جۋىردا سولتۇستىك قازاقستاندا ايماقتىق «اتامەكەن» كاسىپكەرلەر پالاتاسىنىڭ ەسەپتى كەزدەسۋى بولىپ ءوتتى. قازىر وڭىردەگى شوب سۋبەكتىلەرىنىڭ جەمىستى ەڭبەك ەتىپ جاتقانى سونداي, بىلتىرعى جىلدىڭ سالىق تۇسىمدەرىنىڭ 56 پايىزى وسىلاردىڭ ۇلەسىندە بولعان.
«اتامەكەن» كاسىپكەرلەردىڭ ۇلتتىق پالاتاسىنىڭ قولداۋىمەن وڭىردە كاسىپكەرلىكپەن اينالىسۋشىلار سانى ارتىپ كەلەدى. بىلتىر ونىڭ ءوسىمى الدىڭعى جىلمەن سالىستىرعاندا جيىرما پايىزعا ارتقان. پالاتانىڭ وڭىرلىك ءبولىمىنىڭ ديرەكتورى دارحان قاليەۆتىڭ ايتۋىنا قاراعاندا قازىر ەڭبەككە جارامدى ءاربىر ءۇشىنشى سولتۇستىكقازاقستاندىق ءوزىنىڭ بيزنەسىن اشۋدا ەكەن. بۇعان بيزنەستى جۇرگىزۋدىڭ قىر - سىرىن ۇيرەتەتىن «باستاۋ» باعدارلاماسىنىڭ كومەگى دە كوپ تيۋدە كورىنەدى. ماسەلەن, بىلتىر تەك تايىنشا اۋدانىندا عانا بوس جۇرگەن جانە ءوزىن ءوزى قامتىعان 176 ادام وقىپ, وزدەرىنىڭ بيزنەسىن اشقان. سونىمەن بىرگە پالاتانىڭ قولداۋىمەن بىلتىر شەتەلدەن ماماندار شاقىرىلىپ, حالىقتى بيزنەسكە ۇيرەتكەن. ال وبلىستىڭ بيزنەس جاساۋعا قۇمارتقاندار 25 رەت شەتەلگە شىعىپ, وقىپ ۇيرەنۋگە مۇمكىندىك العان. د.قاليەۆ ءوزىنىڭ ەسەپتىك بايانداماسىندا بىلتىر وبلىستا شاعىن جانە ورتا كاسىپ سۋبەكتىلەرى 344 جوبانى ىسكە اسىرعانىن جەتكىزدى. «وعان 1 ملرد تەڭگەدەن استام قاراجات قۇيىلدى. سونىڭ ىشىندە 24 جوبا اگرارلىق نەسيەلىك كورپوراتسيا ارقىلى قارجىلاندىرىلدى», دەدى ول. سونىمەن قاتار ءتۇرلى جوبالارعا 1887 گرانت بەرىلگەنى بەلگىلى بولدى.
كاسىپكەرلىك جانە تۋريزم باسقارماسىنىڭ باستىعى قۇرالاي جاروۆا ءوزىنىڭ سوزىندە بىلتىر شوب-پەن اينالىسۋشىلار سانى 25 مىڭ سۋبەكتىدەن 30 سۋبەكتىگە ارتقانىن جەتكىزدى.
«شوب-تىڭ شىعارعان ونىمدەرىنىڭ كولەمى 17 پايىزعا ء–وسىپ, 473 ملرد تەڭگەگە جەتتى», دەدى ول.
سولتۇستىك قازاقستان وبلىسى