بۇگىندە جامبىل وبلىسىندا مەملەكەتتىك ورمان قورىنىڭ جالپى اۋدانى شامامەن 4,5 ميلليون گەكتاردى قۇرايدى. ورمانمەن كومكەرىلگەن 2 ميلليون گەكتار القاپ بار. ونىڭ ىشىندە سەكسەۋىلدىكتەر 1,1 ميلليون گەكتار جەردى الىپ جاتىر. قازىرگى تاڭدا مەملەكەتتىك ورمان قورىن تىكەلەي كۇزەتۋمەن 14 مەملەكەتتىك ورمان شارۋاشىلىعى مەكەمەسى اينالىسادى.
جامبىل وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسىنىڭ مالىمەتىنشە, وتكەن جىلى 129 رەيد ۇيىمداستىرىلعان. ناتيجەسىندە تابيعاتتى قورعاۋ زاڭناماسىن بۇزۋدىڭ 245 فاكتىسى اشىلعان. سونىمەن قاتار, وبلىستا زاڭسىز اعاش كەسۋدىڭ 17 دەرەگى انىقتالعان. ونىڭ ىشىندەگى 16 دەرەك سەكسەۋىل اعاشىن كەسۋگە بايلانىستى. جالپى شىعىن 295,3 مىڭ تەڭگەنى قۇراعان. بارلىق فاكتىلەر بويىنشا ماتەريالدار قۇقىق قورعاۋ ورگاندارىنا جولدانىپتى.
«وتكەن جىلى وبلىستا جالپى كولەمى 41,0 مىڭ گەكتارعا جۋىق 15 ورمان ءورتى وقيعاسى ورىن الدى. بارلىق ورمان ورتتەرى بويىنشا تەرگەۋ جۇرگىزىلدى. تەرگەۋ قورىتىندىسى بويىنشا 6 لاۋازىمدى تۇلعا جانە 3 ورمان پايدالانۋشى اكىمشىلىك جاۋاپكەرشىلىككە, 18 لاۋازىمدى تۇلعا تارتىپتىك جاۋاپكەرشىلىككە تارتىلدى. ونىڭ 2-ەۋى جۇمىستان شىعارىلدى», دەيدى ينسپەكتسيا باسشىسىنىڭ ورىنباسارى بولات اسامبەكوۆ.
سونىمەن قاتار, وتكەن جىلى 1731 گەكتار جەرگە ەكپە اعاشتارى وتىرعىزىلعان. الايدا, «قوسقۇدىق» ورمان پيتومنيگىندە سەكسەۋىل تۇقىمدارىن سەبۋ تەحنولوگياسى بۇزىلعان. سونداي-اق, مەركى, مويىنقۇم, قورداي اۋداندارىنداعى ورمان پيتومنيكتەرىندە ەكپە اعاشتارى ولگەن. سوندىقتان دا, اتالعان ينسپەكتسيا باسشىسىنىڭ ورىنباسارى بۇل پيتومنيكتەردە وتىرعىزۋ ماتەريالىنىڭ شىعۋى تومەن ەكەنىن ايتادى.
جامبىل وبلىسى