«پەداگوگ مارتەبەسى تۋرالى» جاڭا زاڭ بويىنشا مەكتەپكە دەيىنگى ءبىلىم مەكەمەلەرىندە, قوسىمشا ءبىلىم بەرەتىن مەكەمەلەردە جانە كاسىبي-تەحنيكالىق ءبىلىم بەرۋ مەكەمەلەرىندە جۇمىس ىستەيتىن پەداگوگتەر ءۇشىن دە ساناتىنا بايلانىستى بىلىكتىلىگىن ارتتىرۋ قاراستىرىلعان. سونداي-اق پەداگوگيكالىق ماماندىعى جوق, بىراق وسى سالادا جۇمىس ىستەي الاتىن قىزمەتكەرلەر ءۇشىن پەداگوگيكالىق قايتا دايارلاۋ كۋرستارى قاراستىرىلعان. بۇل جايىندا ءبىلىم جانە عىلىم ۆيتسە-ءمينيسترى شولپان تاڭاتقىزى كارينوۆا ايتىپ بەردى. بۇل تۋرالى پرەمەر-ءمينيستردىڭ ءباسپاسوز قىزمەتى حابارلادى.
وسى باعىتتا بۇگىنگى كۇنى ونىڭ تارتىپتەرى مەن ەرەجەلەرىن بەكىتۋ جۇمىستارى جۇرگىزىلىپ جاتىر. جالپى, قازاقستاندىق پەداگوگ ماماندار كەمىندە بەس جىلدا ءبىر رەت بىلىكتىلىگىن ارتتىرۋعا قۇقىلى.
«جاڭا زاڭ اياسىندا پەداگوگتىڭ ءوز بىلىكتىلىگىن ارتتىرۋ ماقساتىندا قوسىمشا ءبىلىم بەرۋ باعدارلامالارى بويىنشا بىلىكتىلىكتى ارتتىرۋ كۋرستارىندا ءبىر ۋاقىتتا جانە ۇزدىكسىز, سونداي-اق كەزەڭ-كەزەڭمەن وقي الادى. سونداي-اق جەكەلەگەن باعىتتاردى, ساباقتاردى, پاندەردى (مودۋلدەردى) مەڭگەرە الادى. مىسالى, الدىمەن پەداگوگ ءوزى ساباق بەرەتىن ءپان بويىنشا كۋرستىق دايارلاۋدان وتەتىن بولسا, كەلەسى جولى تاربيە جۇمىسىنا بايلانىستى, ودان كەيىن جەكە تۇلعا رەتىندە دامۋ ءۇشىن پسيحولوگيالىق كۋرستاردان ءوتۋى مۇمكىن. بۇل مۇعالىمنىڭ بۇگىنگى قوعامنىڭ تالابىنا ساي جان-جاقتى دامۋىنا, پەداگوگيكالىق شەبەرلىگىن ارتتىرۋعا سەپتىگىن تيگىزەدى», - دەدى ش. كارينوۆا.
ال پەداگوگيكالىق قايتا دايارلاۋ پەداگوگيكالىق ماماندىعى جوق, بىراق وسى سالادا جۇمىس ىستەي الاتىن قىزمەتكەرلەر ءۇشىن قاراستىرىلعان. سوندىقتان ناقتى پەداگوگيكالىق ءبىلىمى جوق ماماندار بولاتىن بولسا, ولار ءتيىستى دەڭگەيدەگى قايتا دايارلاۋ كۋرستارىنان ءوتىپ, ءتيىستى كرەديت سانىن الىپ, ودان كەيىن وسى ماماندىق بويىنشا قىزمەت ەتۋىنە بولادى.
ءبىلىم جانە عىلىم ۆيتسە-ءمينيسترىنىڭ ايتۋىنشا, قازاقستاندا پەداگوگ ماماندار تاپشى.
«بيىلعى وقۋ جىلىندا بەس مىڭعا جۋىق مامان تاپشى بولدى, جاڭا وقۋ جىلىندا جوعارى جانە كاسىبي تەحنيكالىق ءبىلىم مەكەمەلەرىنەن پەداگوگ ماماندىعىن الىپ شىققان جاس ماماندار جۇمىسقا تارتىلدى. وسى ماسەلەنى شەشۋدە قايتا دايارلاۋ كۋرستارى ماڭىزدى ءرول اتقارادى», - دەدى ش. كارينوۆا.
سونىمەن قاتار 2020 جىلدىڭ ناۋرىز ايىنان باستاپ ەلىمىزدەگى ءبىلىم بەرۋ ۇيىمدارىندا قىزمەت ەتەتىن بارلىق ساناتتاعى مۇعالىمدەر اتتەستاتتاۋدان وتەدى. ناتيجەسىندە, ولار بيىلعى جاڭا وقۋ جىلىندا, ياعني قىركۇيەكتەن باستاپ وزدەرىنە ءتيىستى ۇستەماقىنى الاتىن بولادى. ايتا كەتەيىك, وسى ۋاقىتقا دەيىن تەك مەكتەپتەردە جۇمىس ىستەيتىن مۇعالىمدەرگە بىلىكتىلىك ساناتىنا بايلانىستى 30%-دان 50%-عا دەيىن ۇستەماقى تولەنىپ كەلدى.
ء«بىلىم بەرۋ مەكەمەلەرىنىڭ ديرەكتورلارى مەن ورىنباسارلارى ءۇشىن وسىنداي مۇمكىندىكتەر قاراستىرىلعان. قازىرگى ۋاقىتتا ەلىمىزدە 7000-نان اسا مەكتەپ, 827 كوللەدج جانە 10 مىڭنان اسا مەكتەپكە دەيىنگى مەكەمە مەن بالاباقشا جۇمىس ىستەيدى. ولاردىڭ باسشىلارىنىڭ اتتەستاتتاۋدان ءوتىپ, جالاقىلارىن 30%-دان 50%-عا دەيىن كوتەرۋگە مۇمكىندىكتەرى بار», - دەدى ءبىلىم سالاسى باسشىلىعىنىڭ وكىلى.
ش. كارينوۆانىڭ ناقتىلاۋىنشا, مەكتەپ باسشىسىنىڭ دا, ورىنباسارىنىڭ دا ەڭبەكاقى كولەمى ءبىلىم بەرۋ ۇيىمىنداعى ءبىلىم ساپاسىنىڭ ارتۋىنا, وقۋشىلاردىڭ تارتىبىنە, پەداگوگيكالىق ۇجىمنىڭ جەتىستىكتەرىنە ت.ب. كريتەريلەرگە بايلانىستى بولادى.