قازاقستان حالقى اسسامبلەياسىنىڭ قۇرىلعانىنا 25 جىل تولدى. مەرەيتويلىق شارا اياسىندا «تۇڭعىش پرەزيدەنت جولىمەن» اتتى ەكسپەديتسيا باستاۋ الدى. ەلىمىزدىڭ وڭىرلەرىن قامتيتىن جالپىحالىقتىق اكتسيانىڭ تۇساۋى ەلباسى نۇرسۇلتان نازارباەۆتىڭ تۋعان جەرىندە كەسىلدى. شامالعان اۋىلىنداعى «ۇشقوڭىر» سپورت كەشەنىندە ۇيىمداستىرىلعان شاراعا قازاقستان حالقى اسسامبلەياسى توراعاسىنىڭ ورىنباسارى, حاتشىلىق مەڭگەرۋشىسى جانسەيىت تۇيمەباەۆ پەن الماتى وبلىسىنىڭ əكىمى اماندىق باتالوۆ باستاعان ەل اعالارى قاتىستى.
سالتاناتتى جيىندا العاشقى بولىپ ءسوز العان الماتى وبلىسىنىڭ اكىمى, وبلىستىق قازاقستان حالقى اسسامبلەياسىنىڭ توراعاسى اماندىق باتالوۆ جينالعان جۇرتشىلىقتىڭ ايتۋلى شارانىڭ باستالۋىمەن قۇتتىقتادى.
– اسسامبلەيا مەرەيتويى اياسىندا ۇيىمداستىرىلىپ وتىرعان بۇل ەكسپەديتسيانىڭ ءمانى زور دەپ بىلەمىن. بۇل شارا ەلباسىمىز نۇرسۇلتان ءابىش ۇلى نازارباەۆتىڭ دۇنيەگە كەلگەن ولكەسىنەن باستاپ, ءجۇرىپ وتكەن جولدارىن, تاۋەلسىزدىكتى قالىپتاستىرۋ مەن دامىتۋداعى قادامدارىن, ستراتەگيالىق باعدارلامالارىن, بەيبىتشىلىك پەن كەلىسىم ساياساتىن ونەگە ەتۋدىڭ ەرەن ۇلگىسى بولعالى وتىر. ەكسپەديتسيانىڭ, اسىرەسە, جاستار ءۇشىن بەرەرى مول. سەبەبى تۇڭعىش پرەزيدەنتتىڭ قايراتكەرلىك جولى, تاعىلىمدى ءومىربايانى – وتانعا, ەل مەن جەرگە قالتقىسىز قىزمەت ەتۋدىڭ جارقىن ۇلگىسى, – دەدى وبلىس باسشىسى.
اكىم ءوز سوزىندە 1995 جىلى 1 ناۋرىزدا قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازارباەۆتىڭ جارلىعىمەن مەملەكەت باسشىسى جانىنداعى كونسۋلتاتيۆتى-كەڭەسشى ورگان قۇرىلعانىن تىلگە تيەك ەتىپ, وتكەن جىلدار ىشىندە اسسامبلەيانىڭ ينستيتۋتسيونالدىق قۇرىلىمى نىعايىپ, قوعامدى ۇيىمداستىرۋشى الەۋەتى تولىسقانىن ايتتى.
«تۇڭعىش پرەزيدەنت جولىمەن» رەسپۋبليكالىق ەكسپەديتسياسىنىڭ ماقساتى ەلباسىنىڭ قوعامدىق كەلىسىم مەن جالپىۇلتتىق بىرلىكتىڭ قازاقستاندىق مودەلىن قالىپاستىرۋداعى ەرەن ەڭبەگىن ناسيحاتتاۋ ەكەنىن اتاپ ءوتۋ كەرەك. ەكسپەديتسيا مۇشەلەرى تۇڭعىش پرەزيدەنتتىڭ تۋعان جەرىنەن باستاپ, وقىعان جانە قىزمەت ەتكەن ايماقتارىن دا ارالاپ شىعادى دەپ جوسپارلانعان.
جالپىۇلتتىق جوبانىڭ اشىلۋى سپورت شەبەرى سالامات ناۋرىزباەۆ, «جاس كوشباسشى – 2019» بايقاۋىنىڭ جەڭىمپازى ۆلاديمير چەپەل, قازاقستان حالقى اسسامبلەياسىنىڭ مۇشەسى دامير ديگاي, قحا مۇشەسى, وبلىستىق شەشەن-ينگۋش ەتنومادەني ورتالىعىنىڭ توراعاسى ادام بويساەۆتىڭ ەكسپەديتسيانىڭ تۋى مەن كۇندەلىگىن سالتاناتتى تۇردە ورتاعا الىپ شىعۋىمەن باستالدى. وسىدان كەيىن قازاقستان حالقى اسسامبلەياسى توراعاسىنىڭ ورىنباسارى, قر پرەزيدەنتى اكىمشىلىگى قحا حاتشىلىعىنىڭ مەڭگەرۋشىسى جانسەيىت تۇيمەباەۆ مىنبەرگە كوتەرىلىپ, «تۇڭعىش پرەزيدەنت جولىمەن» اتتى حالىقتىق ەكسپەديتسياسى جالپىۇلتتىق جوباسىنىڭ ماڭىزى جايلى, ەكسپەديتسيا بارىسى جايلى باياندادى. ول ءوز سوزىندە ۇلتارالىق تاتۋلىق پەن كونفەسسياارالىق تۇسىنىستىكتى قالىپتاستىرۋداعى اسسامبلەيانىڭ اتقارعان ءرولى جايلى ايتىپ, كونستيتۋتسيالىق قۇرىلىمنىڭ 25 جىلدىعى ەلىمىزدىڭ بارلىق ايماقتارىندا, سونىمەن قاتار, شەت ەلدەردە دە تويلاناتىنىن تىلگە تيەك ەتتى.
جيىندا ءسوز العان ەلباسىنىڭ سىنىپتاسى, قاراساي اۋداندىق ارداگەرلەر كەڭەسىنىڭ توراعاسى ەدىگەن جۇنىسبەكوۆ نۇرسۇلتان نازارباەۆتىڭ بالالىق, جاستىق شاعىنان ەستەلىك ايتىپ, كوشباسشىلىق قاسيەتتەرى جونىندە ۇلاعاتتى اڭگىمە ايتتى. ال قازاقستان حالقى اسسامبلەياسىنىڭ مۇشەسى, جەتەكشى جۋرناليستەر مەن ساراپشىلار كلۋبىنىڭ توراعاسى, وبلىستىق «وگني الاتاۋ» گازەتىنىڭ باس رەداكتورى اتساليم يديگوۆ, اسسامبلەيا مۇشەلەرى ناتاليا حومەنكو مەن روزا ابيلوۆا ەلباسىمەن كەزدەسۋ كەزىندە العان اسەرلەرى مەن ۇلت كوشباسشىسىنىڭ قاراپايىمدىلىق, سەزىمتالدىق, كورەگەندىك قاسيەتتەرىن تەبىرەنە تولعادى. سونداي-اق «جاڭعىرۋ جولى» وڭىرلىك جاستار قوزعالىسىنىڭ مۇشەسى فاريزات حۋدجيەۆا بولسا سوناۋ سۇراپىل جىلدارى جەر اۋدارىلىپ كەلگەن اتاسى حازىرەت جانە اكەسى حىزىر جادجيەۆتىڭ وتباسىن قامقورلىعىنا الىپ, قاتارعا قوسىلۋىنا تىكەلەي ىقپال ەتكەن ەلباسىنىڭ اكەسى ءابىش تۋرالى جۇرەكجاردى پىكىرىن جەتكىزدى.
«تۇڭعىش پرەزيدەنت جولىمەن» اتتى حالىقتىق ەكسپەديتسياسى جالپىۇلتتىق جوباسىنىڭ باستالۋ سالتاناتى جۇرەك تەبىرەنتەر جالىندى سوزدەرمەن قاتار جەتىسۋ ونەرپازدارىنىڭ ءان-جىرىمەن دە ەرەكشەلەندى. بۇل كۇنى جينالعان جۇرتشىلىق الدىندا ءسۇيىنباي اتىنداعى وبلىستىق فيلارمونيانىڭ, «تالدىقورعان اۋەندەرى», «ۇشقوڭىر» انسامبلدەرىنىڭ انشىلەرى اۋەلەتە ءان شىرقاپ, «التىناي», «شاعالا», «اچيمنوۋل», «تۋعان جەر», «سولنىشكو», «تەمپ» بي ۇجىمدارى ءتۇرلى ۇلتتاردىڭ بيلەرىن جۇرتشىلىق نازارىنا ۇسىندى.
سالتاناتتى جيىننان كەيىن مارتەبەلى مەيماندار «قازاقستان رەسپۋبليكاسى تۇڭعىش پرەزيدەنتىنىڭ «اتامەكەن» تاريحي-مادەني ورتالىعىنا ارنايى ات باسىن تىرەدى. بۇل جەردە جانسەيىت تۇيمەباەۆ ورتالىققا قحا اتىنان ەستەلىك سىيلىق پەن ەلباسى تۋرالى جازىلعان كىتاپتاردى سىيعا تارتسا, ء«جۇز جاڭا ەسىم» جوباسىنىڭ جەڭىمپازى, اقىن ماقپال مىسا «امانات» اتتى ولەڭىن وقىدى. قوناقتار قاراساي اۋدانىنداعى «اناعا قۇرمەت» مۇراجايى مەن «باتىر بابالار» مەموريالىندا بولىپ, ەلىنىڭ ەركىندىگى مەن جەرىنىڭ ازاتتىعى جولىندا قان توگىپ, جان بەرگەن اعا ۇرپاقتىڭ رۋحىنا تاعزىم جاسادى.
شامالعان اۋىلىندا باستاۋ العان «تۇڭعىش پرەزيدەنت جولىمەن» اتتى حالىقتىق ەكسپەديتسياسى ەلباسى ەڭبەك جولىن باستاعان, شىڭدالۋ مەكتەبىنەن وتكەن قاراعاندى وڭىرىندە جالعاسىن تابادى. وسىعان وراي قاراعاندى وبلىسىنان ارنايى كەلگەن دەلەگاتسيا وكىلدەرى الماتى وبلىسىنىڭ اكىمى اماندىق باتالوۆ جانە قازاقستان حالقى اسسامبلەياسى توراعاسىنىڭ ورىنباسارى, پرەزيدەنت اكىمشىلىگى قحا حاتشىلىعىنىڭ مەڭگەرۋشىسى جانسەيىت تۇيمەباەۆتىڭ قولىنان ەكسپەديتسيانىڭ تۋى مەن كۇندەلىگىن سالتاناتتى تۇردە قابىلداپ الدى.
الماتى وبلىسى