قورداي اۋدانىندا ورىن العان قاقتىعىس سالدارىنان قازا تاپقان ادامداردىڭ بۇگىندە سانى 11-گە جەتتى. جامبىل وبلىسى اكىمىنىڭ ءباسپاسوز حاتشىسى گۇلسارا مۇحتارقۇلوۆا ماسانچي اۋىلىنداعى ساۋدا ورتالىعىن تازارتۋ بارىسىندا ۇيىندىلەردىڭ اراسىنان جانىپ كەتكەن ادامنىڭ دەنەسى تابىلعانىن, بۇگىندە ءمايىتتىڭ جەكە باسىن انىقتاۋ ءۇشىن سوت-مەديتسينالىق ساراپتاماسى تاعايىندالىپ, جەدەل ىزدەستىرۋ شارالارى جۇرگىزىلىپ جاتقانىن مالىمدەدى.
الايدا, ادام تانىماستاي بولىپ ورتەنىپ كەتكەن ءمايىتتىڭ كىم ەكەنىن انىقتاۋ مۇمكىن بولماي جاتىر ەكەن.
قوردايداعى جاپپاي توبەلەس سالدارىنان 10 ادام قايتىس بولعان ەدى. ال, ورىن العان جانجالدان كەيىن قورداي اۋىلىنىڭ 20 جاستاعى تاعى ءبىر تۇرعىنىنىڭ جوعالىپ كەتكەنى تۋرالى اقپارات تاراعان بولاتىن. ونىڭ ورتەنىپ كەتكەن كولىگى تابىلعانىمەن, وزىنەن ءالى كۇنگە دەيىن حابار جوق.
دەگەنمەن, ەل اراسىندا ءتۇرلى بولجامدار ايتىلىپ جاتقانىمەن, كۇنى بۇگىنگە دەيىن ۇيىندىلەردىڭ استىنان تابىلعان ءمايىتتىڭ كىم ەكەنى انىقتالعان جوق.