شىمكەنتتەگى ەڭ كورىكتى دەمالىس ورنى بولادى دەپ كۇتىلگەن قوشقار اتا وزەنىن اباتتاندىرۋ جۇمىستارى باستالدى. بۇل تۋرالى وبلىس اكىمىنىڭ ءباسپاسوز قىزمەتى حابارلادى.
بيىل دەمالىس ايماعى قۇرىلىسىنىڭ العاشقى كەزەڭى جۇزەگە اسىرىلادى. بۇل كەزەڭدە قوشقار اتا وزەنى باستاۋىنان ورداباسى الاڭىنا دەيىنگى 16 گەكتار جەر تولىق كورىكتەندىرىلەدى. ونىڭ جوبالىق-سمەتالىق قۇجاتى ازىرلەنىپ, مەملەكەتتىك ساراپتامادان ءوتتى. جوبانى دايىنداۋعا وبلىستىق بيۋدجەتتەن 15 ملن. تەڭگە قارجى جۇمسالىپتى. ال قۇرىلىسقا قاجەتتى 452 ملن. تەڭگە قارجى قالا بيۋدجەتىنەن بولىنگەن.
- دەمالىس ايماعى قۇرىلىسى بارىسىندا قوشقار اتا وزەنى جاعالاۋىنداعى بەكىتۋ پليتالارى, جاياۋ جۇرگىنشىلەرگە ارنالعان جولدار دا تولىق جاڭالانباق. سونداي-اق مۇندا دەمالۋشىلارعا ارنالعان كيىم اۋىستىراتىن ارنايى جابدىقتالعان ورىن قاراستىرىلىپ, تىنىعاتىن ورىندىقتار دا ورناتىلادى. ايماقتا بوي كوتەرەتىن جاڭا ەكى قاباتتى كەڭسە عيماراتىندا مەديتسينالىق بەكەت پەن سۋ قۇتقارۋشىلارى ورنالاسپاق. كوگالداندىرۋ باعىتىندا اعاش كوشەتتەرى مەن اسەم گۇلدەر وتىرعىزىلادى, - دەيدى ۋچاسكە پرورابى جاردەم جۇماعازيەۆ. شومىلاتىن قاۋىز, كىشىگىرىم جاعاجاي, سپورت الاڭدارى. قوشقار اتا وزەنىنىڭ بولاشاقتاعى كورىنىسى وسىنداي بولماق.
قوشقار اتا وزەنى باستاۋ الاتىن بۇلاق ماڭى قازىر قىزۋ قاربالاس جۇمىستارعا تولى. مۇندا سۋ قوقىستان تازارتىلىپ, قازۋ جۇمىستارى جۇرگىزىلۋدە. دەمالىس ايماعىن كوگالداندىرۋ جۇمىستارى 10 اي ۋاقىت ىشىندە تولىعىمەن اياقتالۋى ءتيىس. كونكۋرستى جەڭىپ العان «ليدەر نك» مەردىگەر مەكەمەسى قازىرگى تاڭدا كوپىر جولدارىن رەتكە كەلتىرىپ, كوگالداندىرۋ جۇمىستارىمەن اينالىسۋدا. مەكەمە ينجەنەرى نۇرالى راشيدوۆ ساپالى ءارى كەڭ اۋقىمدا جۇرگىزىلىپ جاتقان جۇمىستاردىڭ ءوز مەرزىمىنەن كەشىكپەيتىنىنە سەنىمدى. ال جەرگىلىكتى تۇرعىندار قالانىڭ ساۋلەتىنە وزگەشە لەپ اكەلەر دەمالىس ايماعىندا سەرۋەن قۇراتىن ءساتتى اسىعا كۇتىپ ءجۇر.
مۇرات ايتقوجا.