اقپان ايىنىڭ 12-ءسى كۇنى ءتالتۇس شاماسىندا الماتى قالاسىنداعى №184 مەكتەپتە وقيتىن ءۇش بالانىڭ جوعالىپ كەتكەندىگى تۋرالى اقپارات تاراعان بولاتىن. جەتكىنشەكتەردىڭ مەكتەپكە كەتىپ, قايتىپ ورالماعانى حاقىندا العاشقى قوڭىراۋ الاتاۋ اۋداندىق پوليتسيا دەپارتامەنتىنە سول كۇنى كەشكى ساعات توعىزدار شاماسىندا تۇسكەن.
الماتى قالاسى اكىمىنىڭ تاپسىرماسى بويىنشا جۇمىس توبى قۇرىلىپ, ىزدەستىرۋ امالدارىنا قالانىڭ توتەنشە جاعدايلار قىزمەتى دە كىرىستى. بۇل اقپاراتتى Lider ەرىكتىلەر قوزعالىسى دا ءوزىنىڭ Instagram پاراقشاسىندا جاريا ەتىپ, بالالار امان-ەسەن تابىلسا دەگەن ۇمىتپەن ىزدەستىرۋ شارالارىنا قوسىلعان بولاتىن.
الماتى قالاسى تجد ءباسپاسوز قىزمەتىنىڭ مالىمەتى بويىنشا, 13 اقپان كۇنى تاڭعى ساعات 04.31-دە 112 پۋلتىنە الاتاۋ اۋدانى پوليتسيا باسقارماسىنىڭ جەدەل كەزەكشىسىنەن تەرەكتى شاعىن اۋدانىنىڭ جاساندى كوللەكتورىنىڭ جانىندا مەكتەپ ريۋكزاكتارى تابىلعانى تۋرالى حابارلاما كەلىپ تۇسكەن. وقيعا ورنىنا قر ءىىم تج كوميتەتى رەسپۋبليكالىق جەدەل-قۇتقارۋ جاساعىنىڭ سۇڭگۋىرلەرى جەدەل جۇمىلدىرىلعان. سۇڭگۋىرلەر ون ءۇش جاسار دەنيس مەلنيكوۆ, سابىر دۇيسەعاليەۆ جانە ۆاديم ءسيزوۆتىڭ دەنەسىن سۋدان الىپ شىقتى. ەكى كۇنگە جۋىقتاعان جەدەل ىزدەستىرۋ جۇمىستارىنىڭ اياعى قايعىلى جايتپەن اياقتالعانى بارشاعا اسپاننان جاي تۇسكەندەي اسەر ەتكەنى انىق.
بۇگىندە قر ءىىم مالىمەتتەرى بويىنشا ەلىمىزدە وتىزدان استام بالا جوعالعاندار تىزىمىندە تۇرسا, وتكەن جىلى 140-تان استام بالا ىزدەستىرىلىپ, وتباسىنا ورالعان. ماماندار بالالاردىڭ ۇيدەن كەتۋ سەبەپتەرىن كوپ جاعدايدا الەۋمەتتىك از قامتىلعان وتباسىلارداعى جاعدايلارمەن بايلانىستىرادى. الايدا تۇرمىس جاعدايى ءتاۋىر وتباسىلاردىڭ وزىندە دە بالالاردىڭ تومەن باعا العانى, مەكتەپتە ءتارتىپ بۇزعانى ءۇشىن اتا-اناسىنىڭ جازالاۋىنان قورقىپ, ۇيدەن كەتىپ قالاتىندارى تۋرالى دەرەكتەر از ەمەس. مۇندايدا كەيبىر جاعدايلاردىڭ اياعى سۋيتسيدپەن اياقتالىپ جاتادى.
بالا تاعدىرىنا قاتىستى جايتتاردىڭ باسى ءبىردى-ەكىلى سەبەپتەرمەن اشىلمايتىنى انىق. ونىڭ استارىندا الەۋمەتتىك ءھام قوعامدىق ماسەلەلەر جاتىر.
الماتى