قوستاناي وبلىسىنىڭ اۋليەكول اۋدانى امانقاراعاي كەنتىندە جاسى كامەلەتكە تولماعان قىزدى زورلادى دەگەن كۇدىكپەن پوليتسيا كاپيتانى قاماۋعا الىندى. بۇل تۋرالى «ناشا گازەتا» حابارلادى.
بولعان وقيعا جايىندا قوستاناي وبلىستىق ىشكى ىستەر دەپارتامەنتى قاۋىپسىزدىك باسقارماسىنىڭ باستىعى جاراسحان اقبەرديەۆ ينتەرنەت-ءماسليحاتتا ايتىپ بەردى.
«ۇستىمىزدەگى جىلعى 4 شىلدەدە اۋليەكول اۋدانىنداعى امانقاراعاي كەنتىندە ءوز قىزمەتىن اتقارىپ جۇرگەن پوليتسيا كاپيتانى, ۋچاسكەلىك ينسپەكتور تىرەك بەكەتىنە كەشكى ۋاقىتتا ەرەسەكتەردىڭ قاراۋىنسىز قالىپ قويعان ەكى كامەلەتكە تولماعان قىزدى الىپ كەلەدى. ول قىزداردى بولەك كابينالارعا ورنالاستىرادى. سولاردىڭ بىرەۋىن قورقىتىپ, زورلاپ جىبەرەدى. وسىعان بايلانىستى 6 شىلدەدە قىلمىستىق ءىس قوزعالدى. قازىر پوليتسيا كاپيتانى قاماۋدا وتىر», دەپ ءتۇسىندىردى ج.اقبەرديەۆ.
تاياۋ كۇندەردە قىلمىستىق ءىس سوتقا جولدانادى. پوليتسيا كاپيتانىنىڭ مۇندا كەزەكتەن تىس اتتەستاتتاۋدان كەيىن كەلگەنى دە بەلگىلى بولدى. ول بىلتىرعى جىلى وتكەن سىناقتان كەيىن اتالمىش ەلدى مەكەنگە وبلىستىق ىشكى ىستەر دەپارتامەنتى ەسىرتكى بيزنەسىنە قارسى كۇرەس باسقارماسىنان كەلگەن بولىپ شىقتى.
ايتقانداي, وسى كۇندەردە ونىڭ بۇرىنعى ارىپتەستەرىنىڭ بىرقاتارى ەسىرتكى ساۋداسىنا «قورعان» بولىپ جۇرگەنى ءۇشىن قولعا ءتۇسىپتى. جاقىن ارالىقتا ولاردىڭ دا ىستەرى سوتتا قارالادى.
قۇرىش نۇرىمبەت.