بۇگىن ءماجىلىستىڭ ەكولوگيا ماسەلەلەرى جانە تابيعات پايدالانۋ كوميتەتىندە اۆاريالىق-قۇتقارۋ قىزمەتتەرىنىڭ جۇمىسىن رەتتەۋدىڭ پروبلەمالى ماسەلەلەرى جانە كوكتەم مەزگىلىندە ورىن الاتىن تاسقىننىڭ الدىن-الۋعا ارنالعان تاقىرىپتىق وتىرىس ءوتتى. بۇل تۋرالى پارلامەنت ءماجىلىسىنىڭ ءباسپاسوز قىزمەتى حابارلادى.
جيىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ونەركاسىپتىك قاۋىپسىزدىك ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسى زاڭىنىڭ جوباسىن قاراۋ شەڭبەرىندە قازاقستان رەسپۋبليكاسىندا اۆاريالىق-قۇتقارۋ قىزمەتتەرىنىڭ جۇمىسىن رەتتەۋدىڭ پروبلەمالى ماسەلەلەرى تۋرالى جانە 2020 جىلدىڭ كوكتەم كەزىندە تاسقىن قاۋىپ-قاتەرلەردىڭ الدىن الۋ جانە جويۋ بويىنشا قىزمەتتەردىڭ دايىندىعى ماسەلەلەرى قارالدى.
وتىرىستا ءماجىلىس دەپۋتاتى ب. حامەنوۆا بۇگىنگى تاڭدا زاڭ جوباسىنىڭ تانىستىرىلىمى جانە جۇمىس توبىنىڭ 7 وتىرىسى وتكىزىلىپ, زاڭ جوباسىن تالقىلاۋ بارىسىندا ەلىمىزدە جۇمىس ىستەيتىن اۆاريالىق-قۇتقارۋ قىزمەتتەرىنىڭ قىزمەتىن قۇقىقتىق رەتتەۋ, ولاردىڭ مارتەبەسى ماسەلەلەرى جانە وسى سالاداعى باسقا دا پروبلەمالار دەپۋتاتتار مەن جۇمىس توبى مۇشەلەرىنىڭ ەرەكشە قىزىعۋشىلىق تۋعىزعانىن اتاپ ءوتتى.
سونىمەن قاتار ب. حامەنوۆا زاڭ جوباسىندا ونەركاسىپتىك قاۋىپسىزدىك سالاسىنداعى كاسىبي اۆاريالىق-قۇتقارۋ قىزمەتتەرى ورىندايتىن جۇمىس تۇرلەرى ناقتىلانعانىنا توقتالدى. ولار – تاۋ-كەن قۇتقارۋ, گازدان قۇتقارۋ, بۇرقاققا قارسى جۇمىستار.
دەپۋتاتتار اۆاريالىق-قۇتقارۋ قىزمەتتەرىنە قاتىستى نورمالاردى جاقسارتۋ جانە ناقتىلاۋ بويىنشا ۇسىنىستار ەنگىزگەن. قازىر بۇل ۇسىنىستار جۇمىس توبىنىڭ وتىرىستارىندا تالقىلانۋدا جانە ۋاكىلەتتى ورگان – يندۋستريا جانە ينفراقۇرىلىمدىق دامۋ مينيسترلىگىمەن بىرلەسە وتىرىپ پىسىقتالۋ ۇستىندە.
بۇگىنگى تاڭدا 80 جىلدان استام ۋاقىت بۇرىن قۇرىلعان قازاقستانداعى ەڭ كونە اۆاريالىق-قۇتقارۋ قىزمەتتەرىنىڭ ءبىرى وسى مينيسترلىكتىڭ يندۋستريالىق دامۋ جانە ونەركاسىپتىك قاۋىپسىزدىك كوميتەتىنىڭ كاسىبي اسكەريلەندىرىلگەن اۆاريالىق-قۇتقارۋ قىزمەتى 2018 جىلدىڭ سوڭىندا «كاسىبي اسكەريلەندىرىلگەن اۆاريالىق-قۇتقارۋ قىزمەتتەرىنىڭ رەسپۋبليكالىق ورتالىق شتابى» جاۋاپكەرشىلىگى شەكتەۋلى سەرىكتەستىگىنە ساتىلعان.
مەملەكەتتىك مەنشىكتى ساتىپ الۋ جۇزەگە اسىرىلدى. وسىلايشا, اۆاريالىق-قۇتقارۋ قىزمەتتەرى باسەكەلەس ورتاعا بەرىلگەن. وسىعان سايكەس, دەپۋتاتار ۋاكىلەتتى ورگاندارمەن جوعارىدا اتالعان زاڭ جوباسى تۇرعىسىنان كاسىبي اۆاريالىق-قۇتقارۋ قىزمەتتەرىنىڭ جاي-كۇيى مەن پروبلەمالىق ماسەلەلەرىن تالقىلادى.
وتىرىس بارىسىندا ىشكى ىستەر ءمينيسترىنىڭ ورىنباسارى يۋ.يلين دەپۋتاتتار الدىندا ازاماتتىق قورعاۋ مەملەكەتتىك جۇيەسى باسقارۋ ورگاندارىنىڭ, كۇشتەرى مەن قۇرالدارىنىڭ سۋ تاسقىنى كەزەڭىنە دايىندىعىنا توقتالدى. اتاپ ايتقاندا, اعىمداعى جىلى «قازگيدرومەت» رمك الدىن الا كونسۋلتاتيۆتىك بولجامىنا سايكەس, اقمولا, شىعىس قازاقستان, قاراعاندى, قوستاناي, پاۆلودار, سولتۇستىك قازاقستان وبلىستارىندا جانە نۇر-سۇلتان قالاسىندا سۋ تاسقىنىنا بايلانىستى قاۋىپتەر بار.
ەلدى مەكەندەردى كوكتەمگى سۋ تاسقىنىنان قورعاۋ ءۇشىن «2017-2020 جىلدارعا ارنالعان سۋ تاسقىنى قاۋىپ-قاتەرلەرىنىڭ الدىن الۋ جانە ولاردى جويۋ بويىنشا شارالار كەشەنى» جول كارتاسى جۇزەگە اسىرىلۋدا, وندا 521 ءىس-شارانى ورىنداۋ كوزدەلگەن. ءۇش جىل ىشىندە جول كارتاسىنىڭ ءىس-شارالارىن ىسكە اسىرۋ 1046 ەلدى مەكەننىڭ 724-ءى ءۇشىن قاۋىپ-قاتەردى ازايتۋعا مۇمكىندىك بەردى.
2017-2019 جىلدار ارالىعىندا 515 شاقىرىم قورعاۋ بوگەتتەرى مەن بىلىكتەرى سالىندى, 508,1 شاقىرىم قورعاۋ قۇرىلىستارى جوندەلدى, 537,1 شاقىرىم سۋ تاسقىنى قاۋپى بار وزەن ارنالارىن جاعالاۋدى بەكىتۋ, ءتۇبىن تەرەڭدەتۋ جانە تۇزەتۋ بويىنشا جۇمىستار جۇرگىزىلدى.
سۋ تاسقىنى جاعدايىنىڭ ىقتيمال اسقىنۋىنا دەن قويۋ ءۇشىن اۆاريالىق-قۇتقارۋ بولىمشەلەرىنىڭ كۇشتەرى مەن قۇرالدارىنىڭ توبى قۇرىلدى. وسىعان سايكەس, حالىقتى حاباردار ەتۋ ماسەلەلەرى دە پىسىقتالعان.