دارىگەرلەر سوزىلمالى اسقازان-ىشەك اۋرۋلارىنا شالدىققانداردىڭ سانى كۇرت كوبەيىپ بارا جاتقانىنا بايلانىستى دابىل قاقتى. مامانداردىڭ ايتۋىنشا, ەلىمىزدە سوڭعى 5 جىلدا بالالار مەن جاسوسپىرىمدەردىڭ اسقازان-ىشەك اۋرۋلارىنا شالدىعۋى ءۇش ەسەگە ارتقان, دەپ جازادى Egemen.kz.
شىمكەنتتە وتكەن «اسقازان-ىشەك پاتولوگياسى بار كۇردەلى ناۋقاستار: ماماندىقتار توعىسىنداعى شەشىمدەر» اتتى رەسپۋبليكالىق عىلىمي-تاجىريبەلىك كونفەرەنتسياسىندا ماماندار سەمىزدىك ەرەسەكتەرگە عانا ءتان ەمەس, جاسوسپىرىمدەردە دە قالىپتى قۇبىلىسقا اينالىپ بارا جاتقانىن ءمالىم ەتتى. گاستريت پەن پانكرەاتيت, اسىرەسە, جاستاردا ءجيى كەزدەسەدى. ال اسقازانداعى اۋىرلىق سەزىم مەن ءىشتىڭ كەبۋى – ميلليونداعان ادامدار ءۇشىن ادەتتەگى جاعداي. اۋرۋشاڭدىقتىڭ باستى سەبەپتەرىنىڭ ءبىرى – دۇرىس تاماقتانباۋ. ياعني, «اۋرۋ – استان» ەكەنىن دەرتكە دياگنوز قويا المايتىن زاماندا-اق ايتىپ قويعان بابالاردىڭ ۇرپاعى بۇگىندە فاستفۋد پەن گازدالعان سۋسىندارعا شامادان تىس قۇمارتىپ, قورەك ەتىپ ءجۇر. مۇنىڭ سوڭى سەمىزدىك پەن قانت ديابەتى, اتەروسكلەروز, باۋىر پروبلەمالارى, جۇرەك-تامىر اۋرۋلارىنىڭ اسقىنۋىنا جانە ەندوكريندىك پروبلەمالارعا اكەلىپ سوعادى. دۇرىس تاماقتانباۋدىڭ سالدارىنان قاتەرلى ىسىككە شالدىعۋ دا جيىلەپ بارادى.
عالىمدار ونكولوگيالىق اۋرۋلاردىڭ الدىن الۋعا ارنالعان قوسپا ازىرلەپ جاتىر
«ەلىمىزدىڭ وڭتۇستىگىندە اسقازان-ىشەك جولدارى اۋرۋلارىنىڭ پاتولوگياسى بار ناۋقاستاردىڭ سانى كوپ. ەلىمىزدىڭ بىلىكتى دارىگەرلەرىن شىمكەنتكە شاقىرتىپ, اتالعان تاقىرىپتا رەسپۋبليكالىق كونفەرەنتسيا وتكىزۋىمىزدىڭ باستى سەبەبى دە وسى. بۇل باسقوسۋدا كاسىبي مامانداردىڭ وزەكتى تاقىرىپتاردا باياندامالارى تىڭدالدى. بۇل ءىس-شارانى الماتى مەن استانا قالاسىنىڭ جەتەكشى ماماندارى, گاستروەنتەرولوگيا سالاسىنداعى ساراپشىلار ءوڭىرىمىزدىڭ دارىگەرلەرىنە, ەلىمىزدىڭ باسقا قالالارىنان كەلگەن ارىپتەستەرىنە پايدالى اقپاراتتار ۇسىنىپ, تاجىريبە الماسۋى ءۇشىن ارنايى ۇيىمداستىردىق», دەيدى GastroMed گاستروەنتەرولوگيا كلينيكاسىنىڭ ديرەكتورى ءلاززات سىزدىقوۆا.
GastroMed گاستروەنتەرولوگيا كلينيكاسى قازاقستان گاستروەنتەرولوگتارىنىڭ اليانسى جانە وڭتۇستىك قازاقستان مەديتسينالىق اكادەمياسىمەن بىرلەسىپ ۇيىمداستىرعان گاستروەنتەرولوگيالىق كونفەرەنتسياعا ەلىمىزدىڭ 150-دەن استام ۇزدىك مامانى قاتىستى. ولار دەنساۋلىق ساقتاۋ سالاسىنداعى وزەكتى ماسەلەگە اينالعان سوزىلمالى اسقازان-ىشەك اۋرۋلارىنىڭ سەبەپتەرىن تالقىلاپ, الدىن الۋ ماقساتىندا تاجىريبە الماستى.
اۋرۋدىڭ الدىن الۋدىڭ ماڭىزى زور