دەنساۋلىق ساقتاۋ ءمينيسترىنىڭ بۇيرىعىمەن 2018 جىلدان باستاپ تەگىن مەديتسينالىق كومەكتىڭ كەپىلدى كولەمى اياسىندا قىزمەت ەتەتىن بارلىق مەديتسينالىق مەكەمە تسيفرلى جۇيەگە كوشكەن بولاتىن. 121 ەسەپكە الۋ جانە ەسەپ بەرۋ فورماسىنىڭ 100-دەن اسا ءتۇرى تسيفرلاندىرىلدى. ناتيجەسىندە قاعاز بەن ۋدز پلەنكالارىنا قاجەتتىلىك جويىلىپ, سايكەسىنشە بيۋدجەت شىعىندارى قىسقاردى. ايتالىق, 2018 جىلى – 226 ملن تەڭگە, 2019 جىلى – 540,1 ملن تەڭگە ۇنەمدەلدى.
دەنساۋلىق ساقتاۋ سالاسىندا 100 پايىز مەمەلەكەت تاراپىنان قارجىلاندىرىلاتىن «امبۋلاتوريالىق دارىمەن قامتۋ» دەگەن تۇسىنىك بار. ياعني, مەملەكەت ەلىمىزدەگى ەمحانالار مەن اۋرۋحانالاردا مەديتسينالىق قىزمەت كورسەتۋ اياسىندا ديسپانسەرلىك ەسەپتە تۇرعان 3 ملن قازاقستاندىقتى (جىل سايىن 11 ملن-عا جۋىق رەتسەپت) قاجەتتى ءدارى-دارمەكپەن قامتاماسىز ەتۋ ءۇشىن جىل سايىن شامامەن 100 ملرد تەڭگە جۇمسايدى. بۇل تۇستا قانداي شارۋالار اتقارىلدى؟
مەديتسينالىق ماقساتتاعى بۇيىمدار مەن ءدارى-دارمەكتى ساتىپ الۋ تولىقتاي ەلەكتروندى فورماتقا اۋىستىرىلدى, ديسپانسەرلىك ناۋقاستاردى جەكە ەسەپكە الۋ مەن ەمدەۋ سحەمالارىن ينتەگراتسيالاۋ تولىعىمەن اۆتوماتتاندىرىلعان رەجىمگە كوشتى, وڭىرلەردەن قاعاز وتىنىمدەردى جيناۋدان دارىلىك زاتتاردى ديسپانسەرلىك ناۋقاستاردىڭ ناقتى قاجەتتىلىگى بويىنشا ناقتى ۋاقىت رەجىمىندە اۆتوماتتى قالىپتاستىرۋعا دەيىن ساتىپ الۋ پروتسەسىن ترانسفورماتسيالاۋ, ديسپانسەرلىك ەسەپتە تۇرعان ناۋقاستارعا ءدارىنى تاعايىنداۋ جانە ونى العانى جايلى SMS حابارلاما جىبەرۋ جۇزەگە اسىرىلا باستادى.
اتقارىلعان جۇمىس ناتيجەسىندە 2018 جىلى جالپى سومماسى 116,5 ملرد تەڭگە بيۋدجەتتىڭ 38 ملرد-ى ۇنەمدەلدى, ياعني 32,6%, ال 2019 جىلى جالپى سوماسى 92,6 ملرد تەڭگە بيۋدجەتتىڭ 22,1 ملرد-ى ۇنەمدەلدى, ياعني 23,9%.
البەتتە, بيۋدجەت قارجىسىن ۇنەمدەۋ نەگىزگى ماقسات ەمەس. دەنساۋلىق ساقتاۋ مينيسترلىگىنىڭ جۇيەلى ساياساتىنىڭ ناتيجەسىندە 2018 جىلى ۇنەمدەلگەن 38 ملرد تەڭگەنى قايتا قارجىلاندىرۋعا جۇمساۋ تۋرالى شەشىم قابىلداندى. ماسەلەن, 14,8 ملرد تەڭگە 2019 جىلى 180 مىڭ دارىگەر مەن ورتا ساناتتاعى مەديتسينالىق قىزمەتكەردىڭ جالاقىسىن 30 پايىزعا كوبەيتۋگە باعىتتالدى, 23 ملرد تەڭگە 2019 جىلى ساتىپ الىناتىن ءدارى-دارمەكتىڭ سانى مەن ءتۇرىن 15 پايىزعا ارتتىرۋعا باعىتتالدى.
2019 جىلى وڭتايلاندىرىلعان بيۋدجەت قارجىسى (22,1 ملرد تەڭگە) 2020 جىلى دارىگەرلەر مەن مەديتسينالىق قىزمەتكەرلەردىڭ جالاقىسىن قوسىمشا 30 پايىزعا كوبەيتۋگە جانە قىمبات دارىلەر ءتىزىمىن ارتتىرۋعا باعىتتالدى.