ەڭ جاقسى اۋەن كۇبىنىڭ پىسكەنى عوي.
وسكەمەندەگى سارسەن امانجولوۆ اتىنداعى شىعىس قازاقستان مەملەكەتتىك ۋنيۆەرسيتەتىندە ساتيريك, "ارا" جۋرنالىنىڭ باس رەداكتورى كوپەن امىربەكتىڭ 70 جاسقا تولۋىنا وراي «كوپەن اعا كەلە جاتىر..» اتتى كەزدەسۋ ءوتتى.
كەزدەسۋدى وقۋ ورنىنىڭ رەكتورى مۇحتار تولەگەن اشىپ: «جاستار ءسىزدى ۇزاق كۇتتى. ۋنيۆەرسيتەتىمىزدە وسىنداي كەشتەر ءجيى ءوتىپ تۇرادى. شىعىسقا قوش كەلدىڭىز» دەي كەلە ساتيريكتىڭ يىعىنا شاپان جاۋىپ, قۇرمەت كورسەتتى.
«بيىلعى 70 جىلدىعىمنىڭ اباي ەلىنەن, شىعىستان باستاۋ العانىنا قۋانىپ وتىرمىن» دەگەن كوپەن امىربەك كەزدەسۋ بارىسىندا بالالىق, ستۋدەنتتىك شاقتارى, ۇستازدارى, زامانداستارى تۋرالى اسەرلى اڭگىمەلەر ايتتى. بۇل كىسىنىڭ كوپەن دەگەن اتىنىڭ قويىلۋىنىڭ ءوزى ءبىر تاريح ەكەن.
«كوپەن دەگەن ات وتە سيرەك. وسكەمەندە كوپەن دەگەن ءبىر اقىن بار. نۇرسۇلتان نازارباەۆ وسىدان 15 جىل بۇرىن كوپەن دەگەن پولكوۆنيككە گەنەرال اتاعىن بەردى. قاي جاقتان ەكەنىن بىلمەيمىن, تەلەديداردان كورىپ: «ويپىرماي, كوپەن دەگەن ەكەۋ ەدىك, گەنەرالمەن ۇشەۋ بولدىق» دەگەنىم ەسىمدە. كوپەن ەسىمىنىڭ شىعۋ ءمانىسى مىنادا. شەشەم 10 بالا تاپقان. التىن قۇرساق انا. ءۇش قىز, جەتى ۇل. تۇلا بويى تۇڭعىشى مەنمىن. اكە-شەشەم قويشى بولعان. سىردىڭ جاعاسىندا, قامىستىڭ اراسىندا وسكەنبىز. كيىز ۇيدە تۇردىق. كوبىنە ۇستىمىزدەگى كيىممەن جاتا سالاتىنبىز. مەكتەپ ءبىتىرىپ, الماتىعا كەلىپ, ستۋدەنت اتانعاندا پروستىنيا دەگەننىڭ نە ەكەنىن ءبىرىنشى رەت كوردىم. 17 جاسىمدا. شەشەم كيىز ءۇيدىڭ سىرتىندا كۇبى ءپىسىپ تۇرادى. ەڭ جاقسى اۋەن كۇبىنىڭ پىسكەنى عوي. كۇبىنىڭ پىسكەنى كۇيدىڭ باسى سەكىلدى. كەشكە تامان وتار قوي كەلەدى. قوزىلار جامىراپ, ءبىرى ماڭىراپ, ءبىرى اڭىراپ جاتادى. وركەستر سەكىلدى. ءبىز وسىنداي دالادا وستىك. راسۋل عامزاتوۆتىڭ ءبىر ءسوزى ەسكە تۇسەدى. «دۇنيەدەگى ەڭ جاقسى اۋەن قانداي؟» دەيدى. «قىزدىڭ كۇلكىسى». «جوق». «قوڭىراۋدىڭ سىڭعىرى». «جوق». «اتتىڭ ءدۇبىرى». «جوق». «بۇلبۇلدىڭ ءۇنى». «جوق». «سوندا ءسىز ءۇشىن قانداي اۋەن جاقسى؟» دەگەندە: «مەن ءۇشىن ەڭ كەرەمەت اۋەن مەنىڭ حازار (كاسپي) تەڭىزىمنىڭ تولقىندارىنىڭ ءبىر-بىرىنە سوعىلىپ, شۋلاعان تولقىندارىنىڭ ءۇنى. جاڭاعى ايتىلعان اۋەندەردىڭ بارلىعى سونىڭ ىشىنە كىرىپ تۇر» دەپتى جارىقتىق. سول سەكىلدى ءوز باسىم مالدىڭ اڭىراعانىنان, قوزىنىڭ جامىراعانىنان ارتىق اۋەن كورمەدىم. اتىمدى كوپەن دەپ اجەم قويعان. 9 جاسىمدا قايتقان ەكەن ول كىسى. كوپەن دەگەن اتتىڭ نە ماعىنا بەرەتىنىن ەلۋگە تاياعاندا تاپتىم. كىتاپتان. كوپەن دەگەن ءشوپ بار ەكەن. سويتسەم, باياعى زاماندا بابالارىمىز شالعى وراقپەن ءشوپ شاپقاندا ءبىر قاتاردى كوپەن دەپ اتاعان ەكەن. 10 كوپەندى جيناعاندا 1 كوپەنە, 10 كوپەنەنى جيناعاندا 1 شومەلە, 10 شومەلە 1 مايا بولادى ەكەن» دەدى ساتيريك.
وسكەمەن