كەزدەسۋ بارىسىندا ماعزۇم مىرزاعاليەۆ مينيسترلىك جۇمىسىنىڭ نەگىزگى باعىتتارى بويىنشا مەملەكەت باسشىسى بەرگەن تاپسىرمالاردىڭ ورىندالۋ بارىسى تۋرالى ەسەپ بەردى. بۇل تۋرالى اقوردانىڭ ءباسپاسوز قىزمەتى حابارلادى.
قازاقستان پرەزيدەنتىنە ەكولوگيالىق كودەكستىڭ ازىرلەنۋ بارىسى جونىندە مالىمەت بەرىلدى. ءمينيستردىڭ ايتۋىنشا, كودەكستىڭ جوباسىن دايىنداۋ كەزىندە جۇرتشىلىقتىڭ پىكىرى مەن ەكونوميكالىق ىنتىماقتاستىق جانە دامۋ ۇيىمىنا مۇشە ەلدەردىڭ وزىق تاجىريبەلەرى ەسكەرىلىپ, پارلامەنت قاراۋىنا ەنگىزىلگەن.
سونىمەن قاتار ماعزۇم مىرزاعاليەۆ قاسىم-جومارت توقاەۆقا سۋ رەسۋرستارىن باسقارۋ جانە گەولوگيالىق بارلاۋدىڭ جاڭا مەملەكەتتىك باعدارلامالارىن ازىرلەۋ جۇمىستارى تۋرالى باياندادى.
مەملەكەت باسشىسى مينيسترگە ءتيىستى باعدارلامالاردى دايىنداۋ بارىسىندا ەلىمىزدەگى سۋ قاۋىپسىزدىگىنىڭ بارلىق اسپەكتىلەرىن مۇقيات تالداۋدى تاپسىردى. سونداي-اق گەولوگيالىق بارلاۋ سالاسىنا شەتەلدىك ينۆەستورلاردى تارتۋدىڭ ماڭىزدىلىعىن ايتتى.