بىرىككەن اراب امىرلىگىنىڭ Gulf News كۇندەلىكتى گازەتى الەمدەگى توپ-20 تۋريستىك باعداردى انىقتادى. بۇل تۋرالى مادەنيەت جانە سپورت مينيسترلىگىنىڭ ءباسپاسوز قىزمەتى حابارلادى.
بۇل رەيتينگتە ۇلكەن الماتى كولى ۇزدىك بەستىككە ەنگەن. سونداي-اق وسى قاتاردا يسلانديا, اۆستريا, تۇركيا, ءازىربايجان, گرۋزيا, ارمەنيا, ءۇندىستان مەن پاكىستاننىڭ كورىكتى جەرلەرى بار.
ايتا كەتەيىك, قازاقستان رەسپۋبليكاسىنىڭ ۇلتتىق ەكونوميكا مينيسترلىگى ستاتيستيكا كوميتەتىنىڭ مالىمەتىنشە 2018 جىلمەن سالىستىرعاندا 2019 جىلى ءباا-نەن ەلىمىزگە كەلەتىن تۋريستەر سانى 54%-عا ارتىپ, 8 100-گە جەتكەن.
Gulf News - دۋباي, بىرىككەن اراب امىرلىكتەرىندە اعىلشىن تىلىندە باسىلىپ شىعاتىن كۇندەلىكتى گازەت. العاشقى سانى 1978 جىلى جارىققا شىعىپ, بۇگىندە ءباا-عا, سونداي-اق پارسى شىعاناعىنىڭ باسقا ەلدەرىنە تاراتىلادى. ونىڭ عالامتورداعى باسىلىمى 1996 جىلى ىسكە قوسىلدى.