كەشە پرەمەر-مينيستر سەرىك احمەتوۆ قۇرىلىسشىلار كۇنىنە ارنالعان سالتاناتتى جينالىسقا قاتىستى. وندا ۇكىمەت باسشىسى قۇرىلىسشىلاردى كاسىبي مەرەكەلەرىمەن قۇتتىقتاپ, قۇرىلىس سالاسىنىڭ ءبىر توپ قىزمەتكەرلەرىنە ناگرادالار تاپسىردى.
كەشە پرەمەر-مينيستر سەرىك احمەتوۆ قۇرىلىسشىلار كۇنىنە ارنالعان سالتاناتتى جينالىسقا قاتىستى. وندا ۇكىمەت باسشىسى قۇرىلىسشىلاردى كاسىبي مەرەكەلەرىمەن قۇتتىقتاپ, قۇرىلىس سالاسىنىڭ ءبىر توپ قىزمەتكەرلەرىنە ناگرادالار تاپسىردى. سەرىك احمەتوۆ جينالىسقا قاتىسۋشىلارعا ارناعان سوزىندە مەملەكەت باسشىسى العا قويعان قازاقستاندى الەمدەگى ىرعاقتى دامۋشى ەلدەر قاتارىنا شىعارۋداعى مىندەتتەردى تابىستى ورىنداۋعا سالانىڭ قوسقان ۇلەسىن اتاپ كورسەتتى.
قۇرىلىس سالاسى مەملەكەت ەكونوميكاسىنىڭ ماڭىزدى قۇرامداستارىنىڭ ءبىرى. ونىڭ ىشكى جالپى ونىمدەگى ۇلەسى 6 پايىزدان استامدى قۇرايدى. كوپتەگەن جاعدايدا ءدال وسى قۇرىلىس قارقىنىنىڭ ءوسۋى ەلىمىزدىڭ دامۋى مەن ءال-اۋقاتىنىڭ ينديكاتورى بولىپ تابىلادى, دەدى پرەمەر-مينيستر ءوز سوزىندە.
بۇگىندە قۇرىلىسشىلار جۇمىسى ىرعاقتى العا باسۋىمەن جانە ەلدىڭ بۇكىل وڭىرلەرىندە قۇرىلىس كولەمىنىڭ ارتۋىمەن سيپاتتالادى. «قولجەتىمدى تۇرعىن ءۇي-2020» باعدارلاماسى شەڭبەرىندە وتكەن جىلى 6,7 ميلليون شارشى مەتردەن استام, ال ۇستىمىزدەگى جىلدىڭ ءبىرىنشى جارتىجىلدىعىندا 3 ميلليون شارشى مەتردەن استام تۇرعىن ءۇي پايدالانۋعا بەرىلدى.
2013 جىلى ارەندالىق تۇرعىن ءۇي قۇرىلىسىنا 27,5 ميلليارد تەڭگە, تۇرعىن ءۇي قۇرىلىس جيناق سالىمدارى جۇيەسى بويىنشا نەسيەلىك تۇرعىن ءۇي قۇرىلىسىنا 30 ميلليارد تەڭگەدەن استام قارجى قاراستىرىلعان.
تۇرعىن ءۇي قۇرىلىستارى ءجۇرىپ جاتقان اۋدانداردا ينجەنەرلىك-كوممۋنيكاتسيالىق ينفراقۇرىلىم سالۋعا رەسپۋبليكالىق بيۋدجەتتەن 40 ميلليارد تەڭگەدەن استام قارجى ءبولىندى.
بۇل ايتىلعانداردىڭ سىرتىندا, وتكەن جىلى «قيك» اق ارقىلى تۇرعىن ءۇي قۇرىلىسىنىڭ جاڭا باعىتتارى باستاۋ الدى. ونىڭ شەڭبەرىندە جىل سايىن شامامەن 500 مىڭ شارشى مەتر تۇرعىن ءۇي سالۋ جوسپارلانىپ وتىر.
تۇرعىن ءۇي قۇرىلىسىن ودان ءارى دامىتۋ ءۇشىن ەلدىڭ وبلىس ورتالىقتارىندا قازىرگى زامانعى ءۇي قۇرىلىسى كومبيناتتارىن ىسكە قوسۋ جوبالارى ازىرلەنۋدە. بۇل كومبيناتتار ءىرى پانەلدى جانە قۇراستىرمالى-قاڭقالى ءۇي قۇرىلىسى تەحنولوگياسىن پايدالانۋ ارقىلى قۇرىلىس مەرزىمدەرىن ايتارلىقتاي قىسقارتۋعا جانە پايدالانۋعا بەرىلەتىن تۇرعىن ءۇي كولەمىن ارتتىرۋعا جاعداي جاسايدى, دەدى س.احمەتوۆ.
وتكەن جىلى ءبىز قۇرىلىسقا بەرىلەتىن مەملەكەتتىك قۇرىلىس ليتسەنزياسىن كاتەگوريالاۋ ينستيتۋتىن ومىرگە اكەلدىك. ساراپشىلاردىڭ جوبالاۋ سالاسىنداعى, اۆتورلىق جانە تەحنيكالىق قاداعالاۋداعى دەربەس جاۋاپكەرشىلىگىن ەنگىزدىك, ول, ءسوز جوق, جوبالانعان جانە جۇرگىزىلىپ جاتقان قۇرىلىس-مونتاج جۇمىستارىنىڭ ساپاسىن ارتتىراتىن بولادى, دەگەن سەنىم ءبىلدىردى پرەمەر-مينيستر وسى ورايدا.
ۇكىمەت باسشىسى سونداي-اق قۇرىلىس سالاسى الدىندا تۇرعان بىرقاتار مىندەتتەردى دە اتاپ كورسەتتى. پرەمەر-ءمينيستردىڭ پايىمداۋىنشا, قۇرىلىسشىلار سالىنىپ جاتقان ۇيلەر مەن عيماراتتاردىڭ ساپاسىن ارتتىرۋعا, كوپتەگەن ماڭىزدى جوبالاردىڭ, سونىڭ ىشىندە, قازاقستاندى يندۋستريالىق-يننوۆاتسيالىق دامىتۋ جانە الەۋمەتتىك جاڭعىرتۋ شەڭبەرىندەگى جوبالاردىڭ ورىندالۋىن قامتاماسىز ەتۋگە بارىنشا كۇش-جىگەر جۇمساپ, سونىمەن بىرگە, قۇرىلىستاعى تەحنيكالىق رەتتەۋ جۇيەسىن رەفورمالاۋ, ەۋروكودتاۋ جانە باسقا دا حالىقارالىق ستاندارتتاردى ەنگىزۋ جونىندەگى جۇمىستاردى ودان ءارى جالعاستىرۋ قاجەت.
سەرىك احمەتوۆ قۇرىلىس كەشەنىنىڭ الەۋەتىن ارتتىرۋ جانە ونداعى قىزمەتكەرلەردىڭ جوعارى كاسىبيلىگى بولاشاقتا دا مەملەكەت باسشىسى العا قويعان مىندەتتەردى جۇزەگە اسىرۋدا تابىسقا جەتۋگە جاعداي جاسايدى دەگەن ءوز سەنىمىن ءبىلدىردى.
سالتاناتتى جينالىستا «قۇلاگەر» كومپانياسىنىڭ باسقارما ديرەكتورى گالينا ياششەنكو جانە «BI-Progect» كومپانياسىنىڭ ءبولىم باستىعى التىنبەك شاياحمەتوۆ قۇرىلىس سالاسى قىزمەتكەرلەرى اتىنان ءسوز سويلەدى.
سەيفوللا شايىنعازى,
«ەگەمەن قازاقستان».