ۇكىمەت باسشىسى اسقار مامين جامبىل وبلىستىق ءماسليحاتىنىڭ كەزەكتەن تىس سەسسياسىنا قاتىستى, وندا مەملەكەت باسشىسى قاسىم-جومارت توقاەۆتىڭ ءوڭىر اكىمى قىزمەتىنە ۇسىنعان بەردىبەك ساپارباەۆتىڭ كانديداتۋراسىنا ءبىراۋىزدان كەلىسىم بەرىلدى. بۇل تۋرالى پرەمەر-ءمينيستردىڭ ءباسپاسوز قىزمەتى حابارلادى.
جامبىل وبلىسىنىڭ اكتيۆىمەن وتكەن كەڭەستە ا. مامين اسقار مىرزاحمەتوۆتىڭ ءوڭىردىڭ دامۋىنا قوسقان ۇلەسىن اتاپ ءوتىپ, ايماق اكىمى لاۋازىمىندا اتقارعان جۇمىسى ءۇشىن العىس ءبىلدىردى.
جاڭا اكىمدى تانىستىرعان پرەمەر-مينيستر ونىڭ ايماقتىق جانە رەسپۋبليكالىق دەڭگەيلەردەگى باسشىلىق قىزمەتتەردەگى جۇمىس تاجىريبەسىن اتاپ ءوتتى.
«تۇڭعىش پرەزيدەنت – ەلباسى نۇرسۇلتان ءابىش ۇلى نازارباەۆ پەن مەملەكەت باسشىسى قاسىم-جومارت كەمەل ۇلى توقاەۆ جامبىل وبلىسىنىڭ دامۋىنا ەرەكشە كوڭىل بولەدى. قازىرگى تاڭدا ءوڭىر باسشىلىعىنىڭ الدىندا اۋقىمدى مىندەتتەر تۇر. ەڭ الدىمەن, يدەولوگيالىق جۇمىسقا جانە ۇلتارالىق كەلىسىمنىڭ نىعايۋىنا, الەۋمەتتىك-ەكونوميكالىق جاعداي مەن حالىقتىڭ تۇرمىس ساپاسىن جاقسارتۋعا باسا نازار اۋدارۋ قاجەت», — دەدى ا. مامين.
ۇكىمەت باسشىسى ەكونوميكانىڭ تۇراقتى دامۋىن, ينۆەستيتسيالار تارتۋ, جاڭا جۇمىس ورىندارىن قۇرۋ, ازاماتتاردىڭ ءومىر ءسۇرۋ ساپاسىن جانە تابىسىن ارتتىرۋ بويىنشا مىندەتتەردى شەشۋدىڭ ماڭىزدىلىعىن اتاپ ءوتتى.
«بەردىبەك ماشبەك ۇلىنا باسشىلىق قىزمەتتەردەگى تاجىريبەسى مەن ءبىلىمى وبلىس اكتيۆىمەن جانە ءماسليحات دەپۋتاتتارىمەن بىرلەسىپ, مەملەكەت باسشىسى العا قويعان مىندەتتەردى ساپالى ورىنداۋعا مۇمكىندىك بەرەتىنىنە سەنىمدىمىن», — دەدى ا. مامين.
كەزدەسۋدە وبلىستىق جانە قالالىق ءماسليحاتتاردىڭ حاتشىلارى باعلان قاراشولاقوۆ پەن باتىربەك كۇلەكەەۆ, تاراز يننوۆاتسيالىق-گۋمانيتارلىق ۋنيۆەرسيتەتىنىڭ رەكتورى ەربولات ساۋرىقوۆ پەن «قازفوسفات» جشس باس ديرەكتورى مۇقاش ەسكەندىروۆ ءسوز سويلەپ, مەملەكەت باسشىسى ۇسىنعان بەردىبەك ساپارباەۆتىڭ كانديداتۋراسىنا قولداۋ ءبىلدىردى جانە جامبىل وبلىسىنىڭ جاڭا اكىمىنە تابىستى ءارى جەمىستى جۇمىس تىلەدى.
بەردىبەك ساپارباەۆ 1953 جىلى قىزىلوردا وبلىسىندا دۇنيەگە كەلگەن. ەڭبەك جولىن 1969 جىلى «زادارينسكي» سوۆحوزىنىڭ جۇمىسشىسى رەتىندە باستاعان. 1977 جىلى الماتى حالىق شارۋاشىلىعى ينستيتۋتىن ەكونوميست ماماندىعى بويىنشا ءبىتىردى. ينستيتۋتتى بىتىرىسىمەن رەسپۋبليكالىق مەملەكەتتىك ەڭبەك جيناقتاۋ كاسسالارى باسقارماسىندا ەكونوميست بولىپ ەڭبەك ەتتى.
ءتۇرلى جىلدارى بەردىبەك ساپارباەۆ پرەزيدەنت اپپاراتىندا, مينيسترلەر كابينەتى اپپاراتىندا, قازكسر قارجى مينيسترلىگىندە, كەدەندىك باقىلاۋ اگەنتتىگى مەن كوميتەتىندە, قارجى مينيسترلىگىندە باسشىلىق قىزمەتتەردى اتقارعان. قىزىلوردا, وڭتۇستىك قازاقستان, شىعىس قازاقستان, اقتوبە وبلىستارىنىڭ اكىمى, ەكونوميكا جانە بيۋدجەتتىك جوسپارلاۋ ۆيتسە-ءمينيسترى, ەڭبەك جانە حالىقتى الەۋمەتتىك قورعاۋ ءمينيسترى قىزمەتتەرىن اتقارعان. 2019 جىلعى تامىزدان باستاپ پرەمەر-ءمينيستردىڭ ورىنباسارى لاۋازىمىن اتقاردى.