قورداي اۋدانىندا ورىن العان وقيعاعا بايلانىستى ۇكىمەتتىك كوميسسيا مۇشەلەرى اۋقاتتى اۋىلىندا اۋداننىڭ قاراكەمەر, سورتوبە, اۋقاتتى, ماسانچي جانە بۇلار باتىر اۋىلدارىنىڭ اقساقالدارىمەن كەزدەسكەن بولاتىن. اۋىل اقساقالدارى, ارداگەرلەر كەڭەستەرىنىڭ توراعالارى, پارلامەنت دەپۋتاتتارى جانە ورتالىق مەملەكەتتىك ورگانداردىڭ باسشىلارى قاتىسقان جيىندا ماسەلەلەردى شەشۋ جولدارى قاراستىرىلىپ, قوعامدا تاتۋلىق پەن بىرلىكتى ساقتاۋ ماسەلەسى تالقىلانعان ەدى. ەڭ باستىسى – كەزدەسۋدە اۋىل اقساقالدارى اتالعان بەس ەلدىمەكەندى قامتيتىن بىرلەسكەن اقساقالدار كەڭەسىن قۇرۋ تۋرالى كەلىسىمگە كەلدى.
بۇگىن قورداي اۋدانى, سورتوبە اۋىلدىق مەشىتىندە اتالعان ماسەلەگە وراي جيىن ءوتىپ, ناتيجەسىندە «قوعامدىق كەلىسىم» كەڭەسى قۇرىلدى. جيىنعا اۋداننىڭ قاراكەمەر, اۋقاتتى, قاراساي, سورتوبە جانە ماسانچي اۋىلدارىنىڭ قاريالارى قاتىستى. ءوز سوزىندە جامبىل وبلىسى اكىمىنىڭ ورىنباسارى ەركەبۇلان داۋىلباەۆ اقساقالداردىڭ قوعامداعى ماڭىزدى ءرولىن ايتا كەلىپ, ەل ىشىندە بۇدان بىلاي تاتۋلىق پەن بىرلىكتىڭ ساقتالۋىنا اتالعان كەڭەستىڭ ىقپال ەتەتىنىنە سەنىم ءبىلدىردى. ال, قازاقستان مۇسىلماندارى ءدىني باسقارماسىنىڭ جامبىل وبلىسى بويىنشا وكىلى, وبلىستىق ورتالىق «ھيباتۋللا تارازي» مەشىتىنىڭ باس يمامى قانات جۇماعۇل ادامزاتتىڭ باستى قۇندىلىعى ارقاشان تاتۋلىق ەكەنىن, سونىمەن قاتار, مۇسىلمان قاۋىمىنا سەبەپسىز قان توگۋگە, ادامعا زالال كەلتىرۋگە بولمايتىنىن اتاپ ءوتتى. بۇدان كەيىن جامبىل وبلىسىنىڭ قۇرمەتتى ازاماتى تولە سۇگىرباي, وتەگەن باتىر اۋىلىنىڭ تۇرعىنى تۇرعان جاسىباەۆ, قورداي اۋداندىق ارداگەرلەر كەڭەسىنىڭ توراعاسى ءبىرجان الىمبەتوۆ جانە اۋدان اكىمىنىڭ ورىنباسارى بەيقۇت جامانگوزوۆ ەلدى سابىرلىلىققا, تاتۋلىققا شاقىردى. اۋداندا جاڭا قۇرىلعان «قوعامدىق كەلىسىم» كەڭەسى اتالعان اۋىلدارداعى تۇرمىستىق ماسەلەلەردىڭ ءبارىن بىرلەسىپ شەشەتىنىن ايتتى. سونىمەن قاتار يسحار يۋسۋپ ۇلى بولاشاقتا مۇنداي قاقتىعىستىڭ بولمايتىنىنا سەنىم ءبىلدىرىپ, اۋىل تۇرعىندارى اراسىندا بىرلىكتى كۇشەيتۋ كەرەكتىگىن جەتكىزدى.
العاشقى جيىنى ءوتىپ وتىرعان «قوعامدىق كەلىسىم» كەڭەسىنىڭ قۇرامىنا اتالعان اۋىلدىڭ اقساقالدارى كىرەتىن بولدى. كەڭەس الداعى ۋاقىتتاردا دا ەلدەگى تۇرمىستىق ماسەلەلەردى رەتتەپ, ەل ىشىندەگى تاتۋلىق پەن بىرلىكتى نىعايتۋعا بارىنشا كۇش سالاتىن بولادى.
جامبىل وبلىسى