2020 جىلدىڭ 15 اقپانىنان باستاپ قازاقستان رەسپۋبليكاسىنىڭ شەكارا قىزمەتى مەملەكەتتىك شەكارانىڭ جەكەلەگەن اۋماقتارىندا تىرەك بەكەتتەرىن ورنالاستىرۋ تۋرالى شەشىم قابىلدادى. تىرەك بەكەتتەرىنە قاراۋىلدىق يتتەردى قولدانۋ «قازاقستان رەسپۋبليكاسىنىڭ مەملەكەتتىك شەكاراسى تۋرالى» زاڭىمەن جانە مەكەمەلىك بۇيرىقتارمەن نەگىزدەلگەن.
شەكاراشىنى ءيتسىز ەلەستەتۋ قيىن. شەكاراشى تۋرالى كينولاردىڭ نەمەسە شەكارا ساقشىلارىنا قويىلعان ەسكەرتكىشتەردىڭ اينىماس كەيىپكەرى – يت. ءيتتىڭ كومەگىمەن شەكاراداعى ەسىرتكى, جارىلعىش زاتتار تاسىمالى نەمەسە شەكارادان زاڭسىز وتۋگە تالپىنۋ سياقتى كەز كەلگەن قۇقىق بۇزۋشىلىق ءىس-ارەكەتتىڭ جولى سەنىمدى تۇردە كەسىلەدى. مىسال كەلتىرە كەتسەك, تەك 2019 جىلى عانا 34 زاڭسىز ميگراتسيا كانالىنىڭ جولى كەسىلىپ, 16 ترانسشەكارالىق قىلمىستىق توپتىڭ ءىس-ارەكەتىنە توسقاۋىل قويىلدى. بۇلاردىڭ كوپشىلىگى ارنايى ۇيرەتىلگەن قىزمەتتىك يتتەردىڭ كومەگىمەن جۇزەگە اسىرىلدى.
تاجىريبە كورسەتىپ وتىرعانىنداي, شەكاراشىلاردىڭ ءيتىن ەشقانداي تەحنيكالىق پروگرەسس نەمەسە شەكاراشىنىڭ كاسىبي قىراعىلىعى دا الماستىرا المايدى. عىلىم يتتەردىڭ كورۋ, ءيىس سەزۋ, ەستۋ اناليزاتورلارىنىڭ ادام مۇمكىندىكتەرىنەن جۇزدەگەن ەسە ارتىق جۇمىس ىستەيتىندىكتەرىن الدەقاشان دالەلدەگەن.
ەسكەرتە كەتەيىك, شەكاراشىلاردىڭ يتتەرى شەكارادا ءوز بەتىمەن قىزمەت ەتۋگە قاجەتتى نەگىزگى ادىستەرگە, سونىڭ ىشىندە قاراۋىلدىق قىزمەت كەزىندە بەيتانىس ادامداردى ۇستاۋدىڭ اگرەسسيۆتى تاسىلدەرىنە ۇيرەتىلگەندىكتەن جەكە قاۋىپسىزدىكتەرى ءۇشىن ازاماتتاردىڭ شەكارا سىزىعىنا جاقىنداماۋىنا كەڭەس بەرەمىز.