جامبىل وبلىسىنىڭ اكىمى اسقار مىرزاحمەتوۆ قورداي اۋدانىنىڭ اۋماعىندا تەحنوگەندىك سيپاتتاعى توتەنشە جاعدايدى جاريالادى. بۇل تۋرالى وبلىس اكىمىنىڭ ءباسپاسوز قىزمەتى حابارلادى.
«جامبىل وبلىسى قورداي اۋدانىنداعى بىرنەشە اۋىل تۇرعىندارىنىڭ اراسىنداعى بولعان جاپپاي توبەلەسكە بايلانىستى جامبىل وبلىسىنىڭ اكىمى اسقار مىرزاحمەتوۆ جامبىل وبلىسىنىڭ قورداي اۋدانى اۋماعىندا تەحنوگەندىك سيپاتتاعى توتەنشە جاعداي جاريالادى» دەپ حابارلايدى جامبىل وبلىسى اكىمىنىڭ ءباسپاسوز قىزمەتى.
جەرگىلىكتى توتەنشە جاعداي 2020 جىلدىڭ 8 اقپانىندا ساعات 21:00-دە باستالدى. توتەنشە جاعدايدى جويۋ باسشىلىعىنا وبلىس اكىمىنىڭ ءبىرىنشى ورىنباسارى بەكبولات ورىنبەكوۆ تاعايىندالدى. وعان وسى شەشىمنەن تۋىندايتىن تيىسىنشە ءىس-شارالاردى وتكىزۋ جۇكتەلگەن.
ەسكە سالا كەتسەك, 7 اقپاندا قورداي اۋدانىنداعى ماسانچي اۋىلىندا جاپپاي توبەلەس بولعان. قر پرەزيدەنتى قاسىم-جومارت توقاەۆ وسىعان قاتىستى پىكىر ءبىلدىردى.
«قوعامدىق ءتارتىپتى بۇزعاندار جاۋاپكەرشىلىككە تارتىلادى» دەپ جازدى مەملەكەت باسشىسى Twitter-دەگى پاراقشاسىندا.
ال سەنبى, 8 اقپاندا مەملەكەت باسشىسى جامبىل وبلىسىنداعى وقيعاعا بايلانىستى مالىمدەمە جاسادى. مەملەكەت باسشىسىنىڭ تاپسىرماسىمەن قورداي اۋدانىنداعى وقيعا سالدارىن جويۋ جونىندەگى ۇكىمەت كوميسسياسى قۇرىلدى. ىشكى ىستەر ءمينيسترى ەرلان تۇرعىمباەۆ پەن اقپارات جانە قوعامدىق دامۋ ءمينيسترى داۋرەن اباەۆ قورداي اۋدانىنداعى جانجالعا قاتىستى وكق-دا ءباسپاسوز ءماسليحاتىن وتكىزدى. «8 ادام كوز جۇمدى. 40-تان استام ادام جاراقات الدى» دەدى ىشكى ىستەر ءمينيسترى.