قازاقستاندا 17 ملن. تەڭگەنىڭ مۇنايىن ۇرلاعان قىلمىستىق توپ ۇستالدى. بۇل تۋرالى بۇگىن ءباسپاسوز ءماسليحاتى بارىسىندا ەكونوميكالىق قىلمىسقا جانە سىبايلاس جەمقورلىققا قارسى كۇرەس اگەنتتىگىنىڭ رەسمي وكىلى مۇرات جۇمانباەۆ مالىمدەدى.
«مۇناي جانە مۇناي ونىمدەرىنىڭ زاڭسىز اينالىمى دا قىلمىستىق توپتاردىڭ بايۋ كوزدەرىنىڭ ءبىرى بولىپ وتىر. وڭتۇستىك قازاقستان وبلىسىندا مۇنايدى قۇبىر ارقىلى ۇرلاۋمەن اينالىسقان ۇيىمداسقان قىلمىستىق توپتىڭ 10 مۇشەسى قاماۋدا سوت ۇكىمىن كۇتىپ وتىر. ولاردىڭ ىشىندە قۇبىرلاردى كۇزەتۋگە مىندەتتى «SEMSER Securiti» كۇزەت اگەنتتىگى» جشس ديرەكتورى ن.مولتاەۆ تا بار», - دەدى م.جۇمانباەۆ.
قىلمىستىق ءىستىڭ ماتەريالدارى بويىنشا اتالمىش توپ مۇشەلەرى 2012 جىلدىڭ شىلدە-جەلتوقسان ارالىعىندا 17 ملن. تەڭگەدەن استام سوماعا 4000 توننا كولەمىندە شيكى مۇنايدى ساتۋ ماقساتىندا جاسىرىن تۇردە ۇرلاعان. ولار مۇنايدى «قۇمكول – پاۆلودار –شىمكەنت» قۇبىرى ارقىلى ۇرلاپ, تاسىمالداپ ساقتاعان.
سونىمەن قاتار, قارجى پوليتسياسى اگەنتتىگى مەن اتىراۋ, اقتوبە جانە باتىس قازاقستان وبلىستارى دەپارتامەنتتەرىنىڭ قىزمەتكەرلەرى كولەمدى وپەراتسيا ناتيجەسىندە 2012-2013 جىلدارى مۇنايدىڭ زاڭسىز اينالىمى سالاسىندا قىزمەت ەتكەن قىلمىستىق توپتى اشكەرەلەگەن.
«قازاقستاننىڭ 6 ازاماتى مەن مولدوۆا رەسپۋبليكاسىنىڭ 2 ازاماتىنان تۇراتىن توپ اقتوبە وبلىسىندا كەن ورىندارىنان جالپى كولەمى 739 توننا مۇناي ۇرلاعان», - دەپ توقتالدى جۇمانباەۆ.
ونىڭ ايتۋىنشا, ۇرلانعان مۇنايدىڭ 365 توننا بولىگى پەش جانار-جاعار ماي تۇرىندە الىس شەت ەلدەرگە ەكسپورتقا شىعارىلعان. قالعان 2-ءشى بولىگى, ياعني 373 توننا مۇنايدى جىبەرۋ كەزىندە قىلمىستىق توپتىڭ بارلىق مۇشەلەرى ۇستالدى. ولار سوت سانكتسياسىمەن قاماۋعا الىنعان.
«قىلمىستىق توپتىڭ باسشىسى كامالۋتدينوۆ جانە ونىڭ سىبايلاسى «Bimol Oil» جشس ديرەكتورى يزيموۆ قاماۋعا دەيىن قارجى پوليتسياسى قىزمەتكەرلەرىنە پارا بەرۋ ارقىلى وسى قىلمىستىق توپتىڭ قىزمەتىن تەكسەرۋدى توقتاتۋعا ارەكەت جاساعان. بۇل فاكتىلەر بەكىتىلىپ, ولار بويىنشا قىلمىستىق ىستەر قوزعالدى. تەكسەرىستى توقتاتۋ جانە وسى توپقا ءارى قاراي قامقورلىق جاساۋ ءۇشىن 755 مىڭ تەڭگە سوماسىندا اتىراۋ وبلىسىنىڭ قارجى پوليتسياسى قىزمەتكەرلەرىنە, وعان قوسا 630 مىڭ تەڭگە سوماسىندا اقتوبە وبلىسىنىڭ قارجى پوليتسياسى قىزمەتكەرلەرىنە پارا بەرۋ فاكتىلەرى بويىنشا قىلمىستىق ىستەر قوزعالدى», - دەپ ءتۇسىندىرىپ ءوتتى رەسمي وكىل.
قۇرىش نۇرىمبەت.