وسى كۇندەرى اقش-تىڭ مايامي قالاسىندا دزيۋدودان كادەتتەر اراسىندا ءوتىپ جاتقان الەم چەمپيوناتىندا 55 كيلوعا دەيىنگى سالماقتا باۋىرجان جاۋىنتاەۆ (سۋرەتتە سولدان ساناعاندا ەكىنشى) التىن مەدالدى جەڭىپ الدى.
باۋىرجان الەمدىك دودانىڭ قۇرمەت تۇعىرىنا كوتەرىلگەن العاشقى قازاقستاندىق كادەت بولدى. ءبىرىنشى جەكپە-جەكتە ول تورەشىدەن ءبىر ەسكەرتۋ الىپ, پەرۋلىك پاتينو ۆيلاگرانى جەڭسە, كەلەسىسىندە ءبىرىنشى مينۋتتا-اق ۋكراينالىق كارو ءماراندياندى تازا ادىسپەن ءتۇسىرىپ, تىزە بۇكتىردى. باۋىرجان شيرەك فينالدا امەريكالىق ادونيس دياس پەن گرۋزين ەرەكلە ءارحوزاشۆيليدى يپپونمەن ۇتتى.
ءبىزدىڭ بالۋان ءۇشىن ەڭ قيىن كۇرەس 2011 جىلعى كادەتتەر اراسىنداعى الەم چەمپيوناتىندا كۇمىس جۇلدە ۇتىپ العان يتاليان ەليوس مانزيمەن بولدى. بۇل كەزدەسۋدە بەرىلگەن ءتورت مينۋتتا ايتارلىقتاي باسىمدىق تانىتا الماعان, ەكى سپورتشى تورەشىدەن ەسكەرتۋ الىپ, بەلدەسۋدى golden score قوسىمشا ۋاقىتتا جالعاستىردى. وسى كەزدە 44 سەكۋندتا مانزي ەكىنشى «شيدو» العان سوڭ, جەكپە-جەكتىڭ تاعدىرى باۋىرجاننىڭ پايداسىنا شەشىلدى.
چەمپيوناتتىڭ ءبىرىنشى كۇنگى قورىتىندىسى بويىنشا قازاقستاندىقتار تاعى ەكى سالماق دارەجەسىندە كوزگە ءتۇستى. قانات سەيىلحان 50 كيلوعا دەيىنگى سالماقتا جەتىنشى ورىندى, ءاديا سايىن 40 كيلوعا دەيىنگى سالماقتا بەسىنشى ورىندى يەلەندى.
الەم چەمپيوناتى 11 تامىزعا دەيىن سوزىلادى. وعان 79 ەلدەن 532 سپورتشى قاتىسۋدا.
كەشە 48 جانە 52 كيلو سالماقتاعى قىزدار مەن 60 جانە 66 كيلو سالماقتاعى جاسوسپىرىمدەر بەلدەستى.
داستان كەنجالين,
«ەگەمەن قازاقستان».