جالعان اقپارات تاراتقاندار جازاسىز قالمايدى

ىشكى ىستەر ءمينيسترى ەرلان تۇرعىم­باەۆتىڭ ايتۋىنا قاراعاندا قورداي اۋدانى, ماسانچي جانە سورتوبە اۋىل­دارىنداعى وقيعا تۋرالى العاشقى حابار جامبىل وبلىسى پوليتسيا دەپار­تامەنتىنىڭ كەزەكشى بولىمىنە 7 اقپان كۇنى كەشكى ساعات 19:00-دە تۇسكەن. «سول كۇنى ماسانچي اۋىلىنىڭ شەتىندە 70-كە جۋىق نارازى تۇرعىن جينالىپ, ولاردىڭ اراسىندا بۇزاقىلىق نيەتپەن توپتىق ۇرىس باستالدى. وقيعا ورنىنا قوردايلىق ىشكى ىستەر ءبولىمىنىڭ قىزمەتكەرلەرى كەلدى. ارانداتۋشىلار مەن وقيعا كۋاگەرلەرى بولعان جايتتى ۆيدەوعا ءتۇسىرىپ, مەسسەندجەرلەر مەن الەۋمەتتىك جەلى ارقىلى تۇرعىنداردى زاڭسىز ارەكەتتەرگە شاقىرعان. بۇل قاقتىعىستىڭ شيەلەنىسۋىنە جانە توپتىق ۇرىسقا قاتىسۋشىلار سانىنىڭ كوبەيۋىنە اكەلدى. ناتيجەسىندە, كورشى ەلدى مەكەندەردەن 300-گە جۋىق ادام كەلدى» دەدى بۇل جونىندە ە.تۇرعىمباەۆ.

وسىدان كەيىن ماسانچي اۋىلىنا قو­عامدىق ءتارتىپتى قامتاماسىز ەتۋ ءۇشىن قوسىمشا پوليتسيا جاساقتارى جىبەرىلگەن.

«جانجالعا قاتىسۋشىلار پوليتسياعا بەلسەندى قارسىلىق كورسەتىپ, ولاردىڭ زاڭدى تالاپتارىن دورەكى تۇردە ورىن­داماعان. بۇزاقىلار مەتالل زاتتاردى, تاستاردى, اتىس قارۋلارىن قولدانعان. كەيىنىرەك اۋقاتتى جانە بۇلان باتىر اۋىل­دارىندا دا قاقتىعىستار ورىن الدى. ەلدى مەكەندەر مەن جولدارعا كىرەتىن پەريمەتردىڭ اينالاسىنداعى جولدارعا بوگەتتەر قويىلدى», دەدى مينيستر.

ىشكى ىستەر ءمينيسترى ەرلان تۇرعىم­باەۆ جامبىل وبلىسىندا بولعان قاق­تىعىستا 8 ادام قايتىس بولعانىن ايتتى. الدىن الا دەرەكتەر بويىنشا ورتپەن ۇشتاسقان بۇزاقىلىقتىڭ سالدارىنان 30-دان استام جەكە ءۇي, 15 ساۋدا نىسانى جانە 23 اۆتوكولىك زاقىمدالدى. جەدەل تەرگەۋ توبى قۇرىلدى. وقيعا ورنىنا ىشكى ىستەر ءمينيسترىنىڭ ورىنباسارى مەن باس پروكۋروردىڭ ءبىرىنشى ورىنباسارى شىقتى. قۇقىق ءتارتىبى كۇشتەرىمەن قاقتىعىس توقتاتىلدى. 47 ادام ۇستالدى جانە پوليتسيا بولىمىنە جەتكىزىلدى, ەكى اڭشى مىلتىعى تاركىلەندى. سوتقا دەيىنگى تەرگەۋ قىلمىستىق كودەكستىڭ 272-بابى «جاپپاي تارتىپسىزدىكتى ۇيىم­داستىرۋ جانە وعان قاتىسۋ», سونداي-اق 99-بابى «ادام ءولتىرۋ» بويىنشا جۇرگىزىلەدى. قوعامدىق ءتارتىپتى بۇزعان كىنالىلەردىڭ بارلىعى زاڭناماعا سايكەس جاۋاپكەرشىلىككە تارتىلادى. قازىرگى ۋاقىتتا قوعامدىق قاۋىپسىزدىكتى قام­تا­ماسىز ەتۋ ءۇشىن قاقتىعىس ايما­عىنا پوليتسيا قىزمەتكەرلەرى مەن ۇلت­تىق ۇلاننىڭ اسكەري قىزمەتشىلەرى ورنالاس­قان. قورداي اۋدانىنداعى جاعداي تۇراقتاندى.

بريفينگتە اقپارات جانە قوعامدىق دامۋ ءمينيسترى داۋرەن اباەۆ وسى وقيعا­عا بايلانىستى ازاماتتاردى سابىر ساقتاپ, ارانداتۋعا ەرمەۋگە, جالعان اقپارات تاراتپاۋعا شاقىردى. مەملە­كەتى­مىزدىڭ مۇددەسىنە زيان كەلتىرەتىن, بەرەكە-بىرلىگىمىزدى بۇزاتىن جانە جالعان اقپارات تاراتقان ازاماتتار زاڭ الدىندا جاۋاپ بەرەدى. «قازاقستان كونستيتۋتسياسى ۇلتارالىق كەلىسىمدى بۇزاتىن كەز كەلگەن ارەكەتكە تىيىم سالادى. بۇل تالاپتى ورىنداماعاندار ۇلتتىق ارازدىق تۋدىرعانى ءۇشىن, جاپپاي تارتىپسىزدىك ۇيىمداستىرىپ, جالعان اقپارات تاراتقانى ءۇشىن قىلمىستىق جاۋاپكەرشىلىككە تارتىلادى. تەرگەۋ ناتيجەلەرىنە قاتىستى بارلىق مالىمەتتى ءىىم مەن باس پروكۋراتۋرا حابارلايدى. قۇقىق قورعاۋ ورگاندارى كەز كەلگەن قۇقىق بۇزۋشىلىقتىڭ جولىن كەسىپ, ولارعا جول بەرمەۋ ءۇشىن قاجەتتى بارلىق شارانى قابىلدايدى», دەدى بۇل جونىندە باس پروكۋروردىڭ ورىنباسارى بولات دەمباەۆ.

مەملەكەت باسشىسى قاسىم-جومارت توقاەۆ جامبىل وبلىسىنداعى وقيعا­لارعا بايلانىستى مالىمدەمە جاساپ, ۇكىمەت كوميسسياسىن قۇرۋدى تاپسىرعان بولاتىن. وعان پرەمەر-ءمينيستردىڭ ورىن­باسارى بەردىبەك ماشبەك ۇلى ساپار­باەۆ توراعالىق ەتىپ, ۇكىمەت كوميسسيا­سى بولعان وقيعانىڭ سەبەبىن انىقتاۋدا.

ارينە قوردايداعى وقيعانىڭ قالاي تۇتانعانى تۋرالى ەل ىشىندە ءتۇرلى اڭگىمەلەر ايتىلۋدا. WhatsApp جەلىسى ارقىلى تاراعان ۆيدەولارعا قاراعاندا جاپپاي توبەلەس سورتوبە جانە ماسانچي اۋىلدارىنىڭ ادامدارى پوليتسەيلەرگە قارسىلىق كورسەتىپ, جاعاسىنان الا تۇسۋىنەن باستالعان سياقتى. ال ەندى ءبىر اڭگى­مەلەردە ءبىر توپ دۇنگەن قازاق ازا­ماتى مەن ونىڭ بالاسىنا بالتا الىپ ۇمتىلعانى دا ايتىلادى. اقپارات جانە قوعامدىق دامۋ ءمينيسترى داۋرەن اباەۆ بريفينگتەن كەيىن تىلشىلەردىڭ سۇراق­تارىنا جاۋاپ بەرۋ كەزىندە «ادامدى بالتالاپ تاستاعان» دەگەن اقپاراتتى جوققا شىعاردى.

«ادامدى بالتالاپ تاستاعان دەگەن اقپارات جالعان. مۇنداي نۇسقا بار. بۇل تۇرمىستىق جانجال, بىراق ناقتى قانداي ەكەنىن, قالاي بولعانىن انىقتاپ جاتىر», دەدى د.اباەۆ. قوردايدا ورىن العان وقيعانىڭ ەرتەڭىندە الماتىداعى «بايسات», «بارلىق», «ياليان», «راحات», «بارىس», «الاتاۋ», «بولاشاق», «ميزام», «ارلان», «وجەت», «اق بۇلاق», «كەن­جە­حان» بازارلارى سانيتارلىق كۇن جاريا­لانعاندىقتان جۇمىسىن توقتاتقان بولاتىن. مينيستر بۇل جايتقا قاتىستى دا پىكىر ءبىلدىردى.

«سىزدەر بۇل ماسەلەگە تۇسىنىستىكپەن قاراۋلارىڭىز كەرەك. سەبەبى «باراحولكا» بازارىندا قاقتىعىس جاساۋعا ۇندەۋ جاسالعان. وسىعان سايكەس ساقتىق شارالارى كۇشەيتىلدى», دەدى داۋرەن اباەۆ.

ال جەكسەنبى كۇنى ورتالىق كوممۋنيكاتسيالار قىزمەتىندە وتكەن بريفينگتە ىشكى ىستەر ءمينيسترىنىڭ ورىنباسارى الەكسەي كالايچيدي مەن دەنساۋلىق ساقتاۋ ۆيتسە-ءمينيسترى ءلاززات اقتاەۆا قورداي اۋدانىنداعى جاعدايدان تاعى دا مالىمەتتەر بەردى. ءمينيستردىڭ ورىنباسارى ا.كالايچيدي توبەلەس سالدارىنان قايتىس بولعانداردىڭ سانى ونعا جەتكەنىن ايتتى. ودان بولەك 43 ادام جاراقات العان, ونىڭ 39-ى اۋرۋحانادا جاتىر. جاراقات العانداردىڭ ىشىندە 5 پوليتسيا قىزمەتكەرى بار. ونىڭ ۇشەۋىنە وق تيگەن. الايدا بۇل قاقتىعىستا پوليتسيا قارۋ قولدانباعان. سونداي-اق, ءورت سالدارىنان 25 تۇرعىن ءۇي, 31 كوممەرتسيالىق نىسان, 41 كولىك زاقىمداندى. ازىرگە 2 اڭشى مىلتىعى, 2 تاپانشا جانە 50 جانارماي تولتىرىلعان بوتەلكە تاركىلەنگەن.

– 9 اقپان كۇنگى ساعات 11-گە دەيىنگى مالىمەتتەرگە قاراعاندا قورداي اۋدانىندا بولعان توبەلەستەن 165 ادام زارداپ شەكتى. ونىڭ ىشىندە قازاقستانداعى ەمدەۋ ورىندارىنىڭ كومەگىنە 140 ادام جۇگىنسە, قىرعىزستانداعى ەمدەۋ ورىندارىنا 25 ادام قارالىپتى. جالپى العاندا 50 ادام اۋرۋحاناعا جاتقىزىلدى. ونىڭ 40-ى قازاقستاندىق اۋرۋحانالارعا, 10-ى قىرعىز ەلىنىڭ ەمدەۋ ورىندارىنا جاتقىزىلدى. 30 ناۋقاستىڭ جاعدايى اۋىر, ودان بولەك رەانيماتسيا بولىمىندە جاتقان 8 ناۋقاستىڭ جاعدايى تىپتەن اۋىر. وقيعا كەزىندە 8 ادام قايتىس بولعان, تاعى ەكى ادام اۋرۋحانادا جاتىپ قايتىس بولدى. جەدەل جاردەم قىزمەتىنىڭ 14 بريگاداسى جۇمىس ىستەۋدە. ساناۆياتسيا قىزمەتى ارقىلى 2 ناۋقاس تىكۇشاقپەن الماتىعا جەتكىزىلىپ, سول قالاداعى ەمدەۋ ورىندارىنا جاتقىزىلدى, دەدى دەنساۋلىق ساقتاۋ ءمينيسترىنىڭ ورىنباسارى ءلاززات اقتاەۆا بريفينگتە.