروپا – باتىس قىتاي» حالىقارالىق كولىك ءدالىزىنىڭ ءوتۋى دە ىشكى ءتۋريزمنىڭ دامۋىنا سەرپىن بەرەدى دەپ كۇتىلۋدە. وبلىس اكىمىنىڭ وكىمىمەن جول بويىنداعى كەشەندەردى ورنالاستىراتىن جەرلەردى انىقتاۋ جانە ولارعا ينجەنەرلىك-كوممۋنيكاتسيالىق ينفراقۇرىلىمدار قۇرۋ, كولىك ءدالىزى بويىندا جول بويى سەرۆيستىك نىساندار قۇرىلىستارىنىڭ جوبالارىن ىرىكتەۋ جانە كەلىسۋ جونىندەگى جۇمىس كوميسسياسى قۇرىلىپ, بۇل باعىتتاعى جۇمىستى باستاپ تا كەتتى. وتكەن جىلى حالىقارالىق تراسسا بويىنداعى سەرۆيس نىساندارىنا كەزەكتى مونيتورينگ جۇرگىزىلىپ, تالاپقا ساي كەلمەيتىن بولىگى جويىلدى, بەلگىلى ءبىر بولىگى قايتا جاراقتاندىرىلاتىن بولدى. سونىڭ ناتيجەسىندە ايتەكە بي اۋدانىندا – 16, ىرعىز اۋدانىندا 7 جارامسىز نىسان جويىلدى. ولار – جانار-جاعارماي ستانسالارى مەن شايحانالار.
جول بويىندا سەرۆيستىك نىساندار سالۋعا تاپسىرىس بەرگەن كاسىپكەرلەرگە جەر تەلىمدەرىن ءبولۋ باستالدى. اقتوبە قالاسىنىڭ سولتۇستىك اينالما جولى بويىنداعى «گرين لەند» دەمالىس بازاسىنىڭ ينجەنەرلىك ينفراقۇرىلىمىن تارتۋعا 2011 جىلى 128,2 ميلليون تەڭگە , وتكەن جىلى 32,5 ميلليون تەڭگە ءبولىندى. قازىر جول بويىنداعى سەرۆيستىك كەشەندەردى قۇرۋدىڭ شارالارى الىنۋدا, ساۋلەت-ديزاين كوركەمدەلۋىنە سايكەس جول بويىنداعى ينفراقۇرىلىم نىساندارىنىڭ تيپتىك جوبالارى جاسالۋدا. جول بويىندا ينفراقۇرىلىمدى قۇرۋ جانە دامىتۋدى ءۇش كاتەگوريا بويىنشا توپتاستىرۋ جۇرگىزىلۋدە.
وسىنداي جوبانى «ەبيتا» مەملەكەتتىك زاكازنيگى دە جۇزەگە اسىرۋدا, زاكازنيكتە اشىلعان ءبىرىنشى مارشرۋتتا تۋريستەر تاريحي ورىندار – تابىن بوكەنباي اۋىلى, ۇندەمەس اۋىلى جۇرتىمەن, «قاسيەتتى قاقپا» اتانعان جەرمەن, باسقا دا تابيعاتتىڭ تاماشا ەسكەرتكىشتەرىمەن تانىسا الادى. قازىر بوكەنباي اۋىلىن سول كەزدەگىدەي قالپىنا كەلتىرۋ ءۇشىن ينۆەستورلار ىزدەستىرىلۋدە
ءبىز قازاقستاندىق جانە رەسەيلىك ينۆەستورلاردىڭ كومەگىمەن ءبىرىنشى مارشرۋتتىڭ جوباسىن جاساۋدامىز. تەك وبلىستىق اكىمدىكتىڭ جەر تەلىمىن بولۋگە كومەگى قاجەت. سونداي-اق, ەكىنشى مارشرۋتتى انىقتاۋعا جانە ونى اشۋعا رۇقسات الۋ قاجەت, دەيدى «ەبيتا» جەرگىلىكتى ماڭىزدىلىقتاعى مەملەكەتتىك زاكازنيگىنىڭ اعا ينسپەكتورى ب.قۇلتاەۆ.
ءبىز اتقارىلعان شارۋ الاردى جوققا شىعارۋدان اۋلاقپىز. دەگەنمەن, وسى ماسەلەمەن اينالىسىپ جۇرگەندەردىڭ مالىمدەۋىنشە, وبلىستا ءتۋريزمدى دامىتۋ ءالى دە ۋاقىت تالابىنان تومەن. ءبىز اڭگىمەلەسكەن اقتوبە مەملەكەتتىك پەداگوگيكالىق ينستيتۋتى گەوگرافيا كافەدراسىنىڭ مەڭگەرۋشىسى, گەوگرافيا عىلىمدارىنىڭ كانديداتى گۇلنار كوبەسوۆا وبلىس اۋماعى تۋريستىك رەكرەاتسيالىق جاعىنان ءالسىز يگەرىلگەن دەگەن پىكىر ءبىلدىردى. ول وڭىردە سىرتقى ءتۋريزمنىڭ اناعۇرلىم دامۋى كاپيتالدىڭ سىرتقا كەتۋىنە ىقپال ەتىپ وتىرعانىن دا جاسىرمادى. تۋريستىك مۇمكىندىك ءالسىز پايدالانىلىپ وتىرعانىن, تۋريستىك ينفراقۇرىلىم دەڭگەيىنىڭ تومەندىگىن دە العا تارتتى.
– وڭىردە ءتۋريزمدى دامىتۋ ءۇشىن سالانى باسقارۋدىڭ وسى زامانعى جۇيەسىن قۇرۋ جانە ءتۋريزمدى دامىتۋدىڭ باسىم باعىتتارىن جانە ءتۋريزمنىڭ ماتەريالدىق بازاسىن دامىتۋدىڭ بىرلەسكەن باعدارلامالارىن جۇزەگە اسىرۋعا مۇددەلى باسقارۋ ورگاندارىنىڭ, كاسىپورىندار مەن فيرمالاردىڭ قىزمەتتەرىن ۇيلەستىرۋ قاجەت. اۆتوموبيل جولدارى بويىندا تۋريزم ينفراقۇرىلىمىن قۇرۋ جانە دامىتۋ دا كۇن تارتىبىندەگى ماسەلە. بايعانين, قوبدا, ىرعىز, ويىل اۋداندارىندا ەتنومادەني ورتالىقتار ۇيىمداستىرۋ, وزەن-كولدەر جاعاسىنان تۋريستىك اڭشىلىق ۇيلەر جەلىسىن دامىتۋ قاجەت. زاكازنيكتەر مەن تابيعي ەسكەرتكىشتەر اۋدانىندا سەرۆيستىك نىساندار قۇرۋ, قوناق ءۇي جەلىسىن دامىتۋ, تاريحي جانە مادەني ەسكەرتكىشتەردى قالپىنا كەلتىرۋ جانە قورعاۋ, تۋريستىك اقپاراتتىق ورتالىق قۇرۋ دا وسى باستان قولعا الىنۋى ءتيىس. سوندا عانا ءىس ىلگەرى باسادى, دەيدى گۇلنار كوبەسوۆا.
سونىمەن, وبلىستا ءتۋريزمدى دامىتۋدىڭ قازىرگى جاي-كۇيى وسىنداي. الداعى كۇندەرگە ىرگەتاس بولاتىن ىرگەلى ىستەردى وسى باستان قولعا الۋ قاجەت. تەز ارادا تابىستى بولا قويمايدى دەپ كەشەۋىلدەتۋگە استە دە بولمايدى. بۇعان وبلىستىڭ ەكونوميكالىق جانە تۋريستىك مۇمكىندىگى دە جەتەدى. ءتۋريزمنىڭ تۇعىرى بەرىك بولۋى ءۇشىن جاسالار شارۋالاردىڭ ءبىرسىپىراسىن عانا تىلگە تيەك ەتتىك. ال, الدا اتقارىلار ىستەر بۇدان دا قوماقتى بولارى ءسوزسىز.
ساتىبالدى ءساۋىرباي,
«ەگەمەن قازاقستان».
اقتوبە وبلىسى.