ەلورداداعى «Barys Arena» سپورت كەشەنىندە Counter-Strike 2 بويىنشا PGL Astana 2026 حالىقارالىق ءتۋرنيرى باستالدى. وعان الەمدىك دەڭگەيدەگى 16 كوماندا قاتىسادى, دەپ حابارلايدى Egemen.kz.
جۇلدە قورى 1,6 ميلليون اقش دوللارىن قۇرايتىن ءتۋرنيردى PGL Esports SRL ۇيىمداستىردى. جارىسقا الەمدىك دەڭگەيدەگى 16 كوماندا قاتىسىپ جاتىر, ولاردىڭ اراسىندا Team Spirit, G2 Esports, FURIA Esports جانە Heroic بار. شاقىرىلعان قوناقتاردىڭ اراسىندا Counter-Strike بويىنشا الەم چەمپيونى داۋرەن قىستاۋباەۆ, FURIA Esports ويىنشىسى دانيل گولۋبەنكو, ستريمەر سلاۆا بۋستەر, PGL تۋرنيرلەرىنىڭ جۇرگىزۋشىسى James Banks, سونداي-اق الەم چەمپيونى گابريەل تولەدو بار. تۋرنير قازاقستان رەسپۋبليكاسى تۋريزم جانە سپورت مينيسترلىگى بەكىتكەن 2026 جىلعا ارنالعان تۋريستىك ءىس-شارالار كۇنتىزبەسىنە ەنگىزىلگەن.
ساراپشىلار الەمدىك اۋديتوريانىڭ كيبەرسپورتقا دەگەن قىزىعۋشىلىعىنىڭ ارتۋى اياسىندا قازاقستاندا مۇنداي ءىرى جارىستاردى وتكىزۋ استانانىڭ شەتەلدىك تۋريستەر ءۇشىن تارتىمدىلىعىن ارتتىراتىنىن اتاپ ءوتتى.
استانادا كيبەرسپورتتان الەمدىك دەڭگەيدەگى 16 كوماندا جارىسقا تۇسەدى
ەلورداعا ماسكەۋدەن ارنايى ۇشىپ كەلگەن كورەرمەندەردىڭ ءبىرى الەكساندر بەلوبۋح ءتۋرنيردىڭ ۇيىمداستىرىلۋ دەڭگەيىن جوعارى باعالادى.
«مەن استاناعا العاش رەت كەلىپ تۇرمىن. قازىر اڭ-تاڭ كۇيدە وتىرمىن اسىرەسە, جاستاردىڭ كيبەرسپورتقا دەگەن زور قىزىعۋشىلىعى قۋانتادى. بۇل كوپ جاعدايدا قازاقستاندا قازىر برازيليالىق FURIA Esports كلۋبىندا وينايتىن دانيل گولۋبەنكو سياقتى مىقتى ويىنشىنىڭ بولۋىمەن بايلانىستى بولسا كەرەك. شىنى كەرەك, ول جاستاردىڭ ناعىز كۋميرى جانە وعان ابدەن لايىقتى. گولۋبەنكو ساپالى ويىن كورسەتىپ, قازاقستاننىڭ نامىسىن الەمدىك ارەنادا لايىقتى قورعاپ ءجۇر. ءتۋريزمدى دامىتۋ تۇرعىسىنان بۇل ەلدىڭ ءوز برەندىن قالاي دامىتىپ, ۋاقىتپەن بىرگە كەلە جاتقانىن كورسەتەتىن تاماشا ۇلگى», دەپ اتاپ ءوتتى الەكساندر بەلوبۋح.
سپورت شولۋشىسى جانە ساراپشى نۇربولات جومارت وتانداستارىمىزدىڭ كيبەرسپورتتى دامىتۋعا بەلسەندى ارالاسۋىن ەسكەرە وتىرىپ, قازاقستاندا مۇنداي ءىس-شارالاردى وتكىزۋدى زاڭدىلىق دەپ سانايدى.
استانادا كيبەرسپورتتان حالىقارالىق تۋرنير ءوتىپ جاتىر
«وسىدان بىرنەشە جىل بۇرىن PGL استانادا تۋرنير وتكىزەدى دەگەنگە سەنۋ قيىن ەدى. الايدا ۇيىمداستىرۋشىلار تمد ەلدەرىندە Counter-Strike 2 وتە تانىمال ەكەنىن جانە مۇندا دا ۇزدىك ويىنشىلاردىڭ بار ەكەنىن كورىپ وتىر. سولاردىڭ ءبىرى – mo0N لاقاپ اتىمەن تانىمال ابدۋراحيم يسا. ول وتە مىقتى كيبەرسپورتشى جانە ونىڭ كومانداسى فينالعا جەتە الادى دەپ سەنگىم كەلەدى. دانيل گولۋبەنكو قازىردىڭ وزىندە تاجىريبەلى ويىنشى, ال تۋرنير يەسى رەتىندەگى تريبۋناداعى جانكۇيەرلەرىنىڭ قولداۋى ماڭىزدى ءرول اتقارۋى مۇمكىن. سوعان قاراماستان, تۋرنيردەگى باسەكەلەستىك وتە جوعارى, اسىرەسە Team Spirit تاراپىنان», دەپ باسا ايتتى ساراپشى.
تۋرنيرگە قاتىسۋشىلار دا PGL Astana 2026 وتكىزۋ وقيعالىق ءتۋريزمدى دامىتۋعا ىقپال ەتەتىنىن جانە استانانىڭ ءىرى كيبەرسپورتتىق ءىس-شارالاردى وتكىزۋگە ارنالعان حالىقارالىق الاڭ رەتىندەگى پوزيتسياسىن نىعايتاتىنىن اتاپ ءوتتى.