ۇزاعان سايىن قاشقىن وليگارح مۇحتار ءابىلازوۆتىڭ اقشا ۇرلاۋ وديسسەياسىنداعى الۋان قىرلى قيمىلدارى بىرتىندەپ ايعاق بولىپ جاتىر. ونىڭ بۇل جولداعى «ەرلىك ىستەرى» قازاقستاننىڭ بتا بانكىسىنەن ۇرلاپ كەتكەن 6 ملرد. اقش دوللارىمەن عانا شەكتەلىپ قالماپتى, وسى ارالىقتا سونىمەن قاتار, بىرقاتار شەت مەملەكەتتەردىڭ كوپتەگەن بانكىلەرىن ۇدەرە ۇپتەپ, تاقىرعا وتىرعىزىپ كەتكەن ەكەن. بۇل تۋرالى بتا بانكتىڭ وكىلى مالىمدەدى.
بۇلاردىڭ الدىڭعى قاتارىندا بريتانيانىڭ HSBC, Standard Chartered, RBS جانە Barclays دەپ اتالاتىن قارجى مەكەمەلەرى تۇرعان كورىنەدى. ءبىزدىڭ ەكس-بانكيردىڭ مۇنداعى ارىپتەستەرىنەن الىپ كەتكەن اقشاسىنىڭ جالپى سوماسى 500 ملن. دوللاردى قۇرايدى. بۇدان باسقا, اق قاعازدى ايعىزداي سالىپ, اقشاعا اينالدىرا بەرەتىن جەردەن شىققان ءجىتى قۋ مۇحتار ءابىلازوۆتىڭ جەلىسى بويىنشا تۇسىرىلگەن «ماڭعىت, اۋزىڭا ساڭعىت» سەرياسىنىڭ كەيىپكەرلەرى بولعاندار ساپىندا يتاليانىڭ 8 بانكىسى دە سابىلىسىپ ءجۇر. ولاردىڭ ىشىندە بىلايعى ادامنىڭ تۇسىنە كىرسە دە, تىسىنە تۋرا كەلە قويمايتىن Unicredit, Banca Monte dei Paschi di Siena جانە Mediobanca دەيتىن الپاۋىتتارى دا بار. بۇلار مۇحتاردىڭ قارماعى ۇشىنا 250 ملن. اقش دوللارىن وزدەرى بارىپ ءىلىندىرىپ جىبەرگەنگە ۇقسايدى.
قازىرگى كۇندەرى ابىلازوۆكە بەرىپ جىبەرگەندەرى بۇلارعا قاراعاندا ەداۋىر از بولىپ كورىنەتىن بىرقاتار فرانتسۋز بانكتەرىنىڭ قوجايىندارى ماڭدايلارىنىڭ تەرىن بەس ءسۇرتىپ, شۇكىرشىلىك ايتىپ وتىرعان سەكىلدى. قانشا دەگەنمەن, ەندى 50 ملن. دوللار اقشا دەگەن ءبارىبىر 500 ملن. دوللاردىڭ دورباسىنا شاق كەلە قويمايدى عوي. ال سول ەلۋ ميلليوندى ءبىزدىڭ «باتىر بالا» فرانتسيانىڭ BNP Paribas, Societe Generale, Credit Agricole جانە BPCE دەگەن بانكىلەرىنەن الىپ كەتكەن ەكەن. بۇلاردىڭ سىرتىندا شۆەيتسارسكيانىڭ Credit Suisse, نەمىستىڭ Commerzbank جانە امەريكانىڭ Wells Fargo دەيتىن بانكىلەرى تۇر.
وسىلارعا قاراي وتىرىپ, بۇل جارىقتىق وسىنشاما ەلدىڭ وسىنشاما بانكىلەرىنەن وسىنشاما اقشانى قاي ۋاقىتتا الىپ ۇلگەرە بەرگەن دەپ قايران قالاسىڭ. سولاردى ەلەكتەن وتكىزە كەلىپ, بۇل مۇحتار ءابىلازوۆ دەگەنىڭ شىنىندا دا ناعىز داۋاسىز الاياق ەكەن عوي, دەگەن ويعا ەرىكسىز كەلەسىڭ.
قۇرىش نۇرىمبەت.