قوردايداعى وقيعا ءبارىمىزدى الاڭداتقانى راس. بەيبىت كۇندە مۇنشا ادامنىڭ قازا تابۋى قايعىلى جاعداي. ىنتىماعى جاراسقان, تاتۋ ەل ەدىك. تابان استىندا مۇنداي داۋ تۋعانىن تۇسىنە الماي دال بولدىق. قازا تاپقانداردىڭ وتباسىنا قايعىرىپ كوڭىل ايتامىز, جاراقات العانداردىڭ تەزىرەك ساۋىعىپ كەتۋىنە تىلەكتەسپىز.
ءبىز بىرلىكتى, اۋىزبىرشىلىكتى, ىنتىماقتى, سابىرلىقتى تۋ ەتكەن مەملەكەتپىز. ەسە قايتارۋ, ورە تۇرەگەلۋ ەشكىمگە ابىروي اپەرمەيدى. بارىمىزگە سابىرلىق تانىتۋ قاجەت.
وكىنىشكە قاراي, بۇل وقيعا جاستار تاربيەسىنە بەيجاي قاراعانىمىزدى كورسەتتى. بۇرىن اۋىلىمىز ارالاس, قويىمىز قورالاس مامىراجاي كۇن كەشكەن ەدىك. مەنىڭ جاس كەزىمدە مۇنداي كيكىلجىڭ بولعان ەمەس. مەرەكەلەرىمىزدى بىرگە تويلاپ, تاتۋ-ءتاتتى كۇن كەشتىك. الايدا قازىر جاستار الەۋمەتتىك جەلىدەن بۇرىس نارسە وقىپ, سونىڭ جەتەگىندە كەتكەن سىڭايلى.
مەملەكەت باسشىسى قاسىم-جومارت توقاەۆتىڭ قابىلداعان شەشىمدەرىن تولىقتاي قولدايمىن. پرەزيدەنتىمىز دەر كەزىندە ارەكەت ەتىپ, ناقتى تاپسىرمالار بەردى. وسىنداي كەلەڭسىزدىككە جول بەرگەن لاۋازىمدى تۇلعالاردى قىزمەتىنەن بوساتۋىن دا قۇپتايمىن. قورداي وقيعاسىندا قاسىم-جومارت توقاەۆ تاعى دا ءبىر مارتە ءوزىنىڭ كانىگى ساياساتكەر, حالىقارالىق دەڭگەيدەگى ديپلومات ەكەنىن دالەلدەدى. مەملەكەت باسشىسىنىڭ جەدەل شەشىم قابىلداۋى جاعدايدى ودان ءارى ۋشىقتىرماي, احۋالدى تۇراقتاندىرۋعا زور ۇلەس قوسقانى انىق.
بۇل وقيعاعا كىم كىنالى ەكەنىن ءدوپ باسىپ ايتۋ قيىن. قازىرگى تاڭدا مەملەكەت باسشىسىنىڭ تاپسىرماسىمەن قۇرىلعان ۇكىمەتتىك كوميسسيا وسى جاعدايعا بايلانىستى تەكسەرۋ جۇرگىزىپ جاتىر. وندا كەلەڭسىزدىكتىڭ ناقتى سەبەپتەرى انىقتالىپ, كىنالىلەر تابىلاتىنىنا سەنىمدىمىن.
ەلىمىزدىڭ, حالقىمىزدىڭ بىرلىگى, ىنتىماعى بەكەم بولسىن!
ابۋباكىر ۆوينتسە,
«دۇنگەندەردىڭ قازاقستاندىق قوعامى» قوعامدىق ۇيىمىنىڭ توراعاسى