بيىلعى جىل – ەلىمىز ءۇشىن, ونىڭ ىشىندە مادەنيەت پەن ونەر سالاسىنىڭ وكىلدەرى ءۇشىن ماڭىزدى جىل. ۇلى كەمەڭگەر اباي قۇنانباي ۇلىنىڭ 175 جىلدىعىن, ءال ءفارابيدىڭ 1150 جىلدىعىن جانە التىن وردانىڭ 750 جىلدىعىن جوعارى دەڭگەيدە اتاپ ءوتۋ مادەنيەت سالاسىنىڭ مايتالماندارى ءۇشىن ماڭىزدى مىندەت. ايتۋلى داتالارعا بايلانىستى وڭىرلەردە اۋقىمدى شارالار باستالىپ تا كەتكەن. سونىڭ ءبىرى – ت.جۇرگەنوۆ اتىنداعى قازاق ۇلتتىق ونەر اكادەمياسى ۇيىمداستىرعان «مەن ءبىر جۇمباق اداممىن ونى دا ويلا...» اتتى ادەبي-سازدى كەش.
رۋحاني ءىس-شارا تولىعىمەن اباي ءومىرى مەن شىعارماشىلىعىنا ارنالعانىمەن ەرەكشە دەۋگە بولادى. وندا ۇلى ويشىلدىڭ وسىعان دەيىن كوپ ايتىلماعان اندەرى تىڭدارمانعا جول تارتىپ, اقىن شىعارمالارى جان-جاقتى دارىپتەلگەن.
ساحنالىق كورىنىستەرمەن شەبەر جىمداسقان ءساتتى كومپوزيتسيالار دانا اقىننىڭ وسيەتتەرىن وزگەشە ورنەكتەگەن. بۇل جەردە كورەرمەن تاراپىنان ىستىق ىقىلاسقا بولەنگەن ەرەكشە كەشكە ەلىمىزدىڭ ماڭدايالدى ونەر جۇلدىزدارى ات سالىسقانىن ايتا كەتكەن ءجون. ساكەن مايعازيەۆ, تولقىن زابيروۆا, رامازان ستامعازيەۆ, نۇرجان جانپەيىسوۆ, ايگۇل قوسانوۆا, ەرلان ءبىلال سىندى اتالعان وقۋ ورداسىنىڭ ۇستازدارى مەن مەن ستۋدەنتتەرى ءوز ونەرلەرىن ورتاعا سالا وتىرىپ, كەمەڭگەر تۇلعا كەلبەتىن بولاشاق جاستارعا كەرەمەت ناسيحاتتاي ءبىلدى.
ء«بىز تەك ونەر ادامى ەمەسپىز, ەلىمىزدىڭ بولاشاعى – جاستاردى ونەر مەن بىلىمگە قاتار باۋلىپ جۇرگەن بۋىنبىز. سول سەبەپتى اباي ءومىرى مەن شىعارماشىلىعى ءاربىر تالاپتى جاستىڭ, جاناشىر ۇلكەننىڭ اينىماس سەرىگىنە اينالۋى كەرەك. بۇل كەشتىڭ ورتاق مۇددەنى ورىنداۋدا, كەمەڭگەر مۇراسىنا تەرەڭ ءۇڭىلىپ, بولاشاق ۇرپاققا ۇلگى-ونەگە بەرۋ جولىندا ماڭىزى زور», دەگەن ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ رەكتورى اقان ابدۋاليەۆ بۇدان كەيىن دە اعارتۋشىنىڭ مەرەيتويىنا ارنالعان ءىس-شارالار جالعاسا بەرەتىنىن ايتتى. شاراعا قاتىسىپ, كورەرمەن قاتارىندا تاماشا كەشتىڭ كۋاسى بولعاندار دا جىلى لەبىزدەرىن جاسىرىپ قالمادى. تالعار اۋدانى, «توڭكەرىس» اۋىلىنىڭ تۇرعىنى, ۇستاز گۇلشارا مۇساباەۆا, اسىرەسە جاستار ءۇشىن مۇنداي كەشتەردىڭ ماڭىزى زور ەكەنىن جەتكىزدى. «اباي – بويىمىزداعى ارتىقشىلىقتى دا, كەمشىلىكتى دە قولمەن ۇستاتقانداي ەتىپ كورسەتىپ كەتكەن دانىشپان. تەك سودان ءتالىم الساق بولعانى. سونىڭ ۇلگىسىن وزىمىزگە باعىت ەتىپ الىپ, بولاشاعىمىزعا باعدار قىلساق, اداسپاسىمىز انىق. وسىنداي ادەبي كەشتەردەن, قويىلىمداردان بىلگەنىمىز بەكي تۇسەدى», دەيدى ۇلاعاتتى ۇستاز.
جوعارىدا ايتىپ كەتكەنىمىزدەي, اتالعان ءىس-شاراعا ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ وقىتۋشىلارى ءبىر كىسىدەي جۇمىلعان. ء«وزىمىز جاستاردى تاربيەلەپ, باعىت-باعدار بەرىپ وتىرعان ونەر ورداسى بولعاننان كەيىن, بۇل كەشتىڭ اۋقىمى دا, تاعىلىمى دا كەڭ بولدى دەپ ويلايمىن. ويتكەنى ابايدىڭ بەينەسىن سومداپ جۇرگەن, ابايدىڭ اندەرىن حالىققا جەتكىزىپ, ولەڭدەرىن وقىپ, قارا سوزىمەن سۋسىنداپ جۇرگەن ونەرپازداردى ءبىر ساحنادا بىرىكتىرىپ, كورەرمەنگە ۇلكەن رۋحاني ازىق سىيلادىق دەپ ويلايمىن. اسىرەسە جاس بۋىن, ستۋدەنتتەر ءۇشىن ۇلى ويشىلدى ۇلىقتاۋعا ارنالعان كەشتە ونەرىن ورتاعا سالۋى ارقىلى, ولاردى ونەرمەن تاربيەلەي الامىز دەر ەدىم», دەيدى اكادەميا وقىتۋشىسى, اكتەر ە.ءبىلال.
ءتۇيىپ ايتقاندا, ۇلى اقىنىن ۇلاعاتتاۋدا بىرەگەي ءبىلىم ورداسىنىڭ بۇل قادامىن حاكىم مۇرالارىنا دەگەن زور قۇرمەت دەپ تۇسىندىك. جالپى, مەرەيتويلىق كونتسەرتكە مىڭعا جۋىق كورەرمەن جينالدى.