بۇل ءان بۇرىنعى اننەن وزگەرەك دەگەندەي, اقتوبەدە ابايدىڭ تۋعانىنا 175 جىل تولۋ قۇرمەتىنە وتكىزىلگەن كونتسەرت جانرلىق باعدارلاماسى جانە سينتەزدىك تۇتاستىعىمەن كورەرمەندەردى باۋراپ الدى. دانا ابايدىڭ ولەڭمەن بىرگە كۇي دە شىعارعانىن ەكىنىڭ ءبىرى بىلە بەرمەۋى مۇمكىن. ايرىقشا كونتسەرت اقىننىڭ «تورى جورعا» كۇيىمەن باستالۋى دا ونەر كەشىنىڭ تاقىرىپتىق ءمانى مەن مازمۇنىن اشىپ بەرگەندەي اسەر قالدىردى.
بۇدان كەيىن جالعاسقان « ۇلى دالا جۇيرىگى» اتتى ايتىس كونتسەرتتە اباي مۇرالارى ءححى عاسىردىڭ يگىلىگىنە دە قىزمەت جاساي بەرەتىندىگى جونىندە ادەمى وي-تۇيىندەر جاسالدى. بۇل تۇرعىدا اتىراۋلىق اقىن شالقارباي ءىزباساروۆ پەن اقتوبەلىك جىر سۇلەيى مارات احمەتوۆتىڭ تولعاۋعا تاتىرلىقتاي ويلى شۋماقتارى كورەرمەندەردىڭ كوڭىلىنەن شىققانى انىق بايقالدى.
دانىشپان اقىن: قۇلاقتان كىرىپ بويدى الار, اسەم ءان مەن ءتاتتى كۇي. كوڭىلگە ءتۇرلى وي سالار, ءاندى سۇيسەڭ مەنشە ءسۇي دەپ توگىلدىرە جىرلاعان ەمەس پە ەدى. اقتوبە وبلىسىنىڭ فيلارمونياسى ۇيىمداستىرعان كونتسەرتتە اسەم ءان دە, ءتاتتى كۇي دە, ءتىپتى بۇعان قوسا مىڭ بۇرالعان بي دە ءبىر-بىرىمەن الماسىپ قۇلاقتاردىڭ قۇرىشىن قاندىرا ءتۇستى. احمەت جۇبانوۆتىڭ كىشى وتانىندا دومبىرا قۇلاعىندا شەبەر ويناي الاتىن جاسوسپىرىمدەر دە وسى ايتىس-كونتسەرتتە ءوز ونەرلەرىن كورسەتتى. سونداي-اق, دومبىرامەن تارتىلىپ جۇرگەن قۇرمانعازىنىڭ «اداي», «بالبىراۋىن» جانە « بايجۇما» كۇيلەرىن سىرناي تارتىسقا ءتۇسىرىپ, تارتقان كەزدە دە كورەرمەندەردىڭ دەلەبەسى قوزىپ دۇركىن-دۇركىن قول شاپالاقتاپ وتىردى. بىرىنەن-ءبىرى شەبەرلىگى اسا تۇسكەن ونەر سايىسىندا ۇلتتىق رۋحىمىزدىڭ جالاۋى بيىككە كوتەرىلە تۇسكەندەي ءسات ەدى بۇل.
حالىقتىڭ ەجەلگى مۋزىكا اسپاپتارىنىڭ ءبىرى ۇرمالى اسپاپ داۋىلپاز دەسەك, ونىڭ جاۋىنگەرلىك رۋح پەن جوعارى پافوسقا تولى كۇمبىرلەگەن ءۇنى دە جۇرەكتەردى شىمىرلاتا تۇسكەندەي اسەر قالدىردى. داۋىلپازشىلار نۇرسۇلتان جەتپىسباەۆ پەن مەيىربەك مادەنوۆتەر ەجەلگى ۇرمالى اسپاپتى كەزەكتەسە ۇرعاندا زال ءىشى تەڭىزدەي تەربەلىپ كەتتى. مىنە, وسىلايشا اباي اتامىزدىڭ مەرەيلى داتاسىنا ارنالعان اسەم اندەردى ءداستۇرلى انشىلەر گۇلنازيرا ساعىنعانوۆا مەن ادىلەت كۇزەمباەۆ جانە نۇرلان ابدىبەكوۆ پەن دينارا شىنارباەۆالار اۋەلەتىپ الىپ كەتتى. كەش سوڭىندا فيلارمونيا ديرەكتورى ەلۋباي كەنجاليەۆ ابايدىڭ 175 جىلدىعىنا وراي ۇيىمداستىرىلعان اقتوبەدەگى ايرىقشا كونتسەرت وسى مەرەيلى داتاعا قوسىلعان ءبىر تامشى ۇلەس ەكەنىن اتاپ كورسەتتى.
اقتوبە
سۋرەتتە: ايتىس-كونتسەرتتەن كورىنىس