الماتى وبلىسىندا شەتەلدىكتەردى زاڭسىز جولمەن جۇمىسقا تارتىپ كەلگەن ەكى زاۋىت باسقارۋشىسى قولعا ءتۇستى. بۇل تۋرالى وبلىستىق ىشكى ىستەر دەپارتامەنتىنە سىلتەمە جاساي وتىرىپ BNews.kz ءتىلشىسى حابارلادى.
«الماتى وبلىسىندا ەكى كىرپىش شىعاراتىن زاۋىتتا شەتەلدىك ازاماتتار زاڭسىز تۇردە جۇمىسقا تارتىلعان. ول زاۋىتتار الماتى وبلىسىنداعى قاراساي جانە جامبىل اۋداندارىندا ورنالاسقان, قازىر ولاردىڭ قىزمەتى تەرگەۋگە بايلانىستى توقتاتىلدى», - دەدى ىشكى ىستەر دەپارتامەنتى ءباسپاسوز قىزمەتىنىڭ جەتەكشىسى كوبەيحان نۇراحمەت.
ونىڭ حابارلاۋىنشا, پوليتسيا زاۋىتتاردىڭ باسقارۋشىلارىن, ياعني جەرگىلىكتى تۇرعىن بولىپ تابىلاتىن ەكى ادامدى قولعا تۇسىرگەن.
«ولارعا قاتىستى قىلمىستىق ءىس قوزعالدى. ۇستالعان ازاماتتاردىڭ ءبىرى 20 شەتەلدىك ادامدى زاڭسىز جۇمىسقا تارتسا, ەكىنشىسى 3 ادامدى زاڭسىز جولمەن جۇمىس ىستەتكەن», - دەدى ول.
سۇلتان بوزايعىر.