«قازاقستان رەسپۋبليكاسىندا بەيبىت جينالىستاردى ۇيىمداستىرۋ جانە وتكىزۋ ءتارتىبى تۋرالى» زاڭ جوباسىنىڭ تۇجىرىمداماسى قوعام تالقىلاۋىنا شىعارىلدى. بۇل تۋرالى اقپارات جانە قوعامدى دامۋ ءمينيسترى داۋرەن اباەۆ Facebook پاراقشاسىندا جازدى.
- قۇرمەتتى دوستار! وزدەرىڭىزگە ءمالىم, مەملەكەت باسشىسى ۇلتتىق قوعامدىق سەنىم كەڭەسى وتىرىسىندا بەيبىت جينالىستار تۋرالى جاڭا زاڭ ازىرلەۋدى تاپسىردى. بۇگىن ءبىزدىڭ مينيسترلىك «اشىق ۇكىمەت» سايتىندا وسى نورماتيۆتىك-قۇقىقتىق اكت تۇجىرىمداماسىنىڭ جوباسىن ورنالاستىردى. كەلىپ تۇسكەن ۇسىنىستار مەن جەتەكشى حالىقارالىق تاجىريبەلەر نەگىزىندە بىرقاتار جاڭا ەنگىزىلىمدەر ۇسىنىلادى, - دەپ جازدى داۋرەن اباەۆ.
ءمينيستردىڭ ايتۋىنشا, ەندى 10 جۇمىس كۇنى ىشىندە ءار ازامات ءوز ەسكەرتپەسى مەن تۇسىنىكتەمەسىن قالدىرا الادى. ولار الداعى ۋاقىتتا قاراستىرىلادى.
- جۋرناليستەردى, ۇكىمەتتىك ەمەس سەكتوردىڭ وكىلدەرىن, ازاماتتىق بەلسەندىلەردى وسى جۇمىسقا قاتىسۋلارىڭىزدى سۇرايمىن, - دەلىنگەن جازبادا.