ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە 20-دان استام عىلىمي باعىت بويىنشا PhD فيلوسوفيا دوكتورى عىلىمي دارەجەسىن قورعاۋ ءۇشىن ديسسەرتاتسيالىق كەڭەستەر جاڭا تالاپتارعا سايكەس جۇمىس ىستەۋدە. ءبىلىم ورداسى عىلىمي زەرتتەۋ ەڭبەكتەردىڭ جوعارى دەڭگەيدە جازىلۋى مەن قورعالۋىنا جوعارى تالاپتار قويۋمەن قاتار ديسسەرتاتسيالىق كەڭەس جۇمىسىن جەتىلدىرۋگە دە باسا نازار اۋدارىپ وتىر. قازىرگى تاڭدا ديسسەرتاتسيالىق كەڭەستە ونلاين داۋىس بەرۋ جۇيەسى ەنگىزىلىپ, PhD فيلوسوفيا دوكتورلارىنا ەۋروپالىق ۇلگىدەگى ديپلوم تابىستالۋدا.
ونلاين داۋىس بەرۋ جۇيەسى العاش رەت «8D032-جۋرناليستيكا جانە اقپارات» كادرلاردى دايارلاۋ باعىتىنداعى «6D050400-جۋرناليستيكا» ماماندىعى بويىنشا ديسسەرتاتسيالىق كەڭەستە قولدانىلدى. دوكتورانت الما سايلاۋقىزى «قازاق قوعامىن دەموكراتيالاندىرۋ مەن ۇلت بىرلىگىن نىعايتۋداعى الاش كوسەمسوزىنىڭ ءرولى» تاقىرىبىنداعى ديسسەرتاتسياسىن ءساتتى قورعاپ, العاش رەت ونلاين داۋىس بەرۋ ارقىلى PhD فيلوسوفيا دوكتورى عىلىمي دارەجەسىنە لايىق دەپ تانىلدى.
ديسسەرتاتسيالىق كەڭەس ماجىلىسىنە دوكتورانتتىڭ شەتەلدىك عىلىمي كەڭەسشىسى, فرانتسياداعى ەۋروپالىق قوعاممەن بايلانىس ينستيتۋتىنىڭ پروفەسسورى ت.يۋ.لەبەدەۆا, كەڭەس مۇشەسى سانكت-پەتەربۋرگ مەملەكەتتىك ۋنيۆەرسيتەتى جۋرناليستيكا جانە بۇقارالىق كوممۋنيكاتسيا جوعارى مەكتەبىنىڭ بيزنەستەگى قوعاممەن بايلانىس كافەدراسىنىڭ مەڭگەرۋشىسى, الەۋمەتتانۋ عىلىمدارىنىڭ دوكتورى, پروفەسسور د.پ.گاۆرا عىلىمي زەرتتەۋ جۇمىسىنا جوعارى باعاسىن بەردى. شەتەلدىك ارىپتەستەر Skype ارقىلى قوسىلىپ, الاشتانۋ عىلىمىنا قوسىلعان جاڭا زەرتتەۋدىڭ وزەكتىلىگىن ەرەكشە اتاپ ءوتتى. پروفەسسور ت.يۋ.لەبەدەۆا ۇلتتىق برەند رەتىندە ۇسىنىلعان الاش قايراتكەرلەرىنىڭ ۇستانىمى مەملەكەت دامۋىنداعى ماڭىزى زور قۇندىلىق ەكەنىن اتاپ ءوتتى. سونداي-اق پاريج باسپاسىنان اتالعان ەڭبەكتى جارىققا شىعارۋعا ۇسىنىس ءبىلدىردى.
پروفەسسور د.پ.گاۆرا ۇلتتىق بىرەگەيلىكتى قالىپتاستىرۋداعى الاش قايراتكەرلەرىنىڭ ەڭبەكتەرىن قازىرگى ساياسي, يدەولوگيالىق, مادەني كونتەكستە تالداعان دوكتورانت ا.سايلاۋقىزىنىڭ زەرتتەۋ ادىستەرىن ۇتىمدى پايدالانۋىن ەرەكشە اتادى. ديسسەرتاتسيالىق كەڭەستىڭ باسقا دا مۇشەلەرى مەن رەسمي رەتسەنزەنتتەرى دوكتورانت جۇمىسىنا جان-جاقتى پىكىر ءبىلدىردى.
جۋرناليستيكا جانە اقپارات كادرلار دايارلاۋ باعىتى بويىنشا العاشقى PhD فيلوسوفيا دوكتورى ديپلومىن ەۇۋ-ءدىڭ عىلىمي-زەرتتەۋ جۇمىستارى جونىندەگى پرورەكتورى, ت.ع.د. گۇلنار تىنىشبايقىزى مەرزادينوۆا, عىلىمي كادرلار مەن پوستدوكتورانتۋرانى اتتەستاتتاۋ ءبولىمنىڭ باستىعى, ف.ع.ك. ماينۇر ابىلتايقىزى بورىباەۆا دوكتورانت ا.سايلاۋقىزىنا ارنايى تابىستادى. سالتاناتتى شاراعا ديسسەرتاتسيالىق كەڭەس توراعاسى, جۋرناليستيكا جانە ساياساتتانۋ فاكۋلتەتىنىڭ دەكانى, پروفەسسور قايرات ءومىرباي ۇلى ساق, ديسسەرتاتسيالىق كەڭەس مۇشەلەرى جانە وقىتۋشى-پروفەسسورلار قۇرامى مەن دوكتورانتتار قاتىستى.
عىلىمي-زەرتتەۋ جۇمىستارى جونىندەگى پرورەكتور گ.ت.مەرزادينوۆا PhD دوكتورى دارەجەسىن العان ا.سايلاۋقىزىن ۋنيۆەرسيتەت باسشىلىعى تاراپىنان قۇتتىقتاپ, بۇگىنگى كۇندەگى ءبىلىم مەن عىلىمنىڭ ماڭىزىنىڭ زور ەكەندىگىنە توقتالدى. سونداي-اق زەرتتەۋ جۇمىسى بويىنشا دوكتورانتتىڭ Scopus مالىمەتتەر بازاسىنا كىرەتىن جۋرنالداردا 3 ماقالا جاريالاۋىن ۇلكەن جەتىستىك رەتىندە باعالادى.
ءبىر ايتا كەتەرلىگى, جۋرناليستيكا سالاسىنداعى بولاشاق عىلىم دوكتورلارىنىڭ جۇمىسىن ساراپتايتىن ديسسەرتاتسيالىق كەڭەس ءوز جۇمىسىن باستاعالى كوپ بولعان جوق. ەۇۋ رەكتورىنىڭ بۇيرىعىمەن ءوز جۇمىسىن باستاعان بۇل كەڭەس وسى ماماندىقتا ءبىلىم العان دوكتورانتتارىمىزعا جول اشىپ, ۇلكەن مۇمكىندىك تۋعىزىپ وتىر. ديسسەرتاتسيالىق كەڭەس مۇشەلەرىنىڭ بارلىعى دەرلىك حالىقارالىق Web of Science نەمەسە Scopus مالىمەتتەر بازاسىنا كىرەتىن جۋرنالداردا سوڭعى 5 جىلدا بىرنەشە ماقالالارى جارىق كورگەن, حيرشا يندەكسى بار عالىمدار. مۇنداي جوعارى تالاپقا ساي كەلەتىن سالا ماماندارىنان جاساقتالعان ديسسەرتاتسيالىق كەڭەستەر رەسپۋبليكامىز بويىنشا نەكەن-ساياق.
گۇلميرا اشىربەكوۆا,
ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ دوتسەنتى, ف.ع.ك.