2026 جىلعى 4 ساۋىردە اقتوبە قالاسىندا رەسپۋبليكالىق قوعامدىق بىرلەستىك «قازاقستان كينولوگتار وداعى» ۇيىمداستىرعان قازاقى تازى تۇقىمى بويىنشا تۇقىمدىق بايقاۋ ءوتتى, دەپ حابارلايدى Egemen.kz.
اقتوبەدەگى بۇل كۇن ەرەكشە جىلى دا اسەرلى ءوتتى. كوكتەمگى شۋاقتى اۋا رايى, قاتىسۋشىلار مەن ۇيىمداستىرۋشىلاردىڭ كوتەرىڭكى كوڭىل كۇيى, يەلەرىنىڭ ءوز يتتەرىنە دەگەن شىنايى ىقىلاسى ءىس-شاراعا ەرەكشە كورىك بەردى.
تۇقىمدىق بايقاۋعا تەك اقتوبە قالاسىنان عانا ەمەس, جاقىن ماڭداعى اۋىلداردان, ەلدى مەكەندەردەن جانە كورشىلەس قالالاردان دا يت يەلەرى مەن وسىرۋشىلەر كەلدى. جالپى 46 يت تىركەلىپ, سونىڭ 20-سى ماماندار تاراپىنان جوعارى باعالاندى.
ءىس-شارا بارىسىندا قازاقستان كينولوگتار وداعىنىڭ ساراپشىلارى يتتەردىڭ تۇقىم ستاندارتىنا سايكەستىگىن قاراپ, ولاردىڭ تۇقىمىن راستادى جانە ەسەپكە قويۋ ءۇشىن قاجەتتى قۇجاتتاردى راسىمدەدى.
قاتىسۋشىلاردىڭ اشىق اڭگىمەلەسىپ, سۇحبات بەرىپ, ءوز يتتەرى تۋرالى قۋانا ايتىپ, ولاردى كۇتىپ-باپتاۋ مەن ءوسىرۋ تاجىريبەسىمەن بولىسكەنى ەرەكشە قۋانتتى. كوپشىلىك ءۇشىن بۇل جاي عانا باعالاۋ ەمەس, ءوز سۇيىكتى تازىسىن كورسەتۋگە, تاجىريبە الماسۋعا جانە ورتاق ىسكە ۇلەس قوسۋعا جاقسى مۇمكىندىك بولدى.
تۇقىمدىق بايقاۋ يت يەلەرى ءۇشىن وتە پايدالى بولدى. ولار مامانداردان كاسىبي باعا الىپ, ءوز يتتەرىن اسىلتۇقىمدىق جۇيەگە ەنگىزۋگە مۇمكىندىك الدى, سونداي-اق الداعى اسىلداندىرۋ جۇمىسىنا قاتىستى ماڭىزدى مالىمەتتەر الدى.
وسىنداي ءىس-شارالار قازاقى تازىنى ساقتاۋ جانە دامىتۋ ءۇشىن وتە ماڭىزدى. ءدال وسىنداي جۇيەلى اسىلداندىرۋ جۇمىسى, يتتەردى ەسەپكە الۋ جانە جاۋاپتى ءوسىرۋ ارقىلى ۇلتتىق تۇقىمنىڭ بولاشاعى نىعايا تۇسەدى.
اقتوبەدە وتكەن تۇقىمدىق بايقاۋ قازاقى تازىعا دەگەن قىزىعۋشىلىقتىڭ جوعارى ەكەنىن تاعى ءبىر رەت كورسەتتى. بۇگىندە بۇل تۇقىمنىڭ اينالاسىنا بەلسەندى, جاناشىر جانە بەيجاي قارامايتىن يت يەلەرى, وسىرۋشىلەر مەن جانكۇيەرلەر جينالىپ كەلەدى.