ميلليونداعان وقىرمانى بار قىتايلىق بلوگەر, Kazakh Tourism امباسسادورى تاو مينسيۋ مەملەكەت باسشىسىنىڭ اتىنان ءىى دارەجەلى «دوستىق» وردەنىمەن ماراپاتتالدى, دەپ حابارلايدى Egemen.kz مادەنيەت جانە اقپارات مينيسترلىگىنە سىلتەمە جاساپ.
جوعارى مەملەكەتتىك ناگرادانى وعان قازاقستان رەسپۋبليكاسى پرەمەر-ءمينيسترىنىڭ ورىنباسارى – مادەنيەت جانە اقپارات ءمينيسترى ايدا بالاەۆا تابىستادى.
ماراپات تاو ءمينسيۋدىڭ قىتاي مەدياكەڭىستىگىندە قازاقستاندى تانىتۋعا, ونىڭ مادەني مۇراسى مەن تۋريستىك الەۋەتىن ناسيحاتتاۋعا, سونداي-اق قازاقستان مەن قىتاي اراسىنداعى گۋمانيتارلىق بايلانىستاردى نىعايتۋعا قوسقان ۇلەسى ءۇشىن بەرىلدى.
ماراپاتتاۋ ءراسىمى بارىسىندا ايدا بالاەۆا تاو ءمينسيۋدىڭ ەكى ەل حالقى اراسىنداعى دوستىقتى نىعايتۋداعى ەڭبەگىنىڭ ماڭىزىن اتاپ ءوتتى.
ء«ىى دارەجەلى «دوستىق» وردەنى – بۇل قازاقستان مەن قىتاي اراسىنداعى دوستىق پەن گۋمانيتارلىق بايلانىستاردى نىعايتۋعا قوسقان ۇلەسىڭىزدىڭ جوعارى مەملەكەتتىك باعاسى. ءسىزدىڭ ەڭبەگىڭىزدىڭ ارقاسىندا ميلليونداعان ادام قازاقستاندى, ونىڭ باي مادەني مۇراسىن, كوركەم تابيعاتىن جانە تۋريستىك الەۋەتىن جاقىنىراق تانىدى», دەپ اتاپ ءوتتى ايدا بالاەۆا.
تاو مينسيۋ, سونداي-اق تاو تاو ەسىمىمەن دە تانىمال, قازاقستانعا العاش رەت 2024 جىلعى قىركۇيەكتە ارنايى شاقىرىلعان مەديا-ينفليۋەنسەر رەتىندە كەلگەن بولاتىن. سودان بەرى ول استانا, الماتى قالالارىندا, سونداي-اق اقمولا, الماتى, شىعىس قازاقستان جانە ماڭعىستاۋ وبلىستارىندا بولىپ, جيىنتىق قامتىلىمى 1 ميللياردتان اساتىن 100-دەن استام ماتەريال جاريالادى. 2025 جىلعى مامىردا وعان «قازاقستان ءتۋريزمىنىڭ ەلشىسى» قۇرمەتتى مارتەبەسى بەرىلدى. قازاقستانعا بەسىنشى ساپارى اياسىندا بلوگەر الماتى – اقتاۋ – تۇركىستان باعىتىمەن ساپارلاپ, امال جانە ناۋرىز مەرەكەلەرىنە ارنالعان ءىس-شارالارعا قاتىستى.
اقتۇتەك بوران كەزىندە ادامداردى قۇتقارعان مۇعالىم توسبەلگىمەن ماراپاتتالدى
قىتايلىق بلوگەردى ماراپاتتاۋ قازاقستان مەن قىتاي اراسىنداعى ىنتىماقتاستىقتىڭ كەڭ اۋقىمدى نىعايۋ ۇدەرىسىنىڭ ءبىر كورىنىسى. بۇگىندە ەكى ەلدىڭ قارىم-قاتىناسى جان-جاقتى ستراتەگيالىق ارىپتەستىكتىڭ بۇرىن-سوڭدى بولماعان جوعارى دەڭگەيىنە كوتەرىلدى. بۇل باعىتتا مەملەكەت باسشىسى قاسىم-جومارت توقاەۆ پەن قىتاي حالىق رەسپۋبليكاسىنىڭ توراعاسى سي تسزينپين اراسىنداعى دوستىق قاتىناستار ايرىقشا ءرول اتقارىپ, ەكىجاقتى بايلانىستاردى ودان ءارى تەرەڭدەتۋدىڭ بەرىك باعدارىن ايقىنداپ وتىر.
ىنتىماقتاستىقتىڭ نەگىزگى باعىتتارىنىڭ ءبىرى مادەني-گۋمانيتارلىق سالا بولىپ قالا بەرەدى. 2026 جىلى قازاقستان مەن قىتاي مادەنيەتىنىڭ توعىسپالى جىلى ءوتىپ جاتىر. بۇل باستاما تەاتر, كينو, كورمە قىزمەتى, كرەاتيۆتى يندۋستريالار جانە گاسترولدىك الماسۋلار سالالارىنداعى ءوزارا ىقپالداستىقتى كەڭەيتۋدىڭ ماڭىزدى الاڭىنا اينالدى.
ديحان قامزابەك ۇلى ءىى دارەجەلى «بارىس» وردەنىمەن ماراپاتتالدى
قول جەتكىزىلگەن ۋاعدالاستىقتاردىڭ ماڭىزدى ناتيجەلەرىنىڭ ءبىرى – بەيجىڭ قالاسىندا قازاقستاننىڭ مادەني ورتالىعىنىڭ اشىلۋى. بۇل – شەتەلدە اشىلعان العاشقى ءارى ازىرگە جالعىز قازاقستاندىق وسىنداي مەكەمە. ورتالىقتا قىتايدا قازاق مادەنيەتىن, ءتىلىن, ونەرى مەن تاريحىن ىلگەرىلەتۋدىڭ, سونداي-اق كورمەلەر, دارىستەر, كونتسەرتتەر, شەبەرلىك ساباقتارى مەن ءبىلىم بەرۋ باعدارلامالارى وتكىزىلەدى.
تۋريستىك ىنتىماقتاستىق تا قارقىندى دامىپ كەلەدى. 2024 جىلى قازاقستانعا قىتايدىڭ 655 مىڭ ازاماتى كەلسە, بىلتىر بۇل كورسەتكىش 968 مىڭ ادامعا جەتتى. بۇل باعىتقا 2026 جىلعى 29 ناۋرىزدا Air Astana اۋە كومپانياسى ىسكە قوسقان الماتى – شانحاي تىكەلەي اۋە رەيسى قوسىمشا سەرپىن بەردى. جاڭا باعىت ءتۋريزمدى, ىسكەرلىك بايلانىستاردى جانە گۋمانيتارلىق الماسۋلاردى دامىتۋعا قوسىمشا مۇمكىندىك اشادى.